– مەن ءوز تاراپىمنان رەفەرەندۋمعا شىعارىلاتىن ماسەلە عانا ەمەس, سونداي-اق مۇنداي رەفەرەندۋمدى وتكىزۋ دە ماڭىزدى ەكەنىن اتاپ وتەر ەدىم. ويتكەنى تمد جانە ورتالىق ازيا ەلدەرىندە قازاقستان – مۇنداي ماسەلە بويىنشا رەفەرەندۋم وتكىزگەن ءبىرىنشى جانە جالعىز مەملەكەت. رەفەرەندۋم وتكىزۋ فاكتىسىنىڭ ءوزى ازاماتتار, قوعام جانە مەملەكەت اراسىنداعى ديالوگتىڭ اۋقىمى ارتقانىن كورسەتەدى. مەنىڭشە, بۇل – جاڭا ساياسي مادەنيەتتى قالىپتاستىرۋداعى ماڭىزدى ءسات, – دەپ ءتۇسىندىردى ە.قارين.
ال وسىدان بىرنەشە كۇن بۇرىن ە.قارين ءوزىنىڭ Telegram-ارناسىندا اتوم ەلەكتر ستانساسىن سالۋ جونىندەگى رەفەرەندۋم ەڭ ۇزاق ناۋقانداردىڭ ءبىرى رەتىندە تاريحتا قالاتىنىن جازعان ەدى. مەملەكەتتىك كەڭەسشى ەلىمىزدە اتوم ەلەكتر ستانساسىن سالۋ ماسەلەسىنە قاتىستى رەفەرەندۋم اياسىندا تۋرا 400 كۇنگە سوزىلعان اقپاراتتىق-ءتۇسىندىرۋ جۇمىسىن ەلىمىزدىڭ ساياسي تاريحىنداعى ەڭ ۇزاق ناۋقان دەۋگە تولىق نەگىز بار ەكەنىن اتاپ ءوتتى.
«نەگە 400 كۇن؟ سەبەبى مەملەكەت باسشىسى رەفەرەندۋم وتكىزۋ تۋرالى يدەياسىن 2023 جىلعى 1 قىركۇيەكتە كەزەكتى جولداۋىندا ايتتى. ءدال سول كۇنى رەفەرەندۋمعا قاتىستى اۋقىمدى جۇمىس باستالدى دەۋگە بولادى. وسى ۋاقىت ىشىندە ءار ايماقتا قوعامدىق تىڭداۋ ۇيىمداستىرىلدى, اقپارات كەڭىستىگىندە ساراپشىلار مەن قوعام بەلسەندىلەرى جان-جاقتى پىكىر الماستى. جالپى, وسى ناۋقان بايسالدى تۇردە, ءوزارا تۇسىنىستىك جاعدايىندا ءوتتى», دەدى ول ءوز Telegram-ارناسىندا.
سونداي-اق ول رەفەرەندۋم كەزىندە ەلىمىزدەگى قوعامدىق كۇشتەر العاش رەت ساياسي ەمەس, ەكونوميكالىق مۇددە تۇرعىسىنان كۇش-جىگەرىن بىرىكتىرگەنىن اتاپ ءوتتى.
