كۇنى كەشە قازان ايىنىڭ 1-ءى كۇنى 90 جاسقا تولعان ەڭبەك ارداگەرى وسى جاسقا كەلگەنشە قوعامدىق-ساياسي ومىردەن قول ۇزگەن ەمەس.
«رەفەرەندۋم دەگەن – ەلدىك شارۋا. قاسىم-جومارت توقاەۆ پرەزيدەنتتىككە كەلگەلى بەرى ەلىمىزدە ەكىنشى رەت رەفەرەندۋم ءوتىپ وتىر. بۇل – ەل تاعدىرىنا قاتىستى ماسەلەدە حالىقپەن اقىلداسۋدىڭ, ولاردىڭ پىكىرىمەن ساناسۋدىڭ بەلگىسى دەپ ويلايمىن. سوندىقتان وتباسىممەن, بالا-كەلىن, نەمەرەلەرىممەن كەلىپ ءوز تاڭداۋىمىزدى جاسادىق», دەيدى اتاقتى گەولوگ-بارلاۋشى.
تۇرسىنعالي اقساقال كەزىندە باكۋدىڭ م.ازيزبەكوۆ اتىنداعى پوليتەحنيكالىق ينستيتۋتىن بىتىرگەن ماڭعىستاۋلىق العاشقى بۇرعىشى-ينجەنەر. جەتىباي كەن ورنىن اشۋشى كەن بارلاۋشىلارىنىڭ ءبىرى, تەك جەتىباي ەمەس, سوعان ىلەسە اشىلعان بىرنەشە كەن ورىنداردا تۇرسىنعالي كوشەنوۆتىڭ تابان ەت, ماڭداي تەرى جاتىر.
تۇرسىنعالي كوشەنوۆ 1934 جىلى كۇز ايىندا فورت-شەۆچەنكو قالاسىنان 35 شاقىرىم جەردەگى تامشالى دەگەن جەردە دۇنيەگە كەلگەن. 1954 جىلى 10 سىنىپتى ۇزدىك ءبىتىرىپ, باكۋ قالاسىنداعى م.ازيزبەكوۆ اتىنداعى ازەربايجان يندۋستريالدىق ينستيتۋتىنىڭ «مۇناي جانە گاز كەڭ ورىندارىن يگەرۋ» فاكۋلتەتىنىڭ ستۋدەنتى اتاندى.
1959 جىلى ينستيتۋتتاعى وقۋىن ءبىتىرىپ, اتىراۋ قالاسىنداعى باتىس قازاقستاننىڭ گەولوگيالىق باسقارماسىنا جولداما الىپ, سول جىلى ماڭعىستاۋعا قايتا ورالدى. تامىز ايىندا «ماڭعىشلاقمۇنايگازبارلاۋ» ترەسىندە جاڭادان اشىلعان تۇبىجىك كەن ورنىنا بۇرعىشى شەبەرى بولىپ ەڭبەك جولىن باستادى. سودان باستاپ, وسى سالادا جارتى عاسىردان استام ۋاقىت باسشىلىق قىزمەت ەتىپ, ءوز ماماندىعىنىڭ مايتالمانى اتانعان.
ماڭعىستاۋدىڭ ەڭ العاشقى مۇناي ينجەنەرى بۇگىندە زايىبى حانشايىم جۇسىپوۆامەن بىرگە ۇلاعاتتى ۇرپاق ءوسىرىپ, نەمەرە مەن شوبەرەنىڭ قىزىعىن كورىپ وتىر.
ماڭعىستاۋ وبلىسى
