فوتو: dalanews.kz
تەرگەلگەن قارجى پيراميدالارى الاياقتىق سحەمالارى ارقىلى 21,5 مىڭعا جۋىق سالىمشىنى الداپ سوققان. ولاردان 12 ملرد تەڭگە وندىرىلگەن.
ماسەلەن, الماتىدا «HitBeatMusic» قارجى پيراميداسىن قۇرۋ جانە باسقارۋ فاكتىسى بويىنشا سوتقا دەيىنگى تەرگەۋ اياقتالدى.
الاياقتار وزدەرىن كانادالىق كومپانيانىڭ اكتسيونەرى جانە يەسى رەتىندە تانىستىرىپ, مۋزىكالىق ينۆەستيتسيالىق جوبا قىزمەتىنە ءىس جۇزىندە قاتىسى جوق كومپانيانىڭ اكتسيالارىن ساتۋمەن اينالىسقان.
وسىلايشا, سالىمشىلاردىڭ قاراجاتىن تارتىپ, ەنگىزىلگەن سومانىڭ 10-نان 15%-نا دەيىن پايداسىن ۋادە ەتكەن. بۇل الاياقتىق توپ سالىمشىلارعا 255 ملن تەڭگە كولەمىندە زالال كەلتىرگەن.
سوت ۇكىمىمەن «HitBeatMusic» قارجى پيراميداسىن قۇرعاندار كىنالى دەپ تانىلىپ, 5 جىلدان 6 جىلعا دەيىنگى مەرزىمگە باس بوستاندىعىنان ايىرىلدى.
اگەنتتىك قارجى پيراميدالارىنىڭ بەلگىلەرى بار 10,5 مىڭنان اسا سايت سىلتەمەلەرىن بۇعاتتاعان. سونداي-اق «WhatsApp», «Telegram» جانە «Instagram»-دا 292 چات بۇعاتتالعان. وسىلايشا, 2 ملن-نان استام الەۋەتتى سالىمشىلاردىڭ قارجىلىق شىعىندارىنىڭ الدىن الدى.
«قارجى پيراميدالارىنا قارسى ءىس-قيمىل» ارنايى جوباسى جۇزەگە اسىرىلا باستاعاننان بەرى «Qnet», «World Business Consulting», «Finiko» «Antares»/«Antares Trade», «Sincere Systems Group»/«S-Group», «Hermes LTD», «Life is good», «Chia Tai Tianding»/«Chia Tai Pharmaceutical» «Energy Eolus Oazqstan»/«Eolus» سياقتى ەلدە جۇمىس ىستەيتىن قارجى پيراميدالارىنىڭ قۇرىلىمدىق بولىمشەلەرىنىڭ ۇيىمداستىرۋشىلارى جاۋاپكەرشىلىككە تارتىلدى.
