قازاقستان مەن ماروككو كورولدىگى اراسىنداعى ديپلوماتيالىق قاتىناستار 1992 جىلعى 26 مامىردا ورناعان ەدى. ال قازاقستان ەلشىلىگى 2020 جىلى اشىلدى.
قازاق مۋزىكاسىنىڭ ۇزدىك ۇلگىلەرىنەن تۇراتىن كونتسەرت باعدارلاماسى ماروككو جۇرتشىلىعىن ەلىمىزدىڭ ەجەلگى تاريحىمەن دە, ونىڭ زاماناۋي مادەنيەتىمەن دە تانىستىرۋعا ارنالعان.
«جوشى» ەتنو-فولكلورلىق ءانسامبلى قازاق حالقىنىڭ وتكەنى مەن ۇلى دالانىڭ ەجەلگى رۋحىن بەينەلەيتىن «الاش ۇرانى», «رۋحتى ەل», «جولبارىستىڭ جورتۋى» اتتى اۆتورلىق اسپاپتىق شىعارمالارىن كوپشىلىك نازارىنا ۇسىندى.
ال «Alem» زاماناۋي حورەوگرافيا بالەتى بىرەگەي حالىق ءبيىن كورسەتتى. قازاقتىڭ ءداستۇرلى ءانىن فيلارمونيانىڭ دارىندى ورىنداۋشىلارى جاقسىكەلدى ماياساروۆ, راحات بەگاسىلوۆ, زينات قاسىموۆا, مادەنيەت سالاسىنىڭ ۇزدىگى دانيار مۇقان ورىندادى.
اكادەميالىق ءان ءبولىمىنىڭ ورىنداۋشىلارى التىنبەك ارىستانبەك پەن فيرۋزا راحمەتوۆا مادەنيەت سالاسىنىڭ ۇزدىگى روزا شوتقاليەۆانىڭ سۇيەمەلدەۋىمەن حالىق اندەرىنەن كلاسسيكالىق اريالارعا دەيىنگى كەڭ رەپەرتۋاردى, ءمىنسىز داۋىس پەن شەبەرلىكتى كورسەتتى. سونداي-اق قازاقستاننىڭ ەڭبەك سىڭىرگەن قايراتكەرى ايگۇل قوسانوۆا ماروككولىق كورەرمەندى داۋىس دياپازونىمەن جانە جانعا جاقىن دالا باللادالارىمەن تاڭعالدىردى.
حالىقارالىق بايقاۋلاردىڭ لاۋرەاتى, سكريپكاشى مايا مەدەتبەك ۆانەسسا مەيدىڭ «Arabian girl» شىعارماسىن ورىنداپ, اراب مادەنيەتىنە قۇرمەت كورسەتتى. مۋزىكالىق كەشتىڭ تولقىندى ءساتى – اكىمحان ماجەنوۆ پەن راباتتىڭ ۇلكەن وركەسترىنىڭ ماروككولىق «Mahla ifrane» حالىق ءانىن ورىنداۋى بولدى.
كەش سوڭىندا ايگۇل قوسانوۆانىڭ, «Alem» زاماناۋي حورەوگرافيا بالەتى مەن راباتتىڭ ۇلكەن وركەسترىنىڭ ونەرىن ۇيلەستىرگەن ق.سارين مەن ح.ريزابەكتىڭ «باقىتتى مەكەن» ءانى ورىندالدى.
قازاقستان مەن ماروككو كورولدىگىن جاقىنداستىراتىن ورتاق تۇستار كوپ – عاجايىپ لاندشافتار, اتا-بابالاردىڭ كوشپەلى ءومىر سالتى, ءدىنى, ەكونوميكالىق بايلانىستارى جانە ەكىجاقتى بايلانىستى دامىتۋعا دەگەن زور ۇمتىلىس. ەلوردالىق ونەرپازدار كورسەتكەن مادەنيەت مەرەكەسى وسى ءبىر ابىرويلى ماقساتقا ۇلەس قوسقانى انىق. ەكى قۇرلىق, ەكى ەجەلگى وركەنيەت اراسىنداعى مادەني كوپىر الداعى ۋاقىتتا جالعاسا بەرەتىنى ءسوزسىز.
