بورودۋليحا اۋدانى نوۆوپوكروۆكا اۋىلىندا ۇيىمداستىرىلعان سەنبىلىكتە جەرگىلىكتى تۇرعىندار مەن مەكەمە, كاسىپورىن وكىلدەرى جۋرا وزەنىنىڭ ارناسىن قالىڭ قامىستان تازارتىپ, سۋ اعىنىن جاقسارتۋعا, كوكتەمگى سۋ تاسقىنى قاۋپىن ازايتۋعا اتسالىستى. اكتسياعا تەك جەرگىلىكتى تۇرعىندار عانا ەمەس, بيۋدجەتتىك مەكەمەلەردىڭ قىزمەتكەرلەرى, ستۋدەنتتەر مەن وقۋشىلار قاتىستى. نوۆوپوكروۆكا اۋىلدىق وكرۋگى اقساقالدار كەڭەسىنىڭ توراعاسى اناتولي رومانوۆ مۇنداي ءىس-شارالاردىڭ قوعامدىق ءمان-ماڭىزىنا توقتالىپ, تۋعان جەرگە قامقورلىق جاساۋ ءار ادامنىڭ مىندەتى ەكەنىن باسا ايتتى.
ءدال وسىنداي ءىس-شارا ماقانشى, ءۇرجار, جارما, اقسۋات, اباي, كوكپەكتى, اياگوز اۋداندارىندا دا ءوتىپ, ساياباقتاردىڭ ءسانى كىرىپ, قوعامدىق ورىندار قوقىستان تازارتىلدى. ءىس-شارا بارىسىندا بەسقاراعاي اۋدانىنىڭ ورتالىعىندا جاڭا ساياباقتىڭ قۇرىلىسى دا اياقتالدى. ساياباقتا بالالار ويىن الاڭى, LED-ەكران, ساحنا, تەننيس, شاحمات ۇستەلدەرى ورىن العان. 150 قاراعاي مەن شەتەن اعاشتارى وتىرعىزىلىپ, 42 شام ورناتىلدى.
اباي وبلىسى اكىمىنىڭ ءباسپاسوز قىزمەتى ۇسىنعان دەرەككە سۇيەنسەك, «تازا قازاقستان» باعدارلاماسى جۇزەگە اسىرىلا باستاعاننان بەرى اكتسياعا وبلىستا 100 430 ادام, ونىڭ ىشىندە 3 626 ۇيىم مەن مەكەمە وكىلدەرى ارالاسقان. جۇمىسقا 2 087 بىرلىك تەحنيكا جۇمىلدىرىلدى. ناتيجەسىندە, 99 023 اۋلا تازالانىپ, 55 131 توننا قاتتى تۇرمىستىق قالدىق قوقىس پوليگوندارىنا جەتكىزىلدى. وبلىس كولەمىندە 239 ساياباق پەن سكۆەر تازارتىلىپ, 313 ەسكەرتكىشتىڭ اينالاسى اباتتاندىرىلدى, 741 شارشى مەتر تاسجول جوندەلدى. سەنبىلىكتەرگە 1 077 الەۋمەتتىك, 2 261 وندىرىستىك نىسان, سونداي-اق 934 جاساندى سۋ قويماسى قامتىلدى.
سەمەي قالاسىندا «تازا قازاقستان» اكتسياسى اياسىندا كەيىنگى وتكىزىلگەن سەنبىلىككە 8000-نان استام قالا تۇرعىنى قاتىستى. سەنبىلىك بارىسىندا قالا اۋماعى 14 ۋچاسكەگە ءبولىنىپ, ءار ۋچاسكەگە سەمەي قالاسى اكىمدىگىنىڭ دەربەس بولىمدەرى باقىلاۋ جاسادى. قالانىڭ ءتۇرلى شاعىن اۋداندارىندا, كوشە, اۋلالارىندا قوقىس جيناۋ, جاسىل اۋماقتاردى اباتتاندىرۋ, تازالاۋ جۇمىسى جۇرگىزىلدى.
اباي وبلىسى
