قوردىڭ قايىرىمدىلىق وپەراتورى «Samruk-Kazyna Trust» كق باس ديرەكتورى الفيا اديەۆانىڭ ايتۋىنشا, كىتاپحانا وسىنداي سيپاتتاعى العاشقى, جالعىز مادەني مەكەمە بولماق. اۋماعى مىڭ شارشى مەترگە جۋىقتايتىن عيمارات جىلىنا 1000 وقىرمانعا قىزمەت كورسەتە الادى.
بارلىق تۇرعىدا قازىرگى زامان تالاپتارىنا ساي ارنايى كىتاپحانادا برايل قارپىندەگى كىتاپتار مەن دىبىستالاتىن ادەبيەتتەن تىس, «برايليست», «جەدەل كومەكشى», «تيفلوكومپ» ۇيىرمەلەرىندە نۇسقاۋشى ماماندار ءبىلىم بەرۋ قىزمەتىمەن اينالىسادى دەپ كۇتىلىپ وتىر. سونداي-اق جاڭا رۋحاني وشاقتا كوۆوركينگ-ورتالىق شىعارماشىلىق سۇحبات اياسىندا ءتۇرلى جاس شاماسىنداعى ادامداردىڭ, ونىڭ ىشىندە جاستاردىڭ باسىن قوسادى.
ەسكە سالا كەتسەك, بۇعان دەيىن «اباي وبلىسىنىڭ كىتاپحانالارىن جاڭعىرتۋ» جوباسى اياسىندا قور تاراپىنان سەمەي قالاسىنىڭ قازىرگى جۇمىس ىستەپ تۇرعان زاعيپ, ناشار كورەتىن ازاماتتارعا ارنالعان ەسكى كىتاپحاناسىنا ارنايى تەحنيكالىق قۇرال-جابدىق تابىستالىپ, اباي اتىنداعى وبلىستىق امبەباپ كىتاپحانادا زاماناۋي قوعامدىق كەڭىستىك اشىلدى.
زاماناۋي كىتاپحانالار ونىڭ ماتەريالدىق-تەحنيكالىق جاي-كۇيى, كوۆوركينگ ايماقتارىنىڭ قىزمەتى حالىق سۇرانىسىنا سايكەس بولۋى قاجەت. سوندىقتان جوبانىڭ نەگىزگى ماقساتى – ءبىلىم بەرۋدىڭ زاماناۋي ينتەراكتيۆتى, كوممۋنيكاتيۆتى تۇرلەرىن قۇرۋ ارقىلى وقىرمانداردىڭ زياتكەرلىك دەمالىسقا دەگەن قىزىعۋشىلىعىن ارتتىرۋ.
«جوبا اياسىندا سەمەي قالاسىنىڭ كىتاپحانالارىنا قايىرىمدىلىق كومەك كورسەتىلىپ كەلەدى. اباي اتىنداعى وبلىستىق امبەباپ كىتاپحانادا بارلىق قالا تۇرعىنىنا, بالالارعا ارنالعان تەگىن قوعامدىق يننوۆاتسيالىق روبوتتەحنيكا زەرتحاناسى, كوۆوركينگ-وقۋ زالى مەن ويىن-شىعارماشىلىق الاڭى اشىلدى. ال ناشار كورەتىن ازاماتتارعا ارنالعان كىتاپحانا ەندى ءوز وقىرماندارىنا بەدەرلى-نۇكتەلى قارىپپەن كىتاپ شىعارۋعا, قىزمەتتەردىڭ كەڭەيتىلگەن اۋقىمىن كورسەتۋگە, باسقا دا جەرلەردە ءىس-شارالار وتكىزۋگە قاۋقارلى», دەيدى جوبانى ىسكە اسىرۋ تاپسىرىلعان «كەمەلدى قادام» قق-نىڭ توراعاسى گاۋھار كارمەنوۆا.
بۇگىندە وبلىستىق كىتاپحانا ەرەسەك وقىرمانداردى ەسەپتەمەگەندە 2500-دەن استام بالاعا قىزمەت كورسەتە الادى.
«كىتاپحانانى جاڭعىرتۋ ناتيجەسىندە بالالار مەن جاسوسپىرىمدەردىڭ زياتكەرلىك دامۋىنا, ولاردىڭ مادەني بوس ۋاقىتىن ءتيىمدى وتكىزۋىنە, شىعارماشىلىق جوسپارلار مەن كرەاتيۆتى يدەيالاردى جۇزەگە اسىرۋىنا ارنالعان جاڭا, تارتىمدى كەڭىستىك پەن الاڭ پايدا بولدى. جاڭا ورتا جاس وقىرمانداردىڭ وزدىگىنەن ءبىلىم الۋىنا, كىتاپقا, شىعارماشىلىققا دەگەن قىزىعۋشىلىقتارىن ارتتىرۋعا سەپتىگىن تيگىزەتىنى انىق», دەيدى وبلىستىق اباي اتىنداعى امبەباپ كىتاپحاناسىنىڭ ديرەكتورى مەرەي قارت.
ازىرگە ەسكى عيماراتتاعى ارنايى كىتاپحانا بۇگىندە 1000-عا جۋىق وقىرمانعا قىزمەت كورسەتەدى.
«كىتاپحانامىزدى جاڭا زاماناۋي جابدىقتارمەن جاڭارتۋدىڭ ماڭىزدىلىعى وراسان زور. برايل جۇيەسىمەن قۇجاتتاردى, كىتاپتاردى شىعارۋعا ارنالعان جابدىقتاردىڭ جيىنتىعى بىزگە ەرەكشە قۇندى. ەندى بالالارعا بەدەرلى-نۇكتەلى قارىپپەن مەملەكەتتىك تىلدەگى تانىمال بالالار ادەبيەتىن وقۋعا مۇمكىندىك جاساي الامىز», دەيدى ارنايى كىتاپحانا ديرەكتورى گۇلنار گافياتۋللينا.
الدابەرگەن كەمپىرباي
