روبوتتەحنيكا سالاسىنىڭ چەمپيوندارىمەن كەزدەستى

كەزدەسۋگە قازاقستان كوماندا­سى­نىڭ مۇشەلەرى, الماتى قالاسىنداعى فيزيكا-­ماتەماتيكا باعىتىنداعى نازارباەۆ زياتكەرلىك مەكتەبىنىڭ وقۋشىلارى ەرداۋلەت تۇرگەنباەۆ, ءالفيا بايجاقىپ, نۇرجان كوكەەۆ, دوسجان دايران جانە قادىلبەك داستان, سونداي-اق ولاردىڭ ۇستاز­دارى اسىلبەك مىرزاحمەتوۆ پەن نۇرداۋلەت دوسماعامبەت قاتىستى.

مەملەكەتتىك كەڭەسشى دارىندى وقۋشىلار مەن ولاردىڭ ۇستازدارىن جاقىندا گرەكيادا روبوتتەحنيكادان وتكەن FIRST Global Challenge دەپ اتالاتىن اۋقىمدى چەمپيوناتتاعى كەزەكتى جەڭىسىمەن قۇتتىقتادى.

وقۋشىلار مەن ۇستازدار چەم­پيوناتقا دايىندىق بارىسى جانە ونى وتكىزۋدىڭ ەرەكشەلىكتەرىنە توقتالىپ, الداعى جوسپارلارىمەن ءبولىستى.

FIRST Global Challenge – 2017 جىلدان بەرى ءارتۇرلى مەملەكەتتە وتكىزىلىپ كەلە جاتقان روبوتتەحنيكادان وليمپيادالىق ۇلگىدەگى الەم چەمپيوناتى. قازاقستاننىڭ قۇراما كومانداسى 2022 جىلى جەنەۆادا جانە 2023 جىلى سينگاپۋردە وتكەن جارىس­تا توپ جاردى. سونىمەن بىرگە ءبىزدىڭ كوماندانىڭ قۇرامى ءار باسەكەدە تولىق جاڭارتىلىپ, ۇلتتىق كەزەڭنىڭ جەڭىمپازدارىنان جاساقتالدى. بيىل وقۋشىلارىمىز 190 ەلدىڭ مىقتىلارى باق سىناعان ءدۇبىرلى دودادا قاتارىنان ءۇشىنشى رەت جەڭىمپاز اتاندى.