الدىمەن اقتاۋ قالاسىنداعى دوستىق ءۇيى عيماراتىنىڭ فويەسىندە ءبىرتۋار ءارتىس الماس بەكبوسىنوۆتىڭ تۋعانىنا 100 جىل تولۋىنا ارنالعان حالىقارالىق بي فەستيۆالى اياسىندا ءارتىستىڭ ءومىرى مەن قىزمەتىن باياندايتىن ارنايى جاساقتالعان كوشپەلى كورمەنىڭ اشىلۋى بولدى. بي الەمىنەن سىر شەرتكەن كورمەنىڭ لەنتاسىن قيۋ مارتەبەسى قازاقستاننىڭ حالىق ءارتىسى گۇلجان تالپاقوۆاعا جانە الماس بەكبوسىنوۆتىڭ تۋىسى سارا بەكبوسىنوۆاعا بەرىلىپ, كورمەنى تانىستىرۋ مادەنيەت سالاسىنىڭ ۇزدىگى سەرىك ساريەۆكە ۇسىنىلدى.
قازاقتىڭ ونەر كوكجيەگىندەگى جارىق جۇلدىزى, تۇڭعىش قازاقتىڭ ۇلتتىق-ساحنالىق بيىمەن بىرگە كلاسسيكالىق جانردى ناسيحاتتاۋشى, ءبيشى, بالەتمەيستەر, رەجيسسەر الماس بەكبوسىنوۆتىڭ شىعارماشىلىعىنا ارنالعان شارا ونەرپازدىڭ ءومىرى مەن شىعارماشىلىعىنا ارنالعان دەرەكتى فيلم كورسەتىلىمىمەن جالعاستى.
ۇلتتىق بي ونەرىنىڭ دامۋىنا بايلانىستى ازاماتتاردىڭ قاتىسۋىمەن ۇيىمداستىرىلعان دوڭگەلەك ۇستەلگە ساراپشىلار, قۇرمەتتى قوناقتار, قالا, اۋداندارداعى حورەوگرافتار قاتىستى. دوڭگەلەك ۇستەل جەكە ورىنداۋشىلىق جانر جانە ونىڭ اسپەكتىلەرىنە ارنالدى. جەكە ورىنداۋ جانرى بويىنشا ساراپشىلار مەن كەلگەن قوناقتار ويلارىمەن ءبولىسىپ, قورىتىندىسى بويىنشا شەشىم قابىلداندى.
بۇل ءىس-شارالاردان سوڭ قازاقستاننىڭ ەڭبەك سىڭىرگەن ءارتىسى الماس بەكبوسىنوۆتىڭ تۋعانىنا 100 جىل تولۋىنا ارنالعان حالىقارالىق بي فەستيۆالىنىڭ اشىلۋ سالتاناتى ءوتتى.
ء«سىز بەن ءبىز بۇگىن ەرلەردىڭ اراسىنان شىققان تۇڭعىش كاسىبي بالەت ءبيشىسى الماس بەكبوسىنوۆ تۋرالى تىڭ تۋىندىنى تاماشالادىق. كەنەن ازىرباەۆتاي تۇلعانى تۋدىرعان توپىراقتان جارالعان الماس بەكبوسىنوۆتاي تۋما تالانتتىڭ ءومىر جولى جانە شىعارماشىلىعىمەن تانىستىق. قازاق كلاسسيكالىق بي ونەرىن بيىككە شىعارعان, نەبارى 50 جىل ءومىر ءسۇرىپ, اكتەرلىك شەبەرلىگىمەن ەلدەن ەرەك بولعان الماستاي تۇلعانىڭ رۋحىن قۇرمەتتەپ, ءبىزدىڭ شاقىرۋىمىزدى قابىل الىپ, ءىس-شارانىڭ ويداعىداي وتۋىنە قولداۋ كورسەتكەندەرىڭىزگە العىس بىلدىرەمىن» دەگەن ماڭعىستاۋ وبلىسى اكىمىنىڭ ورىنباسارى ت.ابىشەۆ فەستيۆال جۇمىسىنا ساتتىلىك تىلەدى.
بي فەستيۆالى اياسىندا قازىلار القاسى مۇشەلەرىنىڭ فەستيۆال قاتىسۋشىلارىنا, كاسىپتىك وقۋ ورىندارىنىڭ ستۋدەنتتەرى مەن ماڭعىستاۋ وبلىسى بي انسامبلدەرىنىڭ ارتىستەرىنە شەبەرلىك ساباعىن وتكىزدى. فەستيۆال ەرەجەسى بويىنشا قاتىسۋشىلار ەكىنشى كەزەڭدە وزگە ۇلت ءبيىن بيلەپ سىنعا تۇسكەن بولاتىن.
فەستيۆال قورىتىندىسى بويىنشا قازىلار القاسى ۇزدىك دەپ تانىعان قاتىسۋشىعا ءوز اتتارىنان ارنايى جۇلدەلەر بەلگىلەپ, قازاقستاننىڭ حالىق ءارتىسى, قازاقتىڭ بي ونەرىن الەمنىڭ 52 مەملەكەتىنە تانىتقان ونەر يەسى گ.تالپاقوۆا, قر ءبىلىم بەرۋ ءىسىنىڭ قۇرمەتتى قىزمەتكەرى, مادەنيەت سالاسىنىڭ ۇزدىگى, «ەرەن ەڭبەگى ءۇشىن» مەدالىنىڭ يەگەرى ع.بەيسەنوۆا, قازاقستاننىڭ ەڭبەك سىڭىرگەن ءارتىسى, ونەرتانۋ كانديداتى, پروفەسسور, «ى.التىنسارين», «حالىق العىسى» توسبەلگىلەرىنىڭ, «ەرەن ەڭبەگى ءۇشىن» مەدالىنىڭ يەگەرى ت.ءىزىم, مادەنيەت قايراتكەرى, پەداگوگيكا عىلىمدارىنىڭ دوكتورى, پروفەسسور ا.قۇلبەكوۆا, قازاقستاننىڭ ەڭبەك سىڭىرگەن ءارتىسى, «ەڭبەك داڭقى» توسبەلگىسىنىڭ يەگەرى ع.ابديەۆا, مەملەكەتتىك «ناز» بي تەاترىنىڭ ديرەكتورى, حورەوگرافيا ونەرى قايراتكەرلەرى قوعامىنىڭ توراعاسى, مادەنيەت قايراتكەرى ە.اعىمباەۆ, مادەنيەت قايراتكەرى, «ەرەن ەڭبەگى ءۇشىن» مەدالىنىڭ يەگەرى ت.قىلىشباەۆ, قازاقستاننىڭ ەڭبەك سىڭىرگەن قايراتكەرى, پەداگوگيكا عىلىمدارىنىڭ كانديداتى ز.اجىبەكوۆا, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى ءا.ەسەكەەۆ اتىنان سىيلىقتار تابىستالدى.
تۇركسوي حالىقارالىق ۇيىمىنىڭ ارنايى جۇلدەسىن تۇركسوي حالىقارالىق ۇيىمىنىڭ رەجيسسەرى ا.نۇرمۇحامەد ۇلى اتىراۋ وبلىسىنان كەلگەن ونەرپاز قاراكوز مۇرات, ماڭعىستاۋلىق ەسداۋلەت امانگەلدى ۇلى, اقمولا وبلىسىنان كەلگەن كاميلا بەكمۇحانبەتوۆاعا تابىستادى.
«جاقسىنىڭ اتى ولمەيدى» دەگەندەي, ومىردەن وتسە دە ونەردەگى ءىزى ولمەگەن تۇلعاعا ارنالعان اۋقىمدى ءىس-شارا ارقاۋ بولىپ, تالاي تالانتتى جاستىڭ مەرەيىن تاسىتتى. بۇل, ياعني الماس بەكبوسىنوۆتىڭ ەسىمىن جاڭعىرتۋ – قازاقتان شىققان بيشىلەردىڭ تاعدىرى مەن ءتالىمىن تۇگەندەپ, ءتىرىلتىپ جۇرگەن ءبيشى جىگىت سەرىك ساريەۆتىڭ كەزەكتى جوباسى.
ماڭعىستاۋ وبلىسى
