مەموراندۋمعا ۇلتتىق اكادەميالىق كىتاپحانانىڭ ديرەكتورى عازيزا قۇدايبەرگەنقىزى مەن «قازاق گازەتتەرى» سەرىكتەستىگى باس ديرەكتورىنىڭ ورىنباسارى – الماتى باسىلىمدارىنىڭ جەتەكشىسى سەرىك ابىكەن ۇلى قول قويدى. ىنتىماقتاستىقتىڭ نەگىزگى ماقساتى: قۇجاتتاردى ەلەكتروندى فورماتقا اۋدارۋ ارقىلى قازاقستان حالقىنىڭ تاريحي-مادەني مۇرالارىن ساقتاۋ, كىتاپحانالىق قۇجاتتاردى ينتەرنەت جەلىسىنە ورنالاستىرۋ. كەلىسىم «قازاق گازەتتەرى» سەرىكتەستىگىنە قاراستى گازەت-جۋرنالداردىڭ PDF نۇسقاسىن قازاقستان ۇلتتىق ەلەكتروندى كىتاپحاناسىنىڭ مۇراعاتىندا ساقتاۋعا مۇمكىندىك بەرەدى.
عازيزا قۇدايبەرگەنقىزى ۇلتتىق اكادەميالىق كىتاپحانا تاراپىنان ۇيىمداستىرىلىپ جاتقان ەلەكتروندى قوردى جيناۋ, ساقتاۋ, وقىرمانعا تاراتۋ ماسەلەسىن قىسقاشا تانىستىرىپ بەردى. وعان قوسا كىتاپحانا ۇجىمى تاراپىنان اتقارىلىپ جاتقان باستامالارعا دا توقتالدى. «قازىر بارلىق تەحنولوگيانى پايدالانا وتىرىپ, وقىرماندى كىتاپ وقۋعا ىنتالاندىرۋعا بولادى. «Air Astana»-مەن بىرلەسىپ جاساپ جاتقان جوبامىزدىڭ اياقتالۋىنا از قالدى. مەدياقۇرىلعىعا اۋديوكىتاپ, قازاقتىڭ جىرىن, اۋىز ادەبيەتىن جۇكتەدىك. بۇعان دەيىن سول مەدياقۇرىلعىدا ەرەسەكتەرگە, بالالارعا ارنالعان فيلمدەر بولاتىن. اۋە كومپانياسىنا حات جازىپ, 50 كونتەنت ۇسىندىق. كومپانيا ونىڭ 25-ءىن تاڭداپ الدى. ولار – كەزىندە «مادەني مۇرا» باعدارلاماسىمەن جارىققا شىققان رۋحاني قازىنامىز. باتىرلار جىرىن تىڭداپ وسكەن بالا جىر اتىن ۇمىتىپ قالۋى مۇمكىن, كوكىرەككە جيىلعان رۋح ۋاقىتى كەلگەندە كوكتەيدى. سوندىقتان وسى جوبانى ەرەكشە تانىستىرعىمىز كەلەدى. ودان بولەك, شتريح-كود ارقىلى كىتاپ وقۋ جوباسى دايىندالىپ جاتىر. ساياباقتارداعى ورىندىقتاردا ءتۇرلى جانردا جازىلعان كىتاپتاردىڭ شتريح-كودى ورناتىلىپ, وقىرمان كەز كەلگەن جەردە كىتاپ وقي الادى. جاستار اۋديوكىتاپ تىڭداعىسى كەلسە, اۋديوكىتاپ جاساپ, ۆيدەوسىن دايىنداپ, قالاۋلارىن تولىق ورىنداۋىمىز كەرەك», دەگەن ع.قۇدايبەرگەنقىزى 24 قازان – كىتاپحاناشىلار كۇنىنىڭ ءمان-ماڭىزىنا دا توقتالدى.
«قازاق گازەتتەرى» سەرىكتەستىگى باس ديرەكتورىنىڭ ورىنباسارى – الماتى باسىلىمدارىنىڭ جەتەكشىسى سەرىك ابىكەن ۇلى مۇنداي كەلىسىم قازاق ءباسپاسوزىن ساقتاۋداعى ماڭىزدى قادام ەكەنىن اتاپ ءوتتى. «بۇل ءىستىڭ ۇتىمدى تۇسى كوپ, ەڭ باستىسى – ينتەرنەت جوق زاماندا شىعىپ, تسيفرلانباعان گازەت ساندارىنىڭ بولاشاقتا كوشىرمەسى جاسالىپ, حالىق اشىق دەرەككوزدەن وقي الاتىن بولادى, ۇيدە وتىرىپ-اق ءار جىلدى جەكە پاراقتاپ شىعۋعا مۇمكىندىك تۋادى. بەرىدەگى PDF نۇسقالارى دا جۇكتەلەدى. گازەتتىڭ ءبىر سانى جوعالسا ءبىر كۇننىڭ, بالكىم ءبىر جىلدىڭ تاريحى جوعالادى. سايت, پورتالدار ءجيى جويىلىپ كەتىپ, ەرتەڭگە الاڭ كوپ تۇستا مەملەكەت تاراپىنان سيرەك قۇجاتتاردى ساقتاۋ ءۇشىن ارنايى اشىلعان «Kazneb»-كە كوشىرمەلەر وتكىزۋ – ءباسپاسوز تاريحىن ساقتايدى», – دەيدى ول.
باسقوسۋدا «انا ءتىلى», «اقيقات», «مىسل», «ۇركەر», «ۇيعىر اۆازي», «ۇلان», «اق جەلكەن», «درۋجنىە رەبياتا» باسىلىمدارىنىڭ باس رەداكتورلارى گازەت-جۋرنالداردىڭ الداعى مەرەيتويلارى تۋرالى ايتىپ, باسىلىمنىڭ تاريحي شەجىرەسى ەلەكتروندى كىتاپحانالاردا دا وقىرمانىن كوبەيتەرىنە سەنىم ءبىلدىردى.
قاراگوز ءسىمادىل,
«Ana tili» گازەتى باس رەداكتورىنىڭ ورىنباسارى
