سۋرەتتى كاتونقاراعاي مەملەكەتتىك تابيعي ۇلتتىق پاركى قىزمەتكەرلەرى ۇسىندى
ەسىمىزدە, التاي سىلەمدەرىندە بارىس ەڭ العاش 2014 جىلى سۋرەتكە ءتۇسىرىلىپ, ەلدى ەلەڭ ەتكىزگەن-ءدى. سودان كەيىن دە ارشاتى ورمانشىلىعىنىڭ قىزمەتكەرلەرى تاۋتەكە تەبىندەگەن شاپشىما تىكتەرگە فوتوتۇزاق قۇرىپ, بارىسپەن قاتار, ءارتۇرلى اڭ-قۇستاردىڭ بەينەلەرىن امبەگە ۇسىنعان. ودان كەيىن دە كاتونقاراعاي اۋلىنىڭ تۇسىنداعى سارىمساقتى جوتاسىنان قار بارىسى قىلاڭ بەرگەن. كەشەگى ءىلبىپ باسقان ىلبىستەر دە زوولوگيا ينستيتۋتىنىڭ قىزمەتكەرلەرى مەن ارشاتى ورمانشىلىعىنىڭ ينسپەكتورلارى قۇرعان فوتوتۇزاققا تۇسكەن. ءۇش بارىس تۇنگى ۋاقىتتا كامەرانىڭ ءدال الدىنان وتكەن. جۇرىستەرى وتە ساق.
– ءوزىمىز دە تاڭعالدىق. بارىس ەكى كۇشىگىمەن ءتۇسىپ قالىپتى. مۇنداي جاعداي ءبىرىنشى رەت بولىپ تۇر. دەمەك ولار وسى جاقتى تۇراقتى مەكەندەيدى دەگەن ءسوز. بۇعان دەيىن ءبىزدىڭ اۋماققا كىرىپ-شىعىپ جۇرەدى دەيتىنبىز. فوتوتۇزاققا كۇشىكتەرىمەن ءتۇسۋى – قازىر وسى جاقتى تۇراقتى مەكەندەپ جاتقانىنىڭ دالەلى, – دەيدى كاتونقاراعاي مەملەكەتتىك تابيعي ۇلتتىق پارك ديرەكتورىنىڭ ورىنباسارى ارناس اۋعونباەۆ.
ۇلتتىق پارك ماماندارىنىڭ بولجاۋىنشا, قازىرگى ۋاقىتتا بۇل اۋماق – 13 بارىستىڭ مەكەنى. ولاردى قورعاۋ, باقىلاۋ جۇمىسى كۇن تارتىبىنەن تۇسپەك ەمەس. جالپى, پارك اۋماعىندا اڭ-قۇستىڭ قاي ءتۇرى بولسىن كوبەيىپ كەلەدى.
شىعىس قازاقستان وبلىسى,
كاتونقاراعاي اۋدانى
