بيزنەس فورۋم الاڭىندا وتاندىق وندىرۋشىلەر وزدەرى شىعاراتىن ترانسفورماتور, كابەل, حيميا, مۇناي ءوندىرۋ ونىمدەرىنىڭ تۇرلەرىنەن كورمە ۇيىمداستىردى. قمگ ەنشىلەس كاسىپورىندارىنىڭ وكىلدەرى وندىرىستە پايدالانىلاتىن يمپورتتىق جابدىقتار مەن تاۋارلاردىڭ وتاندىق ونىممەن تولىعىمەن نە ءىشىنارا اۋىستىرۋعا بولاتىن ۇلگىلەرىن كورسەتتى.
ايماق باسشىسى نۇرداۋلەت قيلىباي فورۋمنىڭ ءوڭىر ەكونوميكاسىنا وڭ اسەرىن تيگىزەتىنىنە سەنىم ءبىلدىرىپ, بۇل جوبالار ارقىلى جاڭا جۇمىس ورىندارى اشىلىپ, ءوڭىردىڭ الەۋمەتتىك, ەكونوميكالىق دامۋىنا ۇلەس قوسىلاتىنىن اتاپ ءوتتى.
– بۇل ءىس-شارا ءبىزدىڭ وڭىردە ەرەكشە ماڭىزعا يە. وسىنداي اۋقىمدى فورۋمدى وتكىزگەندەرىڭىزگە شىنايى العىسىمدى بىلدىرەمىن. ويتكەنى بۇل ءوڭىر ەكونوميكاسىنىڭ دامۋىنا جاڭا سەرپىن بەرەتىنىنە سەنىمىم مول. ەڭ باستىسى, بۇل جوبالار جاڭا جۇمىس ورىندارىن اشىپ, حالىققا الەۋمەتتىك, ەكونوميكالىق تۇرعىدا پايدا اكەلەدى دەپ ۇمىتتەنەمىز. مەملەكەت باسشىسى جولداۋىندا, باسقا دا القالى جيىنداردا وڭىرلىك ونىمدەردى كوبەيتۋ مەن ەكونوميكالىق الەۋەتتى ارتتىرۋ قاجەتتىگىن ۇنەمى اتاپ وتەدى. ەلىمىزدە ءوز ءىسىنىڭ شەبەرلەرى جەتكىلىكتى, ولاردىڭ اراسىندا الەمنىڭ دامىعان ەلدەرىندە ءبىلىم الىپ كەلگەن ماماندار دا بار. سوندىقتان بارلىق مۇمكىندىكتى ءتيىمدى پايدالانىپ, ءوز تاراپىمىزدان بۇل باستامالاردى قولداپ, قاجەتتى كومەكتى كورسەتۋگە دايىنبىز, – دەدى نۇرداۋلەت قيلىباي.
«قازمۇنايگاز» ۇك» اق باسقارما توراعاسى اسحات حاسەنوۆ مۇناي-گاز سالاسىنداعى جەرگى-لىكتى وندىرىستەردى ىنتالاندىرۋدىڭ ماڭىزىن اتاپ ءوتتى. ايتۋىنشا, «قازمۇنايگازدىڭ» ءىرى جوبالارىنا وتاندىق وندىرۋشىلەردىڭ قاتىسۋى ەل ەكونوميكاسىنىڭ دامۋىندا شەشۋشى ءرول اتقارىپ, جاڭا جۇمىس ورىندارىن اشۋعا, نارىقتا وتاندىق ءونىمنىڭ باسەكەگە قابىلەتتى بولۋىن ارتتىرۋعا ىقپال ەتەدى.
فورۋم بارىسىندا «وزەنمۇنايگاز» اق, مۇنايلى اۋدانىنىڭ اكىمدىگى, «KazPetroDrilling» اق اراسىندا ماڭعىستاۋ وبلىسىندا بولات قۇيۋ ءوندىرىسىن اشۋ تۋرالى مەموراندۋمعا قول قويىلدى. مەموراندۋمنىڭ ماقساتى – جوبانى بىرلەسىپ ىسكە اسىرۋ ماقساتىندا قولداۋ كورسەتۋ, جوبانى شيكىزاتپەن قامتاماسىز ەتۋ. فورۋم اياسىندا قول جەتكەن تاعى ءبىر جاڭالىق – «قازمۇنايگازدىڭ» ەنشىلەس كاسىپورىندارى وتاندىق وندىرۋشىلەرمەن وفتەيك-كەلىسىمشارتتار جاساستى. قول قويىپ, قول الىسقان مەموراندۋمداردىڭ جۇزەگە اسىپ, ەل يگىلىگىنە جاراۋى – ماڭىزدى قاجەتتىلىك.
ماڭعىستاۋ وبلىسى
