سۋرەتتەردى تۇسىرگەن – اۆتور
سالبۋرىن سايىن اسپان سەرىسىن قولعا قوندىرعان بابالاردىڭ كورەگەندىگىنە تاڭعالىپ, باس شايقاي بەرەمىز. ساپتاما ەتىك, قاسقىر ىشىك, كۇمىس بەلدىك تاعىپ, ءسان-سالتاناتپەن الشاڭ باسىپ كەلە جاتقان قۇسبەگىلەرگە قاراپ, كوز تويادى. بۇل بەكزات ونەرگە شەتەلدىكتەردىڭ دە تاڭ-تاماشا بولىپ جۇرگەنىن كوردىك. ايتقانداي, قۇستارىن الىپ, سوناۋ ماجارستان, قىتاي, قىرعىزستان, موڭعوليا مەملەكەتتەرىنەن دە سپورتشىلار قاتىستى. ءيا, بۇل دا – ۇلتتىق سپورتتىڭ ءبىر ءتۇرى. كەشەگى كوشپەلىلەر ويىندارىنىڭ جالعاسى ىسپەتتى.
بۇركىتتوبەنىڭ بەرگى بەتىنە وبلىستىڭ ءار اۋدانى, ءىرى مەكەمەلەرى قاز-قاتار كيىز ۇيلەرىن تىگىپ, ءىشىن اۋدانداعى ماڭدايالدى شەبەرلەردىڭ قولىنان شىققان بۇيىمدارمەن تولتىردى. قازان كوتەرىپ, اق داستارقاندارىن جايدى. كىرەبەرىسىندە كۇي كۇمبىرلەتىپ, ءان اۋەلەتتى. الاڭنىڭ قاق ورتاسىنا التى قانات اق ورداداي ۇلكەن كيىز ءۇي جانە قويىلدى. 500 ورىندىق كيىز ءۇي ىشىندە ونەرپازدار ءان سالىپ, انسۇيەر قاۋىم تامسانىپ جاتتى. سوناۋ الماتىدان نۇرلان ابدۋللين, قۋاندىق راحىم سىندى ەسترادا جۇلدىزدارى ونەر كورسەتتى.
الاڭنىڭ ءتور جاعىندا ساداقتى سانگە تارتىپ جۇرگەن سۇر مەرگەندەر دە باق سىناستى. ساياحاتشىلاردىڭ ءبىرى اتپەن سەرۋەندەسە, ەندى ءبىرى كۆادروتسيكل ءمىنىپ, بەل-بەلەستى اينالىپ كەلىپ جاتتى. سالبۋرىندا يت جۇگىرتىپ, اڭ اۋلاپ جۇرگەن ساياتشىلار دا تازىلارىنىڭ باۋىرىن ءبىر جازىپ, جارىسقا قوستى. ىرىكتەلگەن بۇركىتشىلەر شەشۋشى سايىستا قىراندارىن تۇلكىگە سالدى. تارتىستى دوداعا 80 بۇركىت, 30 سۇڭقار قاتىسقان.
«ۇلكەن ءىس-شارا بولعاندىقتان, ءبارىن دۇرىس ويلاستىرۋعا تىرىستىق. جيىرما شاقتى كيىز ءۇي قۇرىلدى. بۇركىتشىلەر بايقاۋىنا بەلگىلى كاسىپكەر مۇحتار تويبازاروۆ وزىندىك قولداۋىن كورسەتىپ وتىر. باسقا دا دەمەۋشى بولعان كاسىپكەرلەر بار. ولارعا العىس بىلدىرەمىز», دەدى شقو اكىمىنىڭ ورىنباسارى ەربول نۇرعاليەۆ.
كۇن جاڭبىرلى بولعانىمەن, جينالعان جۇرت ورتاداعى 500 ورىندىق كيىز ءۇيدى قالقالادى. كونتسەرتتىڭ سوڭى ايتىسقا ۇلاسىپ, اقىندار ساحناعا كوتەرىلگەن. بۇل ۋاقىتتا اتبەگىلەر اساۋ ۇيرەتۋدەن سىنعا ءتۇسىپ جاتتى. جىلقى دەسە دەلەبەسى قوزاتىن كورەرمەن جاۋعان جاڭبىرعا دا قاراعان جوق. قيقۋ قوسىپ, تاقىم قىسىپ تۇردى.
بيىلعى ءتۋرنيردىڭ تاعى ءبىر ەرەكشەلىگى – حالىق قۇستىڭ ۇشۋىن عانا قىزىقتاعان جوق, بۇركىتتوبەدەگى اتموسفەرانىڭ ءوزى مەرەكەلىك كوڭىل كۇي سىيلاپ تۇرعان. الايدا بۇركىتشىلەر ءۇشىن جەردىڭ گەوگرافيالىق ورنى بىرقاتار قيىندىق تۋعىزعان كورىنەدى.
«قازىر تەحنولوگيانىڭ دامىعان عاسىرى عوي. ۇيىمداستىرۋشىلار الدىن الا كۇن رايىن بولجاسا دۇرىس ەدى. بۇرىن اۋا رايىن قاريالارىمىز ايدىڭ تولعانى, ۇيىرىلگەنى, ايدىڭ توعىسۋى دەپ بولجاپ وتىرا-تۇعىن. وتكىزىلگەن ورنى دا قولايسىزداۋ. بىلتىر جەل كوتەرىپ, بۇركىتتى توقتاتپاي قويعان. بۇل جەردىڭ ءتورت قۇبىلاسىنان دا جەل سوعىپ تۇرادى. نەشە جىلدان بەرى سونى بايقادىق. سوندىقتان الداعى جىلدارى ءداستۇرلى ءتۋرنيرىمىزدىڭ ۇيىمداستىرىلۋىن قايتا ءبىر پىسىقتاۋ كەرەك», دەيدى بەلگىلى بۇركىتشى تاتتىمبەت كاپ ۇلى.
حالىقارالىق دەڭگەيدە ەكىنشى جىل ءوتىپ وتىرعان فەستيۆالدىڭ جىل سايىن سالماعى ارتىپ, كورەرمەن قاراسى كوبەيىپ كەلە جاتقانىن كوز كورىپ وتىر. ءداستۇرلى ءتۋرنيردى جىل سايىن وبلىس اكىمدىگى مەن قۇسبەگىلىك فەدەراتسياسى دا جاڭعىرتا بەرۋگە نيەتتى.
«وزدەرىڭىز بىلەسىزدەر, پرەزيدەنتىمىز كوشپەلىلەر ويىنى – كوشپەلىلەردىڭ وليمپياداسى دەدى. قۇسبەگىلەر سايىسى جوعارى دەڭگەيدە ۇيىمداستىرىلىپ جاتىر. شىعىس سالبۋرىنى – كوشپەلىلەر ويىندارىنان كەيىنگى وتە جوعارى دەڭگەيدە ۇيىمداستىرىلعان ءىس-شارا. كۇن رايىنىڭ قولايسىزدىعىنا قاراماستان, بەس مىڭعا جۋىق كورەرمەن جينالدى. شەتەلدەن كەلگەن قوناقتار ونەرىمىزگە, رۋحانياتىمىزعا ءتانتى بولىپ جاتىر. قۇسبەگىلەر اتىنان شىعىس قازاقستان وبلىسى اكىمدىگىنە ريزاشىلىعىمىزدى بىلدىرەمىز», دەدى مەملەكەت باسشىسىنىڭ كەڭەسشىسى, قۇسبەگىلىك فەدەراتسياسىنىڭ پرەزيدەنتى بەرىك ءۋالي.
ءسويتىپ, ۇلتتى ۇيىستىراتىن رۋحاني شارا سوڭىندا جۇلدەگەرلەر ماراپاتتالىپ, ۇيىمداستىرۋشىلار العىس ارقالادى. وبلىس اكىمى ەرمەك كوشەرباەۆ الىس-جاقىننان كەلگەن قوناقتارعا جىلى لەبىزىن ءبىلدىرىپ, ءىس-شارانىڭ ۇيىمداستىرىلۋىنا ۇلكەن ۇلەسىن قوسقان كاسىپكەر مۇحتار تويبازاروۆقا العىسحات تابىستادى. ال بەرىك ءۋالي شىعىس جۇرتشىلىعى اتىنان بۇركىتشى قىز ايشولپان نۇرعايىپقىزىنا ەكى بولمەلى پاتەردىڭ كىلتىن تابىستاپ قۋانتتى. مۇنداي سىيلىقتى كۇتپەگەن قۇسبەگى قىزدىڭ كوزىنەن قۋانىشتىڭ جاسى ىرشىعانى دا راس ەدى.
«مەن ءۇشىن ۇلكەن توسىنسىي بولدى. حالىققا العىسىمدى بىلدىرەمىن. ەلىمىزدىڭ ابىرويىن بيىككە كوتەرۋ جولىندا تالماي ەڭبەكتەنۋگە ءازىرمىن», دەدى ايشولپان نۇرعايىپقىزى.
قۋانىشتى ساتتەن سوڭ جۇرگىزۋشى ساحنا تورىنە كەزەك-كەزەگىمەن جۇلدەگەرلەردى شاقىردى. سونىمەن, «شىعىس سالبۋرىنى – 2024» حالىقارالىق ءتۋرنيرىنىڭ بۇركىت قۇسى بويىنشا جۇلدەلى ءۇشىنشى ورىن اقمولا وبلىسىنان كەلگەن ەرلان كەنجەتاەۆ پەن الماتى وبلىسىنان كەلگەن ولجاس بەردىمۇراتقا بەرىلدى. ەكىنشى ورىندى استانادان ات ارىتىپ كەلگەن سەرىكبەك كۇنتۋعاننىڭ بۇركىتىنە بۇيىردى. ال ءبىرىنشى ورىندى جەتىسۋلىق ءسالىمحان ەرعازى ۇلى قانجىعاعا باستى.
قارشىعا قۇسى بويىنشا ءبىرىنشى ورىن ەراسىل سەرىكبەك ۇلى (استانا قالاسى), ەكىنشى ورىن ەرمۇحان بايەتباي (الماتى وبلىسى), ءۇشىنشى ورىن باباجان بەرىكبولسىن (جامبىل وبلىسى), جاڭبىربەك بەرديارعا (جامبىل وبلىسى) بەرىلدى.
يتەلگى قۇسى بويىنشا ءبىرىنشى, ەكىنشى ورىنداردى تاڭات وسپانقۇلوۆ (قاراعاندى وبلىسى) السا, ءۇشىنشى ورىن قاراعاندىلىق تەمىرلى تولەگەن ۇلى مەن پاۆلودار وبلىسىنىڭ قۇسبەگىسى ەرمەك يمانزايىپتىڭ بۇركىتى الدى.
سايىس سوڭىندا ارقا-جارقا جۇرت ءبىر-بىرىنە قۇتتى بولسىن ايتىسىپ, ەستەلىك سۋرەتتەرگە ءتۇستى. كوشپەلىلەر ويىندارىنىڭ جالعاسىنا ۇلاسقان تۋرنير كەلەر جىلى دا جالعاسىن تاپپاق.
شىعىس قازاقستان وبلىسى,
ۇلان اۋدانى,
بوزانباي اۋىلى
