قازاقستان كومپوزيتورلار وداعىنىڭ 85 جىلدىعىنا وراي ۇيىمداستىرىلعان I حالىقارالىق «ەلگە ارناۋ» ونەر دوداسىنا قاتىسقان ونەرپازدار تەك اۆتوردىڭ شىعارمالارىن ورىندادى. ەكى كۇنگە سوزىلعان ونەر بايگەسى ەلدىڭ ەرەكشە ىقىلاسىنا يە بولدى. سازگەرلىكتىڭ ازابىن تاتىپ, سىرى مەن سىنى كەتپەيتىن ساز تۋىنداتۋدىڭ ماشاقاتىنا ءتوزۋ – ۇلكەن ماحابباتتان تۋىنداسا كەرەك. وسى جولعا تۇتاس ءومىرىن ارناپ كەلە جاتقان ونەر يەسى سالتاناتتى شارادا حالىققا ريزاشىلىعىن جەتكىزدى.
«جەتىسۋ جۇرتىنا دەگەن ىقىلاسىم شەكسىز. مەن سازگەرلىك, جالپى مۋزىكا ونەرىنە توتەدەن كيلىگىپ, توسىننان قوسىلعان جان ەمەسپىن دەپ بىلەمىن. اق جورگەككە انمەن ورانىپ, كۇيمەن بۋىلىپ, تالبەسىكتە انا ءالديىن تىڭداپ ءوستىم. ق ۇلىنداي قۇلدىراڭداپ وسكەن شاعىم بۇگىنگە دەيىن كوز الدىمنان كەتكەن ەمەس. سول كەزدەگى اۋىلىمنىڭ اجەلەرى سالعان تاماشا اۋەندەر ءالى دە قۇلاعىمدا ءجۇر. سول سەبەپتى, ونەرگە كەزدەيسوق كەلمەدىم دەپ ايتۋعا تۇتاستاي قۇقىم بار», دەدى ءا.الپىسباەۆ.
بايقاۋعا وزبەكستاننىڭ حالىق ءارتىسى فارۋح سادىكوۆ, قىرعىزستاننىڭ حالىق ءارتىسى تىلەك نايمانباەۆ, قازاقستاننىڭ حالىق ءارتىسى نۇرجامال ۇسەنباەۆا, قازاق مۋزىكا ونەرىنىڭ مايتالماندارى جانات شىبىقباەۆ, دۇيسەن ورىنباي, تورعىن سمايلوۆا قازىلىق ەتتى. ولار جۇزگە تارتا قاتىسۋشىنىڭ ىشىنەن ۇزدىكتەردى تاڭدادى.
ء«الي دەمەگەن ۇلى – ءى.جانسۇگىروۆ اتىنداعى ونەر ورداسىن باسقارعاندا, ۇجىمدى قاناتتاندىرىپ قانا قويماي, تالاي بەلەسكە باستاعان باسشى. الپىستان اسقان ەل اعاسى باعىندىرعان اسۋلاردىڭ ءوزى ءبىر كىتاپقا ارقاۋ بولارلىقتاي. بۇگىندە م.تولەباەۆ اتىنداعى فيلارمونيانىڭ وركەسترىنە ديريجەرلىك ەتىپ, كەشەگى نۇرعيسا تىلەنديەۆ سىندى تۇلعالار سالعان سارا جولدىڭ ساڭلاعى ەكەنىن دالەلدەپ ءجۇر. بۇل ارينە, ءبىر عانا جەتىستىگى», دەدى ن.ۇسەنباەۆا.
اتالعان ونەر دوداسىندا جۇلدەلى ورىنعا يە بولعان جەڭىمپازداردىڭ بارىنە قارجىلاي سىيلىق بەرىلدى. توپتى جارعان تۇركى بالالارى ونەرىن ورتاعا سالىپ, جەتىسۋلىقتاردى ءبىر جەلپىندىردى.
جەتىسۋ وڭىرىندە ء«الي – اۋەن, ءالي – جىر» اتتى ءان بار, وسىعان وراي كومپوزيتوردىڭ ارتىنان ەرگەن اڭىز دا جەتەرلىك. وڭتۇستىك جاققا بارعان كومپوزيتوردىڭ «دوسىم» دەگەن تاماشا ءانىن تىڭداعان كاسىپكەر ازاماتتىڭ ءبىرى اۆتورعا جەڭىل اۆتوكولىگىن سىيعا بەرگەن ەكەن. مۇنىڭ ءوزى ءان قاناتىندا تەربەلگەن ازاماتتىڭ جومارتتىعى بولسا, تىڭدارماندى سونداي كۇيگە بولەگەن تۋىندىنى ومىرگە اكەلگەن سازگەردىڭ تالانتىنا جاسالعان قۇرمەت دەپ بىلەمىز.
ءالي الپىسباەۆتىڭ بويىندا بابادان قالعان تەكتىلىك بارى انىق. وعان دالەل, ارقاشان مۇقىم ەلدىڭ ماڭگىلىك مۇراسىن ءجيى ناسيحاتتايتىندىعىندا. سان مارتە كونتسەرتتىك ساپارمەن قىتاي, تۇركيا, پولشا, ءۇندىستان, بولگاريا جانە رەسەيدىڭ ءىرى قالالارىندا بولىپ, كوپتەگەن حالىقارالىق مۋزىكالىق فورۋم مەن فەستيۆالدەرگە قاتىستى. سونىمەن قاتار ديريجەر-كومپوزيتور رەتىندە وتاندىق ءىرى ساحنالاردا ءوزىنىڭ ونەرىن سان مارتە مويىنداتىپ, تىڭدارماندارىن ءسۇيسىندىرىپ كەلەدى. ءوزىنىڭ ايتۋىنشا, جۇزدەگەن ءاننىڭ, الدەنەشە ءىرى كۇي-پوەمالاردىڭ جانە دومبىراعا ارناپ جازىلعان 3 ءبولىمدى كونتسەرتتىڭ اۆتورى. تەاتردا ساحنالانعان 10-عا جۋىق قويىلىمعا مۋزىكا جازىپ, اندەرى مەن شىعارمالارىنان قۇرالعان «اۋىلداعى توي», ء«انىمدى سىزگە ارنادىم» اتتى جيناقتارى جارىق كورگەن. بۇل ەرتەڭگە اڭىز بولار ءبىر ادامنىڭ شىعارماشىلىق الەۋەتىنىڭ كورسەتكىشى, ەسىمىن ايگىلەپ تۇراتىن دارىننىڭ عۇمىرناماسى.
جەتىسۋ وبلىسى
