فوتو: «Amanat»
«Amanat» پارتياسىنىڭ ءباسپاسوز قىزمەتىنىڭ ءمالىم ەتۋىنشە ءدال وسىنداي كولەمدى تۋ عيماراتتىڭ قاسبەتىنە العاش رەت ءىلىنىپ وتىر. پارتيالىقتاردىڭ ايتۋىنشا, اسپان تۇستەس كوك بايراق ادامداردىڭ بويىندا پاتريوتيزم مەن ءوز ەلىنە دەگەن ماقتانىش سىندى ەڭ ىزگى سەزىمدەردى وياتادى.
«Amanat» پارتياسىنىڭ «جاستار رۋحى» جاستار قاناتى وسىمەن 3 جىل قاتارىنان قازاقستان رەسپۋبليكاسىنىڭ مەملەكەتتىك تۋىن ناسيحاتتاۋعا باعىتتالعان «مەنىڭ ەلىم – مەنىڭ تۋىم» اكتسياسىن وتكىزىپ كەلەدى. بيىل اكتسيا اياسىندا ەل اۋماعىندا 10 مىڭنان استام مەملەكەتتىك تۋ ىلىنەدى. وعان دەپۋتاتتار, قوعام قايراتكەرلەرى, بەلسەندى جاستار جانە بارشا نيەت ءبىلدىرۋشى ادامدار قاتىسادى.
«جاستار رۋحىنىڭ» توراعاسى اقەركە يسكاندەروۆا بۇل اكتسيا 1990 جىلعى 25 قازاندا قابىلدانعان مەملەكەتتىك ەگەمەندىك تۋرالى دەكلاراتسيا تاۋەلسىزدىگىمىزدىڭ باستاۋى بولعانىن ەسكە سالۋعا ارنالعانىن اتاپ ءوتتى.
«بەلسەندىلەرىمىز ەل اۋماعىنداعى تۇرعىن ۇيلەر مەن الەۋمەتتىك نىساندارعا كوك بايراعىمىزدى ءىلىپ جاتىر. 25 قازانعا دەيىن باس-اياعى 10 مىڭنان استام تۋ ءىلۋ جوسپارلانىپ وتىر. اتالعان اكتسيانىڭ باستى ماقساتى – ەل ازاماتتارى اراسىندا پاتريوتتىق سەزىمدى وياتۋ. مەملەكەتتىك تۋىمىزعا قاراعان سايىن كەۋدەمىزدى ءوز ەلىمىزگە دەگەن ماقتانىش سەزىمى كەرنەيدى. ءبىز تۋدى «AMANAT» پارتياسىنىڭ عيماراتىنا ىلدىك. ول ءتۇرلى مادەني ءىس-شارالاردا, ۇلتتىق قۇرامالارىمىزدىڭ ماتچتارىندا, ءتىپتى جۋىردا 5-ءشى دۇنيەجۇزىلىك كوشپەندىلەر ويىندارى اياسىندا وتكەن ديماش قۇدايبەرگەننىڭ كونتسەرتىندە جەلبىرەدى. كوك بايراعىمىز ەلوردانىڭ قاق ورتاسىندا 25 قازانعا دەيىن ءىلىنىپ, ەل تۇرعىندارىن قۋانتادى», دەدى ول.
ايتا كەتسەك, اكتسياعا بارلىق نيەت بىلدىرۋشىلەر قاتىسا الادى. ول ءۇشىن الەۋمەتتىك جەلىلەردە #republicday #مەنىڭتۋىم, #مەنىڭەلىممەنىڭتۋىم حەشتەگتەرىمەن مەملەكەتتىك تۋ اياسىندا تۇسكەن ءوز فوتوسۋرەتىڭىزدى نەمەسە وتباسىڭىزدىڭ فوتوسۋرەتىن ورنالاستىرۋ جەتكىلىكتى.
