مەملەكەتتىك قىزمەتتىڭ جوسپارىن تانىستىردى

سەنات دەپۋتاتتارى, پارلامەنتا­ريزم ينستيتۋتى, ۇلتتىق ەكونوميكا, تسيفر­لىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى دوڭگەلەك ۇستەل باسىندا مەملە­كەت باسشىسىنىڭ جولداۋىن ىسكە اسىرۋ اياسىندا مەملەكەتتىك قىزمەتتىڭ جەتىستىگىنە توقتالدى.

سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى نۇرلان بەكنازاروۆ ءتيىمدى مەملەكەتتىك قىزمەتتىڭ ەلدىڭ الەۋمەتتىك-ەكونوميكالىق دامۋى مەن ازاماتتاردىڭ ءال-اۋقاتىن ارتتىرۋدا ماڭىزدى ءرول اتقاراتىنىن اتاپ ءوتتى.

ال مەملەكەتتىك قىزمەت ىستەرى اگەنت­تىگىنىڭ توراعاسى دارحان جازىقباي پرەزيدەنت جارلىعىمەن بەكىتىلگەن مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىم­داماسىنىڭ نەگىزگى مىندەتتەرى جانە ولاردى جۇزەگە اسىرۋ جوسپارلارىمەن تانىس­تىردى. ولار مەملەكەتتىك قىزمەتتى ادامعا باعدارلانعان جانە سەرۆيستىك سيپاتتا ىلگەرىلەتۋدى, مەملەكەتتىك اپپاراتتى كاسىبيلەندىرۋدى, ادام رەسۋستارىن باسقارۋ ۇدەرىستەرىن تسيفرلاندىرۋدى قامتيدى.

اگەنتتىك توراعاسى مەملەكەتتىك قىز­مەتتە يننوۆاتسيالىق HR قۇرالدارىن, ساتىلاس مانساپتىق ىلگەرىلەتۋ تەتىكتەرىن ەنگىزۋ, مەكتەپ جانە جوعارى وقۋ ورىندارى دەڭگەيىندە ەرتە كاسىپتىك باعدارلاۋدى قولعا الۋ, جاۋاپتى لاۋازىمدارعا روتاتسيانى كەڭەيتۋ, مەملەكەتتىك قىزمەتشىلەرگە الەۋمەتتىك كەپىلدىكتەردى جاقسارتۋ قاراس­تىرىلاتىنىن ايتتى.

– مەملەكەتتىك قىزمەتتى دامىتۋدىڭ جاڭا تۇجىرىمداماسى «ەڭ الدىمەن ادام» قاعيداسى نەگىزىندە مەم­لە­­كەتتىك قىزمەتتى زامان تالابىنا ساي جەتىل­دىرۋگە باعىتتالىپ وتىر. مەم­لە­كەت­تىك قىزمەت اكىمشىلىك راسىم­دەردى جۇزەگە اسىرۋ عانا ەمەس, ول ەڭ الدىمەن مەملەكەتتىك قىزمەتشىنىڭ قوعام الدىندا جاۋاپكەرشىلىكتى سەزىنىپ, زاڭ مەن تارتىپكە باعىنا وتىرىپ قىزمەت ەتۋى, – دەدى د.جازىقباي.

ايتا كەتسەك, بىلتىر اگەنتتىك مەم­لەكەتتىك قىزمەتتى تسيفرلاندىرۋعا قاتىستى جوسپارلارىمەن تانىستىرعان ەدى. اگەنتتىك توراعاسىنىڭ ايتۋىنشا, كەيىنگى جىلدارى وسى باعىتتا جۇيەلى جۇمىس اتقارىلدى. مەملەكەتتىك قىزمەتكە كىرۋ ۇدەرىسىندەگى بيۋروكراتيا قىسقارتىلىپ, كادرلاردى ىرىكتەۋدىڭ جاڭا اۆتوماتتاندىرىلعان جۇيەسى ەنگىزىلگەن. ناتيجەسىندە, ۇمىتكەرلەردىڭ مەملەكەتتىك قىزمەتكە قابىلداۋدىڭ اشىقتىعى مەن ادىلدىگىنە دەگەن سەنىمى ۇلعايىپ, كونكۋرسقا قاتىساتىن كاندي­داتتاردىڭ سانى ەكى ەسەگە ارتقان. ماسە­لەن, ازاماتتاردىڭ قايتا تەست تاپسى­رۋ مەرزىمى 5 ەسەگە – 15 كۇننەن 3 كۇنتىز­بەلىك كۇنگە ازايعان. مەملەكەتتىك قىزمەتكە ورنالاسقىسى كەلەتىن ازامات­تار بۇعان دەيىن وبلىس نەمەسە قالا ورتالىعىنداعى تەستىلەۋ زالدارىنا بارىپ تەست تاپسىراتىن. قازىرگى جاڭا ىرىك­تەۋ جۇيەسىندە ۇمىتكەرلەر 24/7 فور­مات­تا ونلاين, الەمنىڭ كەز كەلگەن جەرى­نەن تەست تاپسىرا الادى. بۇعان قوسا كون­كۋرس قورىتىندىسىن ادام فاكتورىنسىز پلاتفورما بارلىق ىرىكتەۋ كەزەڭىنىڭ ناتيجەسىن اۆتوماتتى تۇردە ءوزى ەسەپتەيدى. سونىمەن قاتار جەكە جانە كۆازيسەكتور كانديداتتارىنا جاڭا بىلىكتىلىك تالاپتارى ەنگىزىلىپ, ولاردىڭ سالالىق تاجىريبەسى مەملەكەتتىك قىزمەت تاجىريبەسىنە تەڭەستىرىلدى.

– ءارتۇرلى سالادان بىلىكتى مامانداردى كونكۋرستان تىس اكىمشىلىك مەم­لەكەتتىك قىزمەتتىڭ باسشىلىق لاۋا­زىمدارىنا بىردەن تاعايىنداۋ ينستيتۋتى ەنگىزىلىپ وتىر. قازىرگى ۋاقىتتا وسى تارتىپپەن 550-دەن اسا مامان اگەنتتىكپەن كەلىسۋ ارقىلى تاعايىندالدى. بىلتىر قابىلداعان زاڭعا ەنگىزىلگەن وزگەرىستەرگە سايكەس, وڭىرلىك كادرلىق رەزەرۆتەرى قالىپتاستىرىلىپ, وقۋ ورنىن ۇزدىك بىتىرگەن جاس تۇلەكتەرگە قىزمەتكە كونكۋرسسىز ورنالاسۋ مۇمكىندىگى بەرىلگەن ەدى. وسى ورايدا زاڭ كۇشىنە ەنگەن ۋاقىتتان بەرى 380-نەن اسا تۇلەك كونكۋرس­تان تىس, اۋداندىق, اۋىلدىق دەڭگەيدەگى باستاپقى لاۋازىمدارعا تاعايىندالدى. وڭىرلىك كادرلىق رەزەرۆتەرگە 505 ادام ىرىكتەلىپ الىندى, – دەدى د.جازىقباي.

ءىس-شارادا دەپۋتاتتارعا مەملەكەتتىك قىزمەتتىڭ تارتىمدىلىعىن ارتتىرۋعا مۇمكىندىك بەرگەن «eQyzmet» جۇيەسىن­دەگى مەملەكەتتىك قىزمەتكە ىرىكتەۋ راسىم­دەرىن تسيفرلاندىرۋ, كادرلىق بيزنەس-ۇدەرىستەردى وڭتايلاندىرۋ جۇمىستارى تانىستىرىلدى.