كۇرەس تۇرلەرىنەن الەم چەمپيوناتىندا بەلدەسەتىن بالۋاندار انىقتالدى

الدىمەن 23 جاسقا دەيىنگى پالۋاندار بوزكىلەمدە بەلدەسەدى. ودان كەيىن ەرەسەكتەر وليمپيادالىق ەمەس سالماقتاردا باق سىنايدى. 

وليمپيادالىق ەمەس سالماقتارداعى العاشقى جاھاندىق باسەكە 2016 جىلدىڭ 8-11 جەلتوقسانىندا ماجارستاننىڭ بۋداپەشت قالاسىندا ءوتتى. وعان قازاقستان قۇراماسىنىڭ التى پالۋانى قاتىسىپ, ءبىر كۇمىس جانە ءبىر قولا مەدال جەڭىپ العان.
ەركىن كۇرەستەن نۇرلان بەكجانوۆ (70 كگ) كۇمىس جۇلدەگەر اتانسا, ايەلدەر كۇرەسىنەن ايىم ءابدىلدينا (55 كگ) قولا مەدال يەلەندى. 2020 جىلى وتۋگە ءتيىس بولعان جاھاندىق دودا پاندەمياعا بايلانىستى وتپەي قالعان ەدى.

وليمپيادالىق ەمەس سالماقتارداعى الەم چەمپيوناتى وليمپيادا باعدارلاماسىنا ەنبەي قالعان ءتورت سالماق دارەجەسىندە وتكىزىلەدى. اتاپ ايتقاندا, ەركىن كۇرەس شەبەرلەرى 61, 70, 79, 92 كگ, ايەلدەر كۇرەسى وكىلدەرى 55, 59, 65, 72 كگ جانە گرەك-ريم كۇرەسى پالۋاندارى 55, 63, 72, 82 كگ سالماقتاردا بەلدەسەدى. بۇل باعىتتاعى سايىستار وسى سالماقتاعى پالۋانداردىڭ جارىسسىز قالماۋى ءۇشىن ۇيىمداستىرىلادى. سوندىقتان وليمپياداعا قاتىسقان پالۋاندار بۇل الەم چەمپيوناتىندا بوزكىلەمگە شىعا المايدى

ەرەسەكتەر اراسىنداعى الەم چەمپيوناتى 28 قازاندا باستالىپ, 31 قازاندا مارەسىنە جەتەدى. فينالدىق باسەكەلەر 29 قازان (گرەك-ريم), 30 قازان (ايەلدەر كۇرەسى) جانە 31 قازان (ەركىن كۇرەس) كۇندەرىنە جوسپارلانعان.

قازىرگى تاڭدا الەم چەمپيوناتىنا قاتىساتىن قازاقستان ۇلتتىق قۇراماسىنىڭ پالۋاندارى انىقتالىپ, جارىسقا قارقىندى دايىندالىپ جاتىر.

البانياداعى الەم چەمپيوناتىندا سىنعا تۇسەتىن پالۋاندار: 
 
گرەك-ريم كۇرەسى:
55 كگ: يسحار قۇرباەۆ
63 كگ: ەرجەت جارلىقاسىن
72 كگ: مەيىرجان شەرماحانبەت
82 كگ: ەۆگەني پوليۆادوۆ
 
ايەلدەر كۇرەسى:
55 كگ: ءزۇلفيا ياحياروۆا
59 كگ: ديانا قايۋموۆا
65 كگ: يرينا كازيۋلينا
72 كگ: ءجاميلا باقبەرگەنوۆا
 
ەركىن كۇرەس:
61 كگ: اسىل ايتاقىن
70 كگ: نۇرعوجا قايپانوۆ
79 كگ: داۋلەت ەرگەش
92 كگ: نۇرداۋلەت بەكەنوۆ