– روزا اپاي, العاشقى شىعارماڭىز باسپاسوزدە جارىق كورگەن ءسات ەسىڭىزدە مە؟ قانداي كوڭىل كۇيدە بولدىڭىز؟
– ەڭ العاشقى اڭگىمەلەر جيناعىم شىققان كەزدە تۇسىنىكسىز سەزىم بولدى. فوتوسۋرەتىمدى ءبىرىنشى بەتىنە تاباقتاي ەتىپ شىعارىپتى, قاتتى ۇيالدىم. اۋەلى ايتۋدىڭ ءوزى قيىن. ەشكىمگە كورسەتكىم كەلمەي, جاسىرا قويدىم. بىرەۋ-مىرەۋ كىتابىمدى كورسە قايتەم دەپ, فوتوسۋرەتىمنەن ۇيالىپ تۇرعانىم ەسىمدە.
– ءبىر سۇحباتىڭىزدا: «ادام بارىنەن بەزىنىپ, اقيقات جولىن ىزدەيتىن, وزىنە-ءوزى تىيىم سالىپ, ءوزىن-ءوزى تۇتقىندايتىن, ەسەيىپ, بارىنەن باس تارتاتىن كەزەڭى بولادى» دەگەنىڭىز بار. ءسىز وسى ءبىر شىم-شىتىرىق حالگە تۇسكەن كەزىڭىز قاي تۇس؟
– بىلمەيمىن... مەنىڭ سىرتىم كوڭىلدى, مەيىرىمدى... ءىشىم – كوڭىلسىز, قاتال, بالكىم مەيىرىمسىز دە... بۇل سوناۋ بالا كەزدەن بەرگى ءحالىم, بالكىم جاراتىلىسىم. وسىنداي قاتاڭ ۇستانىم, تالابىم بولماسا شاشىلىپ قالعان بولار ما ەدىم.
– بىرنەشە جىل بۇرىن مۇحتار اۋەزوۆ دراما تەاترىنان «فاريزانى» تاماشالادىم. اقىننىڭ سىرتقى ومىرىنەن گورى جان قۇزارىنا تەرەڭ ۇڭىلگەن تۋىندى ەكەنىن ۇعىنىپ, اسەر الدىم. فاريزا اقىنمەن جاقىن سىرلاسقان شاعىڭىز ەسىڭىزدە مە؟
– ول كىسىگە مەن اسا قاتتى جاقىنداۋعا تىرىسپايتىنمىن, الشاقتاۋ جۇرەتىنمىن. فاريزا اپاي «ماڭگىلىك بالا بەينەنى» قاتتى ۇناتتى, ول كەزدە پارلامەنت دەپۋتاتى ەدى. سپەكتاكلگە ارنايى كەلىپ, ساحناعا كوتەرىلىپ, گۇل ۇسىنعانى ءالى ەسىمدە. «شىعارماڭ ۇنادى, بىراق ءبىزدى وڭدىرماپسىڭ!» دەدى قۇلاعىما سىبىرلاپ. مۇنان كەيىن «تۇمار» جۋرنالىنا اقىن وڭايگۇل تۇرجان ارقىلى ءبىر شىعارمامدى سۇراتىپ الدى. ۇلى سۋرەتشى س.كالمىكوۆ تۋرالى «سەن» دەگەن اڭگىمەمدى ۇسىندىم. «روزانىڭ مىنا اڭگىمەسى – كلاسسيكا. وسى نومىرگە سال!» دەپتى. ءبىزدىڭ بايلانىسىمىز وسىنداي داستۇردە جالعاسىن تاۋىپ ءجۇردى. مەنىڭ «مىسىقتار پاتشالىعى» دەگەن تراگيكومەديام «تاۋەلسىز دراماتۋرگيا» اتالىمى بويىنشا گران-پري الدى. بىراق بارلىق تەاتر بۇل شىعارمانى قويۋعا جۇرەكسىندى عوي دەيمىن, ىسىرىلىپ قالا بەردى. سول شىعارمانى فاريزا اپاي سۇراتىپ الىپ, وقىپ شىقتى. ۇندەمەدى. تەك قايتىس بولارىنىڭ الدىندا عانا: «سەنىڭ «مىسىقتار پاتشالىعىڭدى» ەشكىم قويمادى ما؟» دەپ سۇرادى. جازىلعانىنا جيىرما جىل بولعانىن, ەندى قويىلمايتىنىن ايتتىم. ول كىسى تەلەفوننىڭ ءار جاعىندا ءبىراز ءۇنسىز قالدى. اۋىرىپ جۇرگەن كەزى بولاتىن.
– قويادى! – دەدى ج ۇلىپ العانداي. – تەك تاقىرىبىن وزگەرتسەڭ بولار ەدى...
– «مياۋ...ۋ...», دەپ پە دەدىم. فاريزا اپاي كۇلدى.
اپاي ويدا-جوقتا تەلەفون شالدى, كەشكى مەزگىل ەدى. مەن پارلامەنتتەگى مەملەكەتتىك قىزمەتتەن ءوز ەركىممەن كەتىپ, جۇمىسسىز قالعام. «سەنى ەلگە الىپ بارسام, بەكەت اتانىڭ باسىنا بارىپ قايتايىق, ءابىش پەن كلارا دا بولادى» – دەدى. ءسويتىپ, العاش رەت ماڭعىستاۋعا تابانىم تيگەن. بەس كۇن جانىندا بولدىم, ومىرىمدە فاريزا اقىندى جاقىننان كورگەنىم, تانىعانىم, جان دۇنيەسىن ۇققانىم, قۇسالىعىن سەزىنگەنىم, جالعىزدىعىن باققانىم سول كۇندەر شىعار. ءبىز كاسپي تەڭىزىنىڭ جاعاسىندا ۇزاق جۇردىك. اپاي گەرمانيادان ەمدەلىپ كەلگەن بەتى. ءۇنسىز تۇرمىز. قارت كاسپي تەرەڭنەن دەمىن ىشكە تارتىپ, تۇڭعيىعىنا جىبەرمەي, تولقىندارىن قۇلاشتاپ كەرى لاقتىرىپ جاتتى. سول جولى اساۋ دا ەمەس, جۇمساق تا ەمەس, كۇرسىنگەن تولقىنداردى جاعادا بىرگە ەستىپ تۇردىق. قازىر ويلايمىن, اقىن فاريزانىڭ كاسپيىمەن دە, مەنىمەن دە قوشتاسقان ءساتى مە ەكەن دەپ...
– «ماڭگىلىك بالا بەينە», «ساررا», «ەشكىم دە كىنالى ەمەس», «فاريزا» سىندى تۋىندىلارىڭىز كورەرمەن كوڭىلىنەن جوعارى ورىن الدى. ەڭ العاشقى جۇرەك وتىن بەرگەن, پاك جالىنىڭىز توگىلگەن, وزىڭىزگە ىستىق تارتىپ تۇراتىن شىعارماڭىز بار ما؟
– بارلىق شىعارمامنىڭ ارتىق-كەمى وزىمە عانا بەلگىلى. مىقتى, كەسەك تۇستارى دا – مەن, ءالسىز, نازىك يىرىمدەرى دە – مەن. ولار مەنەن جارالعان, مەنەن باسقا ەشبىر جازۋشى ءدال مەندەي جاراتا الماعان بولار ەدى. سوندىقتان ءبىرىن بيىكتەتىپ, ءبىرىنىڭ قادىرىن تۇسىرسەم, وزىمە ساتقىندىق جاساعانىم دا. بارلىق شىعارمامدا مەنىڭ تىنىسىمنىڭ, جۇرەك ءلۇپىلىمنىڭ قاعىسى ەستىلىپ تۇرادى.
– ەگەر عايىپتان سيقىرلى قۇس كەلىپ, ءبىر تىلەگىڭىزدى ورىندار بولسا, نەنى ايتار ەدىڭىز؟
– قاراپايىم عانا تىلەك بار, بالالارىمىز الپامىستىڭ ۇيلەنگەنىن, ارۋزانىڭ تۇرمىسقا شىققان قىزىعىن كورۋ, ۇرپاقتار جالعاستىعىن كورۋ باقىتىن تىلەر ەدىم.
– كوزگە ءجيى جاس الاسىز با؟
– كەي ساتتە...
– تۇتاس ومىرىڭىزگە اسەر ەتكەن نەمەسە ساباق بولعان ەلەۋلى وقيعا تۋرالى ايتىپ بەرەسىز بە؟
– اناممەن قوشتاسقان ءساتىم. انامنىڭ ەسىمى – فاريدا ەدى, 61 جاسىندا قايتىس بولدى. انام ناشارلاپ جاتقاندا كوڭىلىن سۇراپ ەلگە باردىم. بۇل سوڭعى كەزدەسۋ ەكەنىن سەزدىم, بۇدان بىلاي ول كىسىنى كورە المايتىنىمدى دا ءبىلىپ تۇردىم. ارىزداسىپ, قوشتاستىم. ەكەۋمىز ۇزاق جىلادىق. مۇڭلى-شەرلى جىلاۋ ەدى. بالا-شاعاما الاڭداپ كەتىپ بارا جاتقان مەنى قيمادى, مەن انامدى قيمادىم. كەشىرىم سۇرادىم. سول ساتتە ايەل ادامنىڭ تەرەڭدىگىن, الىپ كۇشىن, شىدامدىلىعىن, قايرات-جىگەرىن, رۋحىن سەزىندىم. ول جىلاپ, جۇرەسىنەن وتىرعان قالپى ارتىمدا قالا بەردى, مەن جىلاپ, العا وزا بەردىم... سودان ءۇرجاردان الماتىعا جەتكەنشە جىلاپ كەلدىم. جولدا كەلە جاتىپ, وزىمە سەرت بەردىم, وسى كۇنگە دەيىن شىعارمالارىمدا ايەل كەيىپكەرلەرگە ءوشىم كەتكەندەي شۇيلىگەتىن ەدىم, ايەل بولمىسىنا تىم قاتال, سىڭارجاق قاراعان ەكەنمىن. كۇنا دا, كۇناھار دا تەك ايەل بولىپتى. اناممەن قوشتاسقان ساتتەن باستاپ, مەنىڭ شىعارمالارىمدا ۇلكەن بەتبۇرىس باستالدى. ايەل بەينەسى باسقا كورىنىس تاپتى. ايەل – ۇلى جاراتىلىس, ايەل – قاھارمان, ايەل – مەيىرىم, ايەل – سەرىكتەس, ايەل – ۇرپاق ساباقتاستىعىنىڭ ۇلگىسى. ايەل – انا. مەنىڭ 39 جاستان كەيىنگى شىعارمالارىمدا «سەن», «ۇركەك كەرىم», «ساررا», «ەشكىمدە كىنالى ەمەس», «فاريزا», «بوپاي حانىم» ءبارى ايەلدى ءتاۋ ەتەدى. ايەلدىڭ تەرەڭدىگىنە ءالى دە ۇڭىلە ءتۇسۋ كەرەك.
– تولستوي ء«تاڭىرى تەكتەس سەزىم شىراعى العاش رەت كوكىرەگىڭدە جارق ەتىپ تۇتانعان كيەلى شاقتاعى, ءاۋ باستاعى, ادال شاقتاعى مىنا وزىڭە سەن» دەيدى. العاش «ماڭگىلىك بالا بەينەنى» جازىپ جارق ەتكەن روزا مۇقانوۆانىڭ ارمان-تىلەگى, سەنىمى قانداي ەدى؟ سول روزا مۇقانوۆا مەن قازىرگى روزا مۇقانوۆانىڭ اراسىندا قانشالىقتى ايىرماشىلىق بار؟
– ايىرماشىلىق بالەندەي جوق. ادەبيەت جانى تازا ادامعا عانا قوناقتايدى. جازۋ الدىندا قۇداي الدىندا وتىرعانداي سەزىنۋ بار. جازۋ كۇنادان ءوزىڭدى دە, وزگەنى دە ارىلتۋعا مىندەتتەيدى. وسى قاعيداعا ساي كەلمەي قالعان كۇنى ادەبيەت سەنەن كوشەدى, اۋلاقتايدى. سۋرەتكەر عۇمىرىنىڭ سوڭىنا دەيىن ادەبيەتپەن نەكەلەسكەندەي بىرگە ءومىر سۇرە الادى, تەك ادالدىق كەرەك!
– فولكنەر «نوبەلدىك لەكتسياسىندا» جازۋدىڭ مۇراتى جونىندە «ادامزاتتىڭ وتكەن تاريحتاعى بار قازىنا – داڭق, سەس-ايبارىن قايتا وياتىپ, ادامنىڭ تىزە بۇكپەۋىنە قولۇشىن بەرۋ» دەيدى. سىزگە قولعا قالام ۇستاۋعا تۇرتكى بولعان مۇرات قانداي؟
– ءوزىمدى ىزدەۋ, ءوزىمدى ەستۋ ءۇشىن قالام ۇستايمىن. جانىم نە دەيدى, نە قالايدى مەنەن... وقىرمان دا, كورەرمەن مەنەن العان جاۋابىنا قاناعاتتانا الۋى شارت. مەن دە وزىمە دەيىنگىلەرمەن ۇندەسە الدىم, ولاردى ەستىدىم, سولاردىڭ قاتارىنان تابىلدىم, ءسويتىپ ءوزىمدى, جان قالاۋىمدى تاۋىپ الدىم. قالام مەنەن قالعان كەزدە دۇنيەنىڭ قىزىعى اياقتالاتىن بولار. قالام قالعان كۇن – قابىعىنان شىعىپ, ۇياسىنان اداسىپ قالعان ۇلۋ ءتارىزدى – تاباننىڭ استىندا جانشىلاتىن بولادى.
– «اۋەزوۆتى جاقسى كورگەنىم سونشالىق, باسىلىمدارعا شىققان سۋرەتتەرىن, فوتوسۋرەتتەرىن جينايتىنمىن, وقۋلىقتارداعى سۋرەتتەرىن قيىپ الىپ, ساقتاپ قوياتىنمىن» دەيسىز ءبىر سوزىڭىزدە. ءسىزدى ەرەكشە باۋراعان اۋەزوۆ پروزاسىنىڭ قانداي قىرى؟
– بالا كەزىمنەن م.اۋەزوۆ تۋرالى اكەمنەن كوپ ەستيتىنمىن. اكەم ادەبيەتشى ادام, سول كىسىنىڭ اسەرى بولسا كەرەك. بالا كەزىمىزدەن ابايدى, اۋەزوۆتى ءپىر تۇتتىق. ءجاسوسپىرىم كەزدەن-اق اۋەزوۆ پروزاسىن ءتۇسىنۋ قيىن بولمادى. م.اۋەزوۆتى وقىعان وقىرمان وزگە جازۋشىلارعا اسا تالعامپازدىقپەن قارايدى. اۋەزوۆ ادەبيەتكە تالعاممەن قاراۋدى ۇيرەتكەن بولار.
– كورنەكتى جازۋشى اكىم تارازي تۋراسىندا سىزگە كوپتەگەن سۇراق قويىلدى. مەن سۇراقتى وزگەشە قويعىم كەلەدى. اكىم تارازيگە رەنجىگەن, سول رەنىشىڭىز ءۇشىن وكىنگەن كەزىڭىز بولدى ما؟
– رەنجىگەن كەزىم بولعان جوق, ول كىسى مەنى رەنجىتكەن ەمەس. بىراق قاتال ادام, كوڭىلى قالاماعاندى جاسامايدى, كوڭىلجىقپاستىققا بارمايدى, ءبىر بەتكەي. كوندىرۋ قيىن. ءبىز سوندىقتان دا ادەمى عۇمىر كەشكەن بولارمىز. ءبىر-بىرىمىزگە مىندەت جۇكتەمەدىك, تەڭ ءومىر سۇردىك.
– ءسىز تۋعان جەر, ءۇرجار اۋدانىندا بولعانىمدا, قازاقىلىقتىڭ قاينارىن كورگەندەي بولدىم. ۇلتتىق تاربيەگە قانىپ وسكەن جازۋشى رەتىندە, بۇگىنگى قازاق مىنەزى, ادەپ-يباسى ءوزىنىڭ تابيعي بولمىسىنان قانشالىقتى وزگەرگەنىن باعامداپ ايتا الاسىز با؟ قازىرگى قازاقتىڭ ۇلتتىق قالىبىنا كوڭىلىڭىز تولا ما؟
– ءۇرجار عاجاپ ولكە. ءۇرجاردا مەنىڭ ساعىنىشىم جاتىر, بەيكۇنا بالالىق شاعىم جاتىر. ۇرجارعا سونى كورۋگە, سول كەزەڭمەن قاۋىشۋعا بارامىن. قۇمعا سىڭگەن ءىزدى ادام تابا الا ما؟.. تابا المايدى, مەن دە سول... ءبىز العان تاربيەنى ەندىگى اتا-انا بەرە المايدى. قازىرگى قازاق بۇدان 60 جىل بۇرىنعى قازاق ەمەس, باسقا قازاق! بىزدەن كەيىنگى ۇرپاق, بىزگە – بوتەن. ءبىز دە ولارعا بوتەنبىز. سوندىقتان جاڭا تولقىن ەسكىنىڭ ءبارىن توعىتىپ جۇتا سالمايدى, وزىنە كەرەگىن, قاجەتتىسىن عانا تاڭدايدى, جاڭالىققا, جاسامپازدىققا بوي ۇرادى. سول سياقتى سالت-ءداستۇرىمىز دە تاڭداۋعا تۇسەدى.
– ءسىز ادام بويىنداعى ەڭ جوعارى باعالايتىن جانە تومەن باعالايتىن قاسيەتتەر قانداي؟
– جوعارى قاسيەت – ادامگەرشىلىك! ەڭ تومەنگى دارەجە – قىزعانىش پەن ىشتارلىق.
– تولستوي «توزە المايتىن», گيوتە ونى وقىعاندا «انادان سوقىر بوپ تۋىپ كوزى اشىلعانداي» بولعان, پۋشكين «تۇڭعيىققا قاراپ تۇرعانداي» كۇي كەشكەن الىپ شەكسپير مۇحيتىنا العاش سۇڭگىگەن كەزىڭىز ەسىڭىزدە مە؟ قانداي اسەردە بولدىڭىز؟
– پروزادا – تولستويدى, دراماتۋرگيادا – شەكسپيردى ۇستاز تۇتپاعان سۋرەتكەر نەكەن-ساياق بولار. شەكسپير سيۋجەتتەردى نەگىزىنەن فولكلوردان, ميفتەن, انتيكالىق ادەبيەتتەن, تاريحي-شەجىرەلىك دەرەكتەردەن الا وتىرىپ, اسىلدى جاسىقتان تازالاعانداي قايتا قورىتىپ, ونەر تۋىندىسى ەتىپ, قايتا جاراتىپ ۇسىنىپ وتىردى. ماعان ەرەكشە اسەر ەتە بەرەتىن تەڭدەسسىز شىعارماسى – «ماكبەت» پەن «كوريولان».
– ەرەكشە اسەرلەنىپ وقىعان سوڭعى كىتابىڭىز قانداي؟ ءسىزدى اسەرگە بولەيتىن شىعارمالار كوپ پە؟
– كەيدە ماقتالىپ جاتقان شىعارمالاردى تاپسىرىسپەن العىزىپ وقيمىن, ءبىراز وقىعاننان كەيىن تارتپايدى, اياقتالماعان كۇيدە قالعان ءبىرشاما كىتاپ بار. سوندىقتان اركىم ماقتاعان كىتاپتى وقۋعا ىنتىزار بولعان ءجون ەمەس ەكەن. بىردە ل.تولستوي ءسوز اراسىندا ا.چەحوۆقا «دۋشەچكا» دەگەن اڭگىمەسىن ۇناتقانىن ايتادى. بۇل اڭگىمەنى وقىماعان ەكەم, اتالعان اڭگىمەنى وقىپ شىققاننان كەيىن وقىرمان تولستويدىڭ جانى قانداي نازىك بولعان دەگەن ويعا قالدىم. «وتەتس سەرگيدى» ەرەكشە اسەرمەن وقيمىن. كۇندەلىگىندە: «ناچال وتتسا سەرگيا ي ۆدۋمالسيا ۆ نەگو. ۆەس ينتەرەس – پسيحولوگيچەسكيە ستادي, كوتورىە ون پروحوديت» دەپ جازىپتى. وسى پوۆەسىن جازۋ بارىسىندا كوپ قينالعان سىڭايلى, ون جىلعا جۋىق جازعان. 1898 جىلى 12 ماۋسىمدا «سەرگيدى اياقتادىم» دەيدى. شىعارمانىڭ مازمۇنىن م. گوركيگە ايتىپ بەرەدى. ەكى جىلدان كەيىن تولستوي دا ياسنايا پوليانادان قاشىپ, وتەتس سەرگي سياقتى باس ساۋعالاۋعا ۇمتىلادى. ەكى جىلدان سوڭ قايتىس بولعان.
– تولستوي مەن دوستوەۆسكيدىڭ ءبىرىن اتاۋ كەرەك بولسا, تاڭداۋىڭىز كىمگە تۇسەر ەدى؟
– لەۆ نيكولاەۆيچكە!
– جالپى, ءسىز تۋرالى جوعارى باعا بەرگەن پىكىرلەر از ەمەس. وسىنىڭ ءبارى جەكە ومىرىڭىزگە قالاي اسەر ەتتى؟ ەڭ العاش ءسىز تۋرالى ماقالا جازىپ, باعاڭىزدى بەرگەن اۆتور جونىندە ايتا الاسىز با؟
– ادەبيەت تابالدىرىعىن اتتاعاندا ۇلكەن اعالارىم ءازىلحان نۇرشايىقوۆ پەن دۋلات يسابەكوۆ «ايدا» اڭگىمەمدى ماقتادى. ءازىلحان اعا «قازاق ادەبيەتىنە» ماقالا جازدى. فاريزا وڭعارسىنوۆا «درۋجبا» (ماسكەۋ) جۋرنالىندا سۇحبات بەرىپ, شىعارمالارىمدى اتاپ باعاسىن بەردى. مۇرات اۋەزوۆ, ديداحمەت ءاشىمحانوۆ, اشىربەك سىعاي تاعى باسقالاردى ايتۋعا بولار. مەنىڭ جانىمدى ەرەكشە تولقىتقان يلفا ىلياسقىزى جانسۇگىروۆانىڭ جولداعان حاتى. ول ەرەكشە حات بولدى, اسەرى دە ەرەكشە دەپ باعالار ەدىم. ادەبيەت زەرتتەۋشىلەرى باقىتجان مايتانوۆ, رافعات ابدىعۇلوۆ ەكەۋىنىڭ شىعارمالارىمدى تەرەڭ زەرتتەگەن ماقالالارىنا قۇرمەتپەن قارايمىن.
– بەيتانىس ارالعا وزىڭىزبەن ءۇش كىتاپ الا كەتۋگە رۇقسات بەرسە, قانداي كىتاپتار الا كەتەر ەدىڭىز؟
– اكىم ءتارازيدىڭ «بولاشاققا شەگىنىسى», سوعىس جىلدارىنداعى بالالىق شاعىن, سول كەزدەگى قازاق حالقىنىڭ احۋالىن تاعى ءبىر قايتارا وقىعان بولار ەدىم. العاش رەت 2007 جىلى وقىعانىمدا جىلاپ قالا بەرەتىنمىن. سودان سوڭ يۋري كازاكوۆتىڭ «نيكيشكينى تاينى» دەگەن اڭگىمەسى. وسى اڭگىمەنىڭ استىنا اكىم تارازي: «بۇل اڭگىمەنى ەكىنىڭ ءبىرى وقي الماس. وقىسا دا تۇسىنە الماس. تۇسىنەتىن, ۇعاتىن مەن عانا, اكىم تارازي عانا (ورىستا دا, قازاقتا دا.) 08.01.2015, 12 ساعات, 19 مينۋت» دەپتى. ءتارازيدى تانۋ ءۇشىن «نيكيشكينى تاينى» اڭگىمەسىن الا كەتەر ەدىم. ءۇشىنشى, ءتارازيدىڭ كۇندەلىكتەرىن الىپ بارار ەدىم. بۇلاردى وقۋ وتە قيىن. موينىڭا تاس سالىپ, ءوز ەركىڭمەن تەڭىزدىڭ تەرەڭىنە باتىپ كەتۋگە بەل بايلاۋمەن تەڭ.
– ومىردەن تۇيگەن ۇلكەن تۇجىرىمدارىڭىزدىڭ ءبىرىن ايتاسىز با؟
– ادامدى سۇيە الماعان اللانى سۇيە المايدى.
– قازىر قانداي ىسپەن شۇعىلدانىپ ءجۇرسىز؟ جوسپالارىڭىز جونىندە ايتا كەتسەڭىز؟
– جازۋعا ءتيىس تاقىرىپتارىم كوپ, وتە كوپ. كەيىنگى كەزدە دراماتۋرگياعا عانا اۋەستەندىم. جاقىندا عانا ءبىر اڭگىمە جازىپ بىتىرگەن جايىم بار. ول سيۋجەتتىڭ جادىمدا جۇرگەنىنە جەتى-سەگىز جىلداي بولعان ەدى. وقىرمانمەن ويناپ كورگىم كەلدى, ويناپ وتىرىپ جىلاتىپ العىم كەلدى.
اڭگىمەلەسكەن –
باتىرحان سارسەنحان,
«Egemen Qazaqstan»
