سۋرەتتى تۇسىرگەن – ەرلان ومار, «EQ»
رەفەرەندۋم وتكىزۋ – دەموكراتيانىڭ اجىراماس بولىگى. ەلىمىزدە دە حالقىمىزدى تولعاندىرعان وزەكتى تاقىرىپتاردى قوعاممەن بىرلەسە شەشۋ ءداستۇرى قالىپتاسىپ كەلە جاتقانىن اتاپ وتكەن ءجون. 2022 جىلى كونستيتۋتسيالىق وزگەرىستەرگە بايلانىستى رەفەرەندۋم وتسە, ەندى مىنە, ەلدىڭ الەۋمەتتىك, ەكونوميكالىق, ەنەرگەتيكالىق دامۋىنا قاتىستى جالپىحالىقتىق رەفەرەندۋم ءوتىپ وتىر. اتالعان ۇدەرىستەر – ەلىمىزدىڭ دەموكراتيالىق قۇندىلىقتاردى ورنىقتىرۋعا, جاڭا ساياسي ءداستۇر مەن مادەنيەتتى قالىپتاستىرۋعا باعىتتالعان جۇيەلى دامۋىنىڭ ءبىر ايعاعى.
وسى ورايدا ەلدىك ماسەلەگە بەيجاي قاراماي, ءوزىنىڭ كونستيتۋتسيالىق قۇقىن قولدانا وتىرىپ, ماڭىزدى شەشىم قابىلداۋعا حالقىمىز بەلسەندى اتسالىسقانىن دا اتاپ وتكەن ءجون. بۇل ازاماتتىق قوعامنىڭ دامۋى جولىنداعى وڭ ءۇردىس دەسەك بولادى.
قازىرگى تاڭدا اۋىل اكىمدەرىن سايلاۋ, 2025 جىلدان باستاپ اۋدان مەن وبلىستىق ماڭىزى بار قالا اكىمدەرىن سايلاۋ سياقتى ماڭىزدى رەفورمالار ۇدەرىسى ءوتىپ جاتىر. مۇنىڭ بارلىعى دا جەرگىلىكتى مەملەكەتتىك باسقارۋ تەتىكتەرىن زامانعا ساي جەتىلدىرۋگە باعىتتالعان وزگەرىستەر, حالقىمىزدىڭ مەملەكەتتىك باسقارۋ تەتىكتەرىنە قاتىسۋىن ارتتىراتىن رەفورمالار.
جوعارىدا اتالعان ۇدەرىستەردى سارالاي كەلە, ەلىمىز دەموكراتيالىق دامۋ جولىندا رەفورمالار پاكەتىن جۇيەلى تۇردە ىسكە اسىرىپ كەلەدى دەپ ايتۋعا نەگىز بار.
باۋىرجان سەرىكباەۆ,
قازاقستان قوعامدىق دامۋ ينستيتۋتىنىڭ ساراپشىسى
