سۋرەتتى تۇسىرگەن – ەرلان ومار, «EQ»
قايىرماسى:
«احاۋ, ەلىم-اي,
تۋىپ, وسكەن جەرىم-اي.
توپىراعىڭ تارتادى-اي,
الىستاعى مەنىڭ-اي, ەلىم-اي»,
بولىپ كەلەتىن.
سەرىك قۇراقباەۆتىڭ بۇل شىعارماسىن مىسالعا تارتقىزىپ وتىرعان – وسىنداعى «توپىراعىڭ تارتادى» دەگەن جالعىز-اق اۋىز ءسوز. توپىراقتىڭ شاقىراتىنى بۇگىندە اقىلعا سيا بەرمەسە دە, تانىم-تۇيسىكتىك تۇرعىدا قاراعاندا, ەستى ءسوز بولىپ شىعادى. ءبىزدىڭ ۇلتتىق تانىمدا اكە مەن شەشە, اتا مەن انا ءبىر-ءبىرىنسىز ايتىلمايتىن قاستەرلى بولسا, ەل مەن جەر دەگەن دە ءدال وسىلار سياقتى ەگىز ۇعىمدار. تۋعان اكە-شەشەدەي قاستەرلى ءھام قاسيەتتى. «قاي ەلدەنسىڭ نەمەسە قاي توپىراقتانسىڭ؟» دەپ سۇرايدى قازاق. ادام مەن توپىراقتىڭ تۇتاستىعىنا بۇدان ارتىق نە مىسال كەرەك؟
تابانى جەرگە تيمەي, كەكىلى كۇنگە كۇيمەي كوپقاباتتى ۇيدە وسكەن بالا سول توپىراقتىڭ قادىرىن قايبىر ءبىلىپ جاتىر قازىر؟ باسقانى بىلاي قويعاندا, ورتا مەكتەپتى اۋىلدان تامامداعان ءبىزدىڭ ءوزىمىز اۋىلعا دەمالۋعا عانا بارامىز. اۋىل قارتايىپ بارادى... ءبىز اندا-ساندا سوعاتىن قالالىق قوسمەكەندىگە اينالدىق.
ءالى ەسىمدە, ەسىم كىرەرلى-شىعارلى 3-4 جاسىمدا بولسا كەرەك, اكەمنىڭ اعاسى مەنى جەرگە اۋناتىپ العانى. باجىلداپ جىلاعانىما قاراماستان, ءبىر-ەكى رەت دومالاتىپ-دومالاتىپ جىبەرگەن. باسقاسى ەسىمدە جوق, تۋرا سول اۋناتقانى عانا قالىپتى. ونىڭ ءوزى نەشەمە جىلدان بەرى ۇمىتىلعان, وتكەندە مىنا ءماتىندى وقىعاندا جاڭعىردى جادىمدا. «تۋعان جەرگە اۋناتۋ» جورالعىسى ارقىلى تۋعان جەرىڭدى, ونداعى ەل-جۇرتىڭدى, ءوزىڭنىڭ قايدان شىققانىڭدى ۇمىتپاۋ كەرەگىن, وتانشىل بولۋ قاجەتتىگىن تۇسىنەمىز. ۇيگە جاقسى قوناق كەلگەندە, وتىرعان ورنىنا شاپاعاتى ءتيسىن, جولىن بەرسىن دەپ, بالالاردى اۋناتادى. كىلەم توقىعاندا, تەكەمەت باسقاندا, دايىن بولعاننان كەيىن بالالاردى اۋناتادى» دەلىنگەن ەكەن اشىق دەرەككوزدەردىڭ بىرىندە. ءبىز, ارينە, بۇل «اۋناتۋ جورالعىسىنا» سەنبەس ەدىك. بالا كۇنىمىزدە باستان وتكەن جاي جادىمىزدا جاڭعىرىپ, ونى اكەمىزدەن سۇراپ, ناقتىلاپ العان سوڭ بارىپ جازىپ وتىرمىز. بىلۋىمشە, قاسيەتى جۇقسىن دەپ اۋليەلى توپىراققا دا اۋناتا بەرەتىن بالانى.
«تۇلپار اۋناعان جەردە تۇك قالادى» دەپ تەگىن ايتپايدى. سول تۇك پەن قۇت بويىنا ءبىتسىن دەپ تۋعان جەردىڭ اۋليەلى توپىراعىنا اۋناتاتىن جورالعى قازىر ۇمىت قالعان شىعار. الدە قازاقىلىعى قالىڭ ايماقتاردا ساقتالۋى دا مۇمكىن, كىم ءبىلىپتى.
