ءتورت كۇن بويى تەاتر ساحناسىندا ۇلتتىق جانە الەمدىك ۇزدىك شىعارمالار ساحنالانىپ, داۋىرلەر شەجىرەسىن جەتكىزدى. فەستيۆالعا گرۋزيا, يران, تاتارستان, قىرعىز مەملەكەتتەرىمەن قاتار قازاقستاننان بارلىعى 8 تەاتردان 200-گە جۋىق ساحنا شەبەرى ونەر كورسەتىپ, ماڭعىستاۋ جۇرتشىلىعىنىڭ ىقىلاسىنا بولەندى.
«Abish alemi» III حالىقارالىق تەاتر فەستيۆالىنىڭ ساراپتامالىق كەڭەس مۇشەلەرى قاتارىندا قازاقستاننىڭ حالىق ءارتىسى ءاسانالى ءاشىموۆ, م.اۋەزوۆ اتىنداعى قازاق ۇلتتىق اكادەميالىق دراما تەاترىنىڭ ديرەكتورى, تەاتر سىنشىسى ەركىن جۋاسبەك, تەاترتانۋشى, ونەرتانۋ كانديداتى, قازاق ۇلتتىق ونەر اكادەمياسىنىڭ تەاترتانۋ فاكۋلتەتىنىڭ پروفەسسورى باقىت كاكيقىزى, تەاترتانۋشى, تەاتر سىنشىسى, ونەرتانۋ كانديداتى ايسۇلۋ ساعيتوۆا, تۇركيادان كەلگەن رەجيسسەر بيركان گۇرگون تورەلىك ەتتى. سونىمەن قاتار تۇركسوي باس حاتشىسى سۇلتان راەۆ, ءاسانالى ءاشىموۆ اتىنداعى «ونەر مەن مادەنيەتتى قولداۋ» قورىنىڭ ءتورايىمى باعدات ءاشىموۆا, «قۇرمەت» وردەنىنىڭ يەگەرى, جازۋشى جابال ەرعاليەۆ, ءابىش كەكىلباەۆتىڭ وتباسى مۇشەلەرى, قازاقستاننىڭ ەڭبەك سىڭىرگەن قايراتكەرى نۇرنياز مۇحانوۆ فەستيۆال كەڭەسشىسى رەتىندە قاتىستى.
– سپەكتاكلدەردى تاماشالاي وتىرىپ, ەسىمى حح عاسىرداعى ەڭ ۇزدىك ءجۇز جازۋشىنىڭ قاتارىنا ەنگەن قارىمدى قالامگەردىڭ شوقتىقتى شىعارمالارىن ينستسەنيروۆكالاپ, وزگە تىلدەرگە اۋدارىپ, تەاترلار رەپەرتۋارىنا ەنگىزۋدە, كينوەكرانعا شىعارۋدا الدا ۇلكەن مىندەتتەر تۇرعانىن ۇقتىق. وسى ورايدا قالامگەردىڭ «شىڭىراۋ», «كۇي», ء«بىر شوكىم بۇلت», تاعى دا باسقا پروزالىق تۋىندىلارىن ساحناعا لايىقتاپ, كورەرمەن ىقىلاسىنا بولەنىپ جۇرگەن ءجانتورين اتىنداعى تەاتر ۇجىمىنىڭ ەڭبەگىن اتاپ كورسەتكىم كەلەدى. ەگەر ءبىز وبلىستىق مۋزەيدى ابەكەڭ شاڭىراعىنىڭ شىراقشىسى دەسەك, ن.ءجانتورين تەاترىن ابەكەڭ شىعارمالارىنىڭ جوقشىسى مەن جارشىسى دەۋگە تولىق نەگىز بار. داڭقتى ءسوز شەبەرى, كەمەڭگەر مەملەكەت قايراتكەرىنىڭ 85 جىلدىعىن اتاپ ءوتۋ جازۋشىنىڭ تۋعان كۇنى قارساڭىندا ەلورداداعى مەرەكەلىك ءىس-شارالارمەن قورىتىندىلانادى.
جانتوريندىكتەر ابەكەڭنىڭ وزدەرى ساحنالاعان ءتورت شىعارماسىمەن وسى ءىس-شاراعا قاتىسۋعا شاقىرتۋ الىپ وتىرعانى – ءبارىمىز ءۇشىن مارتەبە. جازۋشىنىڭ رۋحاني مۇراسى حالقىمەن بىرگە جاساي بەرەدى, – دەدى ماڭعىستاۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى نۇرتاس سالي.
ساراپشىلار شەشىمىمەن ىرىكتەۋ كەزەڭىنەن وتكەن يران, تاتارستان, قىرعىزستان, گرۋزيا ەلىنىڭ تەاترلارى جانە قازاقستاننىڭ استانا, الماتى, كوكشەتاۋ جانە ورال قالالارىنان قاتىسۋشى تەاترلار «ۇزدىك تەاتر» اتالىمىمەن ماراپاتتالدى. سونداي-اق «Abish alemi» تەاتر فەستيۆالىنىڭ «ۇزدىك ەپيزودتىق بەينەسى» ارنايى جۇلدەسىمەن «نە پلاچ, كوگدا يا ۋمرۋ» سپەكتاكلىندەگى ميكايل ءرولى ءۇشىن گرۋزيا رەسپۋبليكاسىنىڭ گەيدار اليەۆ اتىنداعى تبيليسي ازەربايجان كاسىبي مەملەكەتتىك دراما تەاترىنىڭ ءارتىسى تورعاي ۆاليزادە, «ۇزدىك ەكىنشى پلانداعى ەر ادام بەينەسى» ارنايى جۇلدەسىمەن «ەلەكترا» سپەكتاكلىندەگى اگامەننون ءرولى ءۇشىن جالال شاحبازنەزاد (يران تەاترى), «ۇزدىك ەكىنشى پلانداعى ايەل ادام بەينەسى» ارنايى جۇلدەسىمەن شىڭعىس ايتماتوۆتىڭ «عاسىردان دا ۇزاق كۇن» رومانى بويىنشا «مان» سپەكتاكلىندەگى نايمان انا ءرولى ءۇشىن انارباەۆا جىلدىز (قىرعىز رەسپۋبليكاسى), «ۇزدىك ەر ادام بەينەسى» جۇلدەسىمەن «ليۋبيش, نە ليۋبيش» سپەكتاكلىندەگى شال ءرولى ءۇشىن تاتارستان رەسپۋبليكاسىنىڭ حالىق ءارتىسى ح.حامماتۋللين, «ۇزدىك ايەل ادام بەينەسى» جۇلدەسىمەن «قارالى سۇلۋ» سپەكتاكلىندەگى قاراگوز ءرولى ءۇشىن باتىس قازاقستان وبلىسىنان كەلگەن ءارتىس ح.شامەلوۆا, «ۇزدىك رەجيسسۋرا» جۇلدەسىمەن «ستانتسيوننىي سموتريتەل» سپەكتاكلى ءۇشىن كوكشەتاۋلىق ت.كۋلوۆ, «ۇزدىك اكتەرلىك انسامبل» جۇلدەسىمەن الماتى قالاسىنان كەلگەن «يەرما» سپەكتاكلى, «ۇزدىك سپەكتاكل» جۇلدەسىمەن «ستانتسيوننىي سموتريتەل» كوكشەتاۋلىق سپەكتاكلى ماراپاتتالدى. سونداي-اق تۇركسوي حالىقارالىق ۇيىمىنىڭ باس حاتشىسى سۇلتان راەۆ ءىىى حالىقارالىق «Abish alemi» تەاتر فەستيۆالىنە قولداۋ ءبىلدىرىپ, بىرنەشە مارتە ۇيىمداستىرۋعا مۇمكىندىك بەرگەنى ءۇشىن ماڭعىستاۋ وبلىسىنىڭ اكىمدىگىن جانە تەاتر سالاسىنىڭ بىرنەشە مامانىن تۇركسوي حالىقارالىق ۇيىمىنىڭ العىسحاتىمەن جانە توسبەلگىسىمەن ماراپاتتادى.
«جاقسىنىڭ شاراپاتى ەلگە تيەدى» دەگەندەي, ارامىزدا بولماعانىمەن, شىعارمالارى ارقىلى حالقىنىڭ جۇرەگىنە جول تاپقان جازۋشى عۇمىرى ماڭگى.
ماڭعىستاۋ وبلىسى
