فوتو: ۇكىمەتتىڭ ءباسپاسوز قىزمەتى
ۇكىمەت مەملەكەت باسشىسىنىڭ تاپسىرماسى بويىنشا اقمولا وبلىسىنىڭ زەرەندى اۋىلىندا قۇنى 2,1 ملرد تەڭگە بولاتىن سپورت كەشەنىن جانە تۇركىستان وبلىسىنىڭ تەمىرلان اۋلىندا 890 ملن تەڭگە سوماعا مۋزىكا مەكتەبىن سالۋ جونىندەگى العاشقى ەكى الەۋمەتتىك جوبانى ىسكە اسىرۋعا ارناۋلى مەملەكەتتىك قوردان قاراجات ءبولۋ تۋرالى شەشىم قابىلدادى.
ماسەلەن, اقمولا وبلىسىنىڭ زەرەندى اۋىلىندا ءبىر اۋىسىمدا 80 ادامدى قابىلدايتىن سپورت كەشەنىن سالۋ جوسپارلانىپ وتىر. نىسان بەلسەندى تۇرعىندارعا بوس ۋاقىتىتىن ءتيىمدى وتكىزۋگە مۇمكىندىك بەرەدى – اۋداندا 14,5 مىڭنان استام ادام جۇيەلى تۇردە سپورتپەن شۇعىلدانادى. جوباعا سايكەس, ورتالىق – كۇرەس, بوكس, شاڭعى تەبۋ سىندى سپورت تۇرلەرىمەن اينالىسۋ ءۇشىن جابدىقتالىپ, 2 جاتتىعۋ زالى قاجەتتى قۇرال-جابدىقتارمەن قامتىلادى. سونداي-اق كەشەندە سپورتشىلاردى جاتتىقتىرۋ مەن ساۋىقتىرۋ جۇمىستارىن ساپالى ءارى ءتيىمدى جۇزەگە اسىرۋ ءۇشىن قاجەتتى قۇرال-جابدىق جانە باسقا دا قوسالقى ءۇي-جايلار قاراستىرىلعان.
تۇركىستان وبلىسىنداعى تەمىرلان اۋلىندا 300 ورىندىق جاڭا ونەر مەكتەبىن سالۋ جوسپارلانىپ وتىر. 1974 جىلى قابىرعاسى كاركاستان سالىنعان قازىرگى عيمارات زاماناۋي سانيتارلىق جانە ءورت قاۋىپسىزدىگى تالاپتارىنا سايكەسپەگەندىكتەن, كۇردەلى جوندەۋگە جارامايدى. سوعان قاراماستان بۇگىندە كەشەن جۇمىس ىستەپ تۇر – ورتالىقتا 420-عا دەيىن بالا وقيدى, بۇل ونىڭ قازىرگى قابىلداۋ مۇمكىندىگىنەن 2 ەسەگە ارتىق, 45 مۇعالىم ساباق بەرەدى. جاڭا جوبا اۋىلدا ونەر سالاسىندا قوسىمشا ساپالى ءبىلىم الۋعا جاعداي جاسايدى. بالالار جايلى ورتادا مۋزىكامەن, حورەوگرافيامەن اينالىسۋعا مۇمكىندىك الادى.
زاڭسىز يەمدەنىلگەن اكتيۆتەردى مەملەكەتكە قايتارۋ ماسەلەلەرى جونىندەگى كوميسسيانى پرەمەر-مينيستر باسقارادى, جۇمىس ورگانى – باس پروكۋراتۋرانىڭ اكتيۆتەردى قايتارۋ جونىندەگى كوميتەتى.
