مادەني ءماجىلىس جىلقىباي جاعىپار ۇلىنىڭ ءومىر جولى باياندالعان ۆيدەو-ماتەريالدان باستالدى. جازۋشىلىقتىڭ سەرتى مەن دەرتىن ءسوز ەتكەن قالامگەردىڭ ءۇنى مۇراعات تاسپاسىنان بىلاي دەپ جاڭعىردى: «قولىما قالام ۇستاپ, جۋرناليست اتانعان وسى ءبىر جىلدار ىشىندە, جالعاندى جازعام جوق. جەكە باستىڭ مۇددەسى ءۇشىن بازبىرەۋلەردى ماقتاپ, ارزان بەدەل دە جيمادىم. قولىمداعى قارۋىم – قالامىممەن, ءتۇن ۇيقىمدى ءتورت بولگەن ازابىممەن قاراپايىم حالقىمنىڭ قاسىرەتىن ازايتىپ, قادىرىن ارتتىرۋدى ارمان ەتتىم». ونىڭ ەستەلىككە اينالعان وسى ءبىر ديدارى مەن داۋىسى كوپشىلىتىڭ كوڭىلىن بوساتتى.
ادىلەت پەن ادالدىقتى تۋ ەتكەن ازاماتتىڭ كىسىلىك كەلبەتى حاقىندا «قازاق گازەتتەرى» جشس باس ديرەكتورىنىڭ ورىنباسارى, جۋرناليست قامبار احمەتوۆ ءسوز سويلەدى.
«جىلقىباي جاعىپار ۇلى سانالى عۇمىرىن قازاق ءباسپاسوزىنىڭ ءوسىپ-وركەندەۋىنە ارنادى. ىرگەلى باسىلىمداردا جەمىستى قىزمەت ەتتى. سونىڭ ءبىرى ءوزى قىزمەت ەتكەن «Egemen Qazaqstan» گازەتى ءۇشىن ول كىسىنىڭ ورنى ەرەكشە. ونىڭ وكپەنى قىسقان وتپەلى كەزەڭدەگى جاساعان قايراتكەرلىگى ءاربىر ازاماتقا ۇلگى. اسىرەسە, اقمولا وڭىرىندەگى قازاق مەكتەپتەرىنىڭ كوبەيۋى تىكەلەي جىلقىباي جاعىپار ۇلىنىڭ ەڭبەگى دەپ بىلەمىز. ونىڭ «زار-نالا», «كەك», «قاراسارت» پوۆەستەرى – ۇلت تاعدىرىن شەبەر سۋرەتتەگەن شىعارمالار. كەلەشەكتە وسى تۋىندىلار نەگىزىندە كوركەم فيلم تۇسىرىلسە ارتىق ەتپەيدى. وعان شىعارمالاردىڭ درامالىق الەۋەتى جەتىپ-اق تۇر. ەشكىمدى جاتىرقاماي, جاتسىنباي, ءار قازاقتى باۋىرىنداي سۇيگەن جىلقىباي اعانىڭ ارلى اماناتى – بارشامىزعا ورتاق پارىز دەپ ەسەپتەيمىن», دەدى ق.احمەتوۆ.
جازۋشى ادىلبەك ىبىرايىم ۇلى اۆتوردىڭ «قاراسارت» پەن «زار-نالا» شىعارمالارىنىڭ سيۋجەتتىك قۇرىلىمىنا توقتالىپ, كوركەمدىك سيپاتىن باياندادى.
جازۋشىلار وداعىنىڭ استانا قالاسىنداعى فيليالىنىڭ ديرەكتورى داۋلەتكەرەي كاپ ۇلى جىلقىباي جاعىپار ۇلىنىڭ شىعارمالارىن ادەبيەتتانۋشىلارعا زەرتتەۋ نىسانى رەتىندە ۇسىنۋ كەرەكتىگىن جەتكىزدى.
ال «ارقا اجارى» گازەتىنىڭ ارداگەرى راحيا الىبەكوۆا ارىپتەسىنىڭ ادامگەرشىلىك, قالامگەرلىك قاسيەتتەرىن, ەڭبەكقورلىعىن ەرەكشە اتاپ ءوتتى.
جيىن سوڭىندا جازۋشىنىڭ جارى قارلىعاش جاعىپاروۆا جولداسىنىڭ شىعارماشىلىق مۇراسىن ناسيحاتتاۋدا ەڭبەك ەتىپ جۇرگەن ازاماتتارعا العىس ايتىپ, وقىرمان قاۋىمعا ىستىق ىقىلاسىن جەتكىزدى.
ايتا كەتەيىك, وسىدان ءبىر اي بۇرىن جازۋشىنىڭ ءومىرىنىڭ سوڭىنا دەيىن تۇرعان ءۇيدىڭ قابىرعاسىنا ەسكەرتكىش تاقتا ورناتىلعان ەدى.
