الماتى قالالىق قوعامدىق دامۋ باسقارماسىنىڭ مەملەكەتتىك الەۋمەتتىك تاپسىرىسى نەگىزىندە «جاناشىر» حالىقارالىق قوعامدىق قورى جۇرگىزىپ وتىرعان جوبا شەڭبەرىندە جوعارى وقۋ ورىندارىنىڭ ستۋدەنتتەرى اراسىندا, سونداي-اق ساۋدا نۇكتەلەرى مەن مەكەمەلەردەگى تۇتىنۋشىلار اراسىندا وقىتۋ, ۇيرەتۋ دارىستەرى ۇيىمداستىرىلىپ كەلەدى.
جوبا الەۋمەتتىك جەلىلەردە «تۇتىنۋشى – پوترەبيتەل» اتتى بەلسەندى اقپاراتتىق پاراقشالارى ارقىلى, وعان ساۋدا نۇكتەلەرىندە تۇتىنۋشىلاردىڭ قۇقىقتارىن قورعاۋ سالاسىنداعى جاڭا زاڭناما بويىنشا كەڭەس بەرەتىن ءموبيلدى زاڭ قىزمەتى ارەكەت ەتكەن.
«جوبا اياسىندا زاڭگەرلەردىڭ قاتىسۋىمەن ءموبيلدى توپ الماتىنىڭ بارلىق اۋداندارىنداعى ساۋدا ورىندارىندا 1 مىڭنان استام ادامعا كەڭەس بەردى. 1 مىڭنان استام ستۋدەنت جوعارى وقۋ ورىندارى مەن كوللەدجدەردە قوناق دارىستەرىنە قاتىستى. الەۋمەتتىك جەلىلەردە 300-گە جۋىق اقپاراتتىق ماتەريالدار ورنالاستىرىلىپ, مەترولاردا, ۋنيۆەرسيتەتتەر مەن مەديتسينا مەكەمەلەرى سياقتى جەرلەردە قازاق جانە ورىس تىلدەرىندە تۇتىنۋشىلاردىڭ قۇقىقتارىن قورعاۋ بويىنشا بەينەروليكتەر كورسەتىلدى. باق وكىلدەرى ءۇشىن دەپارتامەنت باسشىلىعىنىڭ قاتىسۋىمەن بريفينگ وتكىزىلدى. ازاماتتاردىڭ تۇتىنۋشى رەتىندەگى قۇقىقتارى تۋرالى حاباردار بولۋ دەڭگەيىن باعالاۋ ءۇشىن شامامەن 1,5 مىڭ ساۋالناما جۇرگىزىلدى. بۇل تاقىرىپ وتە وزەكتى بولىپ قالا بەرەدى جانە حالىقتىڭ ءوز قۇقىقتارى تۋرالى ءبىلىم دەڭگەيىن ارتتىرۋ ءۇشىن جۇمىستى جالعاستىرۋ قاجەت», دەدى جوبا جەتەكشىسى, «جاناشىر» حالىقارالىق قوعامدىق قورىنىڭ پرەزيدەنتى جاڭىل اپەتوۆا.
الماتى قالاسى قوعامدىق دامۋ باسقارماسى باسشىسىنىڭ ورىنباسارى باعداۋلەت ساريەۆ بولاشاقتا وسى جوبانى ودان ءارى كەڭەيتۋ جوسپارلانىپ وتىرعانىن ايتادى.
سونداي-اق دوڭگەلەك ۇستەلدە الماتى قالالىق ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى نۇرلان ابديەۆ مەكەمە جۇمىسىنىڭ 9 ايداعى جۇمىسىنا ەسەپ بەرىپ, ازاماتتاردان كەلىپ تۇسكەن وتىنىشتەر تۋرالى باياندادى.
الماتى قالاسى مەملەكەتتىك قىزمەت ىستەرى اگەنتتىگى دەپارتامەنتىنىڭ باسقارما باسشىسى ماقسات جانبىرشيەۆ ازاماتتار مەملەكەتتىك قىزمەتتەردى الۋ كەزىندە ولاردىڭ قۇقىقتارى بۇزىلعان جاعدايدا ولاردىڭ ۆەدومستۆولارىنا جۇگىنە الاتىنىن ەسكە سالدى.
حالىقارالىق قۇقىق قورعاۋ ورتالىعىنىڭ باسشىسى ءجاندىلدا جاقىپوۆ تۇتىنۋشىلاردىڭ قۇقىقتارىن بۇزۋشىلىقتاردى سوتقا دەيىن رەتتەۋ ءۇشىن مەدياتسيالىق ۇيىمدارعا جۇگىنۋ قاجەتتىگىن اتاپ ءوتتى. ەلدە جۇزدەن استام مەدياتورلىق ۇيىمدار جۇمىس ىستەيدى, بىراق كوپتەگەن تۇتىنۋشىلار بۇل مۇمكىندىكتى ءالى دە بىلمەيدى دەيدى.
الماتى
