وڭىردەگى مەديتسينا سالاسىن دامىتۋ ماقساتىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى قولعا الىنعان. قازىر سونىڭ يگىلىگىن الىستاعى ەلدى مەكەندەر دە كورىپ جاتىر. ماسەلەن, كوپ ۇزاماي اقسۋ, الاكول, سارقان, ەسكەلدى, كوكسۋ, قاراتال, كەربۇلاق پانفيلوۆ اۋداندارىندا 59 مەديتسينالىق نىسان بوي كوتەرەدى. شالعايداعى اۋىلداردا 15 دارىگەرلىك امبۋلاتوريا مەن 39 فەلدشەرلىك-اكۋشەرلىك, 5 مەديتسينالىق پۋنكت ىسكە قوسىلماق. وڭىردە قابىلدانعان ءىس-شارالار ناتيجەسىندە كەيىنگى 2 جىلدا دەنساۋلىق ساقتاۋ نىساندارىن جاڭارتۋ دەڭگەيى 50 %-دان اسقان.
وبلىستىق دەنساۋلىق ساقتاۋ باسقارماسىنىڭ مالىمەتىنشە, ءبىر عانا شالعاي الاكول اۋدانىندا ۇلتتىق جوبا اياسىندا 9 زاماناۋي دەنساۋلىق ساقتاۋ نىسانىنىڭ قۇرىلىسى باستالدى. ولار: ەكپىندى, جايپاق, بەسكول اۋىلدارىنداعى 3 دارىگەرلىك امبۋلاتوريا, جاناما, ساپاق, ۇشبۇلاق, قىزىلقايىڭ, قاينار, اقجار اۋىلدارىنداعى 6 فەلدشەرلىك-اكۋشەرلىك پۋنكت. جالپى, اقجار اۋىلىنداعى فاپ-تىڭ دايىندىق دارەجەسى شامامەن 40%-دى قۇرايدى. مەردىگەر ۇيىم وكىلى قۇربانالى وماروۆتىڭ ايتۋىنشا, قۇرىلىس جۇمىستارى تامىز ايىندا باستالعان.
ء«بىزدىڭ مىندەتىمىز – نىسان سالۋ, ىرگەلەس اۋماقتى اباتتاندىرۋ, قورشاۋ ورناتۋ. سونداي-اق 35 ملن تەڭگەگە جۋىق سوماعا زاماناۋي مەديتسينالىق جابدىقتار ساتىپ الۋعا ءوتىنىم بەردىك. ياعني نىساندى دايىن كۇيدە تاپسىرامىز. شەتتەن كەلگەن مامانداردان باسقا 10 جەرگىلىكتى تۇرعىن تارتىلعان, قاجەتتى تەحنيكا جەتكىلىكتى. ءبىر سوزبەن, قۇرىلىستى مەرزىمىندە ورىنداۋعا بارلىق مۇمكىندىك بار», دەيدى ق.وماروۆ.
اقجار اۋىلىندا 1500 ادام تۇرادى. سالىنىپ جاتقان فەلدشەرلىك-اكۋشەرلىك پۋنكت 60-جىلدارى سالىنعان, بەيىمدەلگەن عيماراتتا ورنالاسقان ەسكىرگەن مەديتسينالىق پۋنكتتىڭ ورنىنا سالىنادى.
«اۋىلداعى مەدپۋنكت ەسكىرگەن, نورمالار مەن تالاپتارعا سايكەس كەلمەيدى, قىستا مەدپۋنكت بولادى. سوندىقتان دا اۋىل تۇرعىندارى وزدەرىندە زاماناۋي دەنساۋلىق ساقتاۋ مەكەمەسىنىڭ پايدا بولۋىنا, مەديتسينالىق قىزمەت كورسەتۋ ساپاسىنىڭ ارتۋىنا وتە قۋانىشتى. شىلدە ايىندا اۋىلدىق وكرۋگتىڭ قوڭىر اۋىلىندا بلوكتى-ءمودۋلدى مەديتسينالىق پۋنكت ىسكە قوسىلدى. وتكەن جىلى مۇندا مەكتەپ جوندەلىپ, 150 ورىندىق جاڭا مادەنيەت ءۇيى سالىندى. مۇنىڭ ءبارى اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا تىكەلەي اسەر ەتەدى», دەيدى اقجار اۋىلدىق وكرۋگىنىڭ اكىمى ەلەس جاپارعاليەۆ.
وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆ اتاپ وتكەندەي, جەرگىلىكتى بيۋدجەت ەسەبىنەن اۋىل تۇرعىندارىنا كورسەتىلەتىن مەديتسينالىق قىزمەتتەردىڭ ساپاسىن ارتتىرۋ ماقساتىندا وڭىردە بلوكتى-ءمودۋلدى مەديتسينالىق پۋنكتتەر سالىنىپ جاتىر.
«الاكول اۋدانىنا كەلەتىن بولساق, وتكەن جىلى قارلىعاش, بايزەرەك, ىنتالى اۋىلدارىندا بلوكتى-ءمودۋلدى مەديتسينالىق پۋنكتتەر ورناتىلدى. بيىل وسىنداي نىساندار بيباقان, ارقارلى, قوڭىر اۋىلدارىندا پايدالانۋعا بەرىلدى. سونداي-اق دوستىق, قابانباي, اقتۇبەك اۋىلدارىنا 3 سانيتارلىق اۆتوكولىك ساتىپ الىندى. جىل سوڭىنا دەيىن اۋداندىق اۋرۋحانا زاماناۋي مەديتسينالىق جابدىقتارمەن قامتاماسىز ەتىلەدى. بۇدان باسقا, 200 توسەكتىك ستاتسيونارى بار ورتالىق ەمحانا قۇرىلىسىنا جوبالىق-سمەتالىق قۇجاتتاما ازىرلەنىپ جاتىر», دەيدى ا.جانسەڭگىروۆ.
كەيىنگى ەكى جىلدا الاكول اۋدانىنا ينفراقۇرىلىمدىق, الەۋمەتتىك نىسانداردىڭ قۇرىلىسىنا, سونداي-اق جوبالاۋ جۇمىستارىنا وبلىستىق بيۋدجەتتەن 32,2 ملرد تەڭگە ءبولىندى.
وبلىس اكىمى ءباسپاسوز قىزمەتىنىڭ مالىمەتىنشە, وڭىردەگى مەديتسينالىق كادرلاردىڭ تاپشىلىعىن ازايتۋ ماقساتىندا بيىلدان باستاپ كوتەرمە اقى تولەنەدى. ەندى وڭىرگە كەلگەن دارىگەرلەر اۋىلدىق جەردە جۇمىس ىستەيتىن بولسا, 10 ملن تەڭگەدەن, قالادا جۇمىس ىستەگەن جاعدايدا 5 ملن تەڭگەدەن الادى. دەنساۋلىق ساقتاۋ باسقارماسىنىڭ حابارلاۋىنشا, وتكەن جىلى وڭىردە دارىگەرلىك كادرلاردىڭ تاپشىلىعى 8%-عا تومەندەگەن.
«وبلىس اكىمى بەيبىت يساباەۆتىڭ باستاماسىمەن وبلىسىمىزعا كاسىبي مەديتسينالىق كادرلاردى تارتۋعا بىرجولعى كوتەرمە اقى تولەۋ تۋرالى شەشىم قابىلداندى. بيىل وسى ماقساتقا 595 ملن تەڭگە ءبولىندى. وسى كەزەڭدە اۋىلدىق جەرلەرگە كەلگەن 9 دارىگەرگە 10 ملن تەڭگەدەن, ال قالاعا كەلگەن 16 دارىگەرگە 5 ملن تەڭگەدەن تولەندى. بيىلعى شىلدەدەن قازانعا دەيىن جۇمىسقا قابىلدانعان تاعى 45 دارىگەرگە جىل سوڭىنا دەيىن كوتەرمەاقى تولەۋدى جوسپارلاپ وتىرمىز. بۇل قولداۋدى 3 ايلىق سىناق مەرزىمىنەن ءساتتى وتكەن جاعدايدا الۋعا بولادى. ءوڭىردىڭ مەديتسينالىق مەكەمەسىندە 5 جىل جۇمىس ىستەۋ قاجەت. قازىردە بىزگە 186 مامان جەتىسپەيدى, جىل سوڭىنا دەيىن ولاردىڭ سانى ازايادى. سول تۇرعىدا بۇل ماسەلەنى شەشۋدە بىرجولعى كوتەرمەاقى تولەۋ – جاقسى دەمەۋ», دەيدى ا.جانسەڭگىروۆ.
ايتا كەتەيىك, جىل سايىن وبلىسقا 80-گە جۋىق جاس مامان كەلەدى. سولاردىڭ ءبىرى – 17 جىلدىق ەڭبەك ءوتىلى بار حيرۋرگ نۇرمۇحامەد بايجانوۆ, ول قابانباي اۋىلىنداعى الاكول اۋداندىق ورتالىق اۋرۋحاناسىنىڭ بولىمشەسىنە جۇمىسقا تۇرعان. اۋىلدىق اۋرۋحاناعا 6 اي بۇرىن كەلىپ, قولداۋ رەتىندە 10 ملن تەڭگە كولەمىندە كوتەرمە اقى العان. جەرگىلىكتى اكىمدىك وتباسىن قاجەتتى تۇرعىن ۇيمەن قامتاماسىز ەتتى.
«جۇمىس وڭاي ەمەس, كىشىگىرىم جاراقاتتاردى قوسپاعاندا, كۇنىنە 2-3 كۇردەلى وپەراتسيا جاسالادى. بىراق ءبىز, دارىگەرلەر, بۇل جولدى ءوزىمىز تاڭدادىق. باستى مىندەتىمىز – ناۋقاس جاندارعا كومەكتەسۋ. ادامدار اۋىر جاراقاتپەن تۇسكەن كۇردەلى جاعدايلار دا بولدى, ونداي ساتتە مينۋتتىڭ ءوزى ماڭىزدى. بارلىق جاۋاپكەرشىلىكتى وزىڭە الاسىڭ. مەندە 4 سەرتيفيكات بار. ءوزىم جالپى ەرەسەك, جالپى بالالار حيرۋرگىمىن, بالالار تراۆماتولوگىمىن, بالالار ورتوپەدىمىن, بالالار ۋرولوگىمىن. سوندىقتان ەمشەكتەگى سابيلەرگە دەيىن ءتۇرلى وپەراتسيا جاساي الامىن. بولىمدە لاپاروسكوپ اپپاراتى بارلىعى قۋانتادى, بۇل كەز كەلگەن اۋرۋحانالاردا بولا بەرمەيدى. ال زاماناۋي مەديتسينالىق جابدىقتى پايدالانۋ جۇمىستى بىرنەشە ەسە جەڭىلدەتەدى, وپەراتسيادان كەيىن ناۋقاستىڭ قالپىنا كەلۋ ۇدەرىسىن جەدەلدەتەدى», دەيدى مامان.
الاكول واا ديرەكتورىنىڭ ورىنباسارى ەلميرا سەرىكوۆانىڭ ايتۋىنشا, 5 جاڭا مامان – 2 حيرۋرگ, 2 رەانيماتولوگ, 1 اكۋشەر-گينەكولوگ ارنايى باعدارلاما ارقىلى قابىلداندى, ولارعا 10 ملن تەڭگەدەن تولەندى.
سونداي-اق وڭىردە مەديتسينالىق كادر تاپشىلىعى پروبلەماسىن شەشۋمەن قاتار, دەنساۋلىق ساقتاۋ ينفراقۇرىلىمىن دامىتۋعا قاتىستى ءتۇرلى ءىس-شارا قابىلدانىپ جاتىر. 2024 جىلدىڭ سوڭىنا دەيىن العاشقى مەديتسينالىق-سانيتارلىق كومەك نىساندارى 94 اۋىلدا پايدالانۋعا بەرىلەدى, ونىڭ ىشىندە: 3 – جاڭا قۇرىلىس, 27 – بلوكتى-ءمودۋلدى مەديتسينالىق پۋنكت, 59 – «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە, تاعى 5-ەۋى كۇردەلى جوندەۋدەن وتەدى.
ايتا كەتەيىك, وبلىستا قابىلدانىپ جاتقان ءىس-شارالار ناتيجەسىندە 261 دەنساۋلىق ساقتاۋ نىسانىنىڭ 136-سى جاڭارتىلادى, جاڭارتۋ دەڭگەيى 52%-دى قۇرايدى.
جەتىسۋ وبلىسى
