25 مينۋتتىق 16 سەريادان تۇراتىن تەلەحيكايادا قازاقستاننىڭ ۇزدىك مەكتەپتەرىنىڭ ءبىرى – IQanat-قا وقۋعا تۇسكەن اۋىل بالاسىنىڭ ءومىرى سۋرەتتەلەدى. وقيعا سيۋجەتى ونىڭ ماماندىق تاڭداۋ تۋرالى شەشىمىنىڭ اينالاسىندا قۇرىلعان, بۇل اۋىل بالالارى ءۇشىن ءبىلىم الۋ مۇمكىندىگىنىڭ ماڭىزىن ايشىقتايدى.
تەلەحيكايا IQanat جوباسىنىڭ سەرىكتەسى – «QAZAQSTAN» تەلەارناسى ارقىلى كورسەتىلەدى دەپ جوسپارلانعان. سوندىقتان, سەريالدى كەز-كەلگەن ادام تاماشالاي الادى.
جوبانىڭ ەرەكشەلىگى – وعان قاتىسقان اكتەرلەردىڭ 99%-ىن كاسىبي كينو ونەرىندە ەشقانداي تاجىريبەسى جوق بالالار, IQanat تاربيەلەنۋشىلەرى قۇرادى. وعان قوسا, حيكايا كورىنىستەرىنە مەكتەپتىڭ وقىتۋشىلارى, جۇمىسشىلارى, سونداي-اق, وتكەن جىلدارداعى مەكتەپ تۇلەكتەرى تۇسكەن. ءتۇسىرىلىم جۇمىستارى بۋرابايداعى ءبىلىم مەكەمەسىنىڭ اۋماعىندا جۇرگىزىلدى. بۇل حيكايانىڭ وقيعالارىنا ودان سايىن جان ءبىتىرىپ, كورەرمەندەردىڭ ايقاناتتىق بالالار ءبىلىم الىپ جاتقان مەكتەپتىڭ اتموسفەراسى مەن رۋحىن سەزىنۋىنە مۇمكىندىك بەرگەن.
«ەلىمىزدىڭ ءار بۇرىشىندا, ەڭ شالعاي اۋىلداردا جارقىن بولاشاق تۋرالى ارماندايتىن بالالار بار. ولار دارىگەر, عالىم, كاسىپكەر, مۇعالىم بولعاندى قالايدى. ءبىز بۇل حيكايانى وسى بالالار ءۇشىن تۇسىردىك. ءبىز بالالاردىڭ ومىردە مۇمكىن ەمەس ەشتەڭە جوق ەكەنىن جانە ءبىلىم الۋ ارقىلى ءوز تاعدىرىڭدى تۇبەگەيلى وزگەرتۋگە بولاتىنىن بىلگەنىن قالايمىز. تەلەحيكايا جانە كينو سىندى ەڭ وزەكتى اقپارات قۇرالدارى بۇگىنگى زامان بالالارىنا كوبىرەك ءۇمىت سىيلاپ, كۇش بەرەدى, ىنتالاندىرادى. ءبىز سولاردىڭ تىلىندە سويلەۋدى ءجون كوردىك. بالكىم, ءدال وسى بالالار ەرتەڭ ءبىزدىڭ مەكتەپتىڭ پارتاسىنا وتىرىپ, ءوزىنىڭ بۇگىندە قولجەتىمسىز كورىنەتىن ەڭ بيىك ارمان-ماقساتتارىنا قول جەتكىزەتىن شىعار», دەپ اتاپ ءوتتى جوبانىڭ باستاماشىسى جانە IQanat قامقورشىسى ايدىن راحيمباەۆ.
جوبانىڭ باس پروديۋسەرى ەرنار قۇرماشەۆ بولسا, رەجيسسەرى – كينوتۋىندىلارى حالىقارالىق ماراپاتتارعا يە بولىپ جۇرگەن ەرلان نۇرمۇحامبەتوۆ. حيكايانى تۇسىرۋگە «Aidyn&Anar Rakhimbayev Foundation» قورى ۇلكەن قولداۋ كورسەتتى.
تۇساۋكەسەر كەزىندە قوناقتار حيكايانىڭ ەكى سەرياسىن تاماشالاپ, ءتۇسىرۋ كومانداسىنىڭ اڭگىمەلەرىن تىڭدادى.
ەسكە سالايىق, IQanat – 150-دەن استام قازاقستاندىق كاسىپكەردىڭ قازاقستاننىڭ بارلىق وڭىرىندەگى اۋىل وقۋشىلارىن قولداۋعا ارنالعان الەۋمەتتىك-ءبىلىم بەرۋ جوباسى.
IQanat تۇلەكتەرى الەمنىڭ 17 ەلىندە ءبىلىم الۋدا.
