كوپ بولىپ قولعا الىنىپ جاتقان تازالىق اكتسيالارىنا جەرگىلىكتى اتقارۋشى بيلىك وكىلدەرى, تابيعات جاناشىرلارى, قوعامدىق بىرلەستىكتەر, ەرىكتى جاستار, بەلسەندى تۇرعىندار اتسالىسىپ جاتىر. ەكولوگيالىق ءىس-شارالاردىڭ دەنى تۇرعىنداردى تازالىققا, قورشاعان ورتانى ايالاپ ۇستاۋعا, تابيعاتتى قورعاۋعا ۇندەيتىن كوڭىلدى ويىن, بايقاۋ, فەستيۆال تۇرىندە ءوتىپ, كەيدە بۇقارالىق سپورت جارىستارىنا دا ۇلاسىپ كەتەدى.
«تازا اۋليەكول» ەكواكتسياسى اياسىندا اۋليەكول اۋىلىنىڭ ۇلكەن-كىشىسى ءبىر كىسىدەي جۇمىلىپ, كوشە سىپىرىپ, ورتالىق ساياباقتى, بىرنەشە اللەيانى جاپىراقتان تازارتتى. ءبىراز شارۋانىڭ باسىن قايىرىپ تاستاعان سوڭ تۇرعىندار 3 شاقىرىم قاشىققا جۇگىرۋدەن جارىستى. 14 جاسقا ەندى تولعان جاس بالالار دا, سەكسەندى القىمداپ قالعان قاريالار دا قالىسپاي جۇگىرگەن كوڭىلدى جارىستان كەيىن شاعىن عانا مەرەكەلىك جيىن ءوتىپ, جەڭىمپازدارعا, اۋىل تازالىعىن ساقتاۋعا ۇنەمى اتسالىسىپ جۇرگەن جاستارعا, زەينەتكەرلەرگە اۋدان اكىمىنىڭ العىسحاتى تابىس ەتىلدى.
اۋداندىق تكش ءبولىمىنىڭ باستىعى ەگور چەرنوۆتىڭ ايتۋىنشا, اۋليەكول اۋدانىندا «تازا قازاقستان» ەكواكتسياسى باستالعان ءساۋىر ايىنان بەرى ارنايى پوليگونعا 9 220 توننا قوقىس شىعارىلىپ, قىرىقتان استام زاڭسىز قوقىس ءۇيىندىسى جويىلعان.
«3 260 اۋلانى اباتتاندىردىق, يەسىز قالعان 46 عيمارات بۇزىلدى, 40 000 شارشى مەتردەن استام جەردىڭ ءشوبى شابىلدى, 11,5 كم
قورشاۋ ورناتىلدى, «تازا قازاقستان» ەكولوگيالىق باعدارلاماسى اياسىنداعى سەنبىلىكتەرگە 6342 ادام قاتىستى, 102 تەحنيكا جۇمىلدىرىلدى. ورتالىق الاڭدار اباتتاندىرىلىپ, 2 سۋبۇرقاق جوندەلدى. ال بۇگىنگى «تازا اۋليەكول» سپورتتىق ەكواكتسياسى اۋدان تۇرعىندارىن تازا ورتادا ءومىر سۇرۋگە شاقىرۋ, ەكولوگيالىق مادەنيەتتى قالىپتاستىرۋ ماقساتىندا ءوتىپ جاتىر», دەيدى تكش باستىعى.
ءدال وسى كۇنى فەدوروۆ اۋدانىنىڭ باننوۆ اۋىلىنداعى توقتاس كولىندە «تازا جاعالاۋ» ەكولوگيالىق اكتسياسى ءوتتى. بۇل ءىس-شاراعا قاتىسقان 200-دەن استام تۇرعىن ون شاقتى توپقا ءبولىنىپ كولدىڭ جاعاسىن, اۋىلعا كىرەبەرىس جولداردىڭ ءبارىن تازارتىپ شىقتى. اكتسيا بارىسىندا تۇرعىندار پلاستيكالىق بوتەلكەلەردى, پاكەتتەر مەن باسقا دا قاتتى قالدىقتاردى قوسا العاندا, شامامەن 1,5 توننا قوقىس جينادى.
«بۇل اكتسيا كوپ بولىپ جۇمىلا بىلسەك, ۇلكەن كۇشكە اينالاتىنىمىزدى كورسەتىپ بەردى. بۇگىن اۋىلعا ءتيىپ تۇرعان اسەم كولدىڭ جاعالاۋىن تازالاپ ەدىك, اينالامىز مۇلدە باسقاشا كەيىپكە ەنىپ, تۇرلەنىپ شىعا كەلدى. بۇل ەڭ الدىمەن وزىمىزگە جاقسى ەمەس پە؟», دەيدى اۋداندىق ءماسليحاتتىڭ دەپۋتاتى الەكسەي باينازاروۆ.
قاراسۋ اۋدانىندا ءوتىپ جاتقان سەنبىلىكتەر, ەكو-كۆەست, سانيتارلىق تازالاۋ, ەلدى مەكەندەردى اباتتاندىرۋ جۇمىستارى دا – كوپكە ۇلگى. قازاننىڭ سەگىزىندە اتالعان اۋدانعا قاراستى چەرنياەۆ اۋىلدىق وكرۋگىنىڭ اقساقالدارى سەنبىلىككە شىقتى.
ء«وز اۋىلىمىزدىڭ اينالاسىن تازا ۇستاۋعا بولادى عوي. كوپتىڭ كۇشىمەن بىتەتىن مۇنداي ءىس-شارالاردىڭ جالپى اۋىل تۇرعىندارىنىڭ ىنتىماعىن ارتتىرۋعا, كەيىنگى جاستاردىڭ ۇلگى-ونەگە الۋىنا سەپتىگىن تيگىزەدى. سوندىقتان «تازا قازاقستان» اكتسياسى ءبىزدىڭ وكرۋگتە, جالپى اۋدان كولەمىندە اپتا سايىن ءوتىپ تۇراتىن بولادى», دەيدى اۋداندىق ارداگەرلەر كەڭەسىنىڭ توراعاسى نۇرتان اقشالوۆ.
اۋىل اقساقالدارىنىڭ باستاماسى كوپشىلىك قولداۋىنا يە بولىپ, جۇزدەن استام تۇرعىن ەكواكتسياعا اتسالىستى. ونەرپازدار ءان سالىپ, كۇي اۋەلەتسە, جەرگىلىكتى شارۋاشىلىقتار كوشە اسحاناسىن ۇيىمداستىرىپ, داستارقانعا ىستىق شاي, ءدامدى تاعامدارىن جايىپ قويدى.
بۇل كۇنى قوستانايلىقتار دا قاراپ قالعان جوق. وبلىس اكىمى قۇمار اقساقالوۆ باستاعان ءوڭىر بەلسەندىلەرى ارىستانبەكوۆ كوشەسى بويىندا ورنالاسقان ساياباققا اعاش وتىرعىزدى. تاياۋدا عانا بۇل كوشەدەگى بوس جاتقان اۋماق اباتتاندىرىلىپ, جاڭا شاعىن ساياباق اشىلعان. جاڭا ساياباقتا سپورت الاڭقايى سالىنىپ, تۇرعىندار دەمالىسىنا قولايلى جاعداي جاسالعان. جاقىن ارادا بۇل ماڭدا بالالارعا ارنالعان ويىن الاڭى مەن قوعامدىق دارەتحانا ىسكە قوسىلادى.
«مەملەكەت باسشىسىنىڭ «تازا قازاقستان» باعدارلاماسى قوستاناي وبلىسىندا بەلسەندى جۇزەگە اسىپ جاتىر. جىل باسىنان بەرى رۇقسات ەتىلمەگەن 185 قوقىس پوليگونى جويىلدى. سونداي-اق 86 مىڭنان اسا اعاش وتىرعىزىلدى. وبلىستىق بيۋدجەتتەن اباتتاندىرۋ جۇمىستارىن اتقارۋعا 11 ملرد تەڭگەدەن استام قارجى ءبولىندى. ناتيجەسىندە, 327 ساياباق پەن سكۆەر تازارتىلىپ, قالىپقا كەلتىرىلدى. مۇنىڭ سىرتىندا, سول قارجىنىڭ كومەگىمەن جاڭادان ساياباقتار اشىلىپ جاتىر. وبلىس ورتالىعى بولعاندىقتان, ارينە, قوستاناي قالاسىنا ەرەكشە كوڭىل بولىنەدى. بيىل «ترياتلون-پاركتى» قالىپقا كەلتىردىك. توبىل وزەنىنىڭ جاعالاۋى رەتتەلدى. ول ماڭ قازىر تۇرعىندار مەن قالا قوناقتارى دەمالاتىن وتە قولايلى ءارى كورىكتى ورىنعا اينالدى. ورتالىق ساياباقتا دا 200 ملن تەڭگەگە ءبىراز جۇمىس اتقارىلدى. بۇل باعىتتاعى جۇمىس كەلەر جىلى دا جالعاسادى. ەسكىرگەن اتراكتسيونداردىڭ ورنىنا جاڭا زاماناۋي اتراكتسيوندار قويىلاتىن بولادى», دەدى وبلىس اكىمى.
قوستاناي وبلىسى
