سۋرەتتى تۇسىرگەن – دميتري ەروفەەۆ
جاڭا وتاندىق ءونىمنىڭ ساپاسى حالىقارالىق ستاندارتتارعا تولىقتاي ساي. پوليەتيلەن قۇبىرلارى تابيعاتتىڭ كەز كەلگەن قىتىمىر جاعدايىنا توتەپ بەرە الادى. ءارى جوعارى-تومەندى تەمپەراتۋراداعى ىستىق پەن سۋىققا بىردەي ءتوزىمدى. بۇگىندە پوليەتيلەن قۇبىرلارىن پايدالانبايتىن سالا كەمدە-كەم. جوعارىدا ايتقان سۋ, گاز, كارىز جەلىلەرى مەن تەلەكوممۋنيكاتسيا سالاسىنان بولەك, ونىڭ قۇرىلىس, مۇناي-گاز وندىرىسىنە دە تيگىزەتىن پايداسى كول-كوسىر.
«سۋ, گاز جەلىلەرىنە قاجەتتى ديامەترى 15 مم-دەن 160 مم-گە دەيىنگى, ۇزىندىعى تاپسىرىس بەرۋشىنىڭ ولشەمى نەگىزىندە دايىندالاتىن قۇبىرلار شىعارامىز. تاۋارلارىمىزدىڭ ساپاسى حالىقارالىق تالاپقا ساي», دەيدى «پوليممەر Piرە» جشس قۇرىلتايشىسى نۇرداۋلەت اقكوز.
«قازىر قۇبىر وندىرەتىن شيكىزاتتاردى يران, قىتاي, رەسەي ەلدەرىنەن اكەلىپ وتىرمىز. الداعى ۋاقىتتا قاجەتتى شيكىزات شىعاراتىن زاۋىتتى ءوزىمىز اشساق دەگەن دە وي بار. ماقساتىمىز ورىندالسا, ءونىم باعاسى ارزانداپ, سۇرانىس ارتادى», دەدى ول.
ءونىم ەكولوگيالىق تۇرعىدان تازا. قولدانىلۋ مەرزىمى 50 جىلدان اسىپ تۇسەدى. ەلدى مەكەندەردى ساپالى سۋمەن قامتىپ, تولىق گازعا كوشىرۋ ىسىندە پوليەتيلەن قۇبىرلار سۇرانىس پەن قاجەتتىلىكتى وتەي الادى.
«قۇبىر وندىرۋگە جوعارى, ورتا, تومەن قىسىمدى پوليەتيلەن قولدانىلادى. كوبىندە سۋ مەن گاز جەلىسىن تارتۋعا قولدانىلاتىن تومەن قىسىمدى پوليەتيلەن شيكىزاتىن پايدالانامىز. جۇمىس بارىسى بىرنەشە بولىككە بولىنەدى. ءار قۇرىلعىنىڭ ءوز قىزمەتى بار. ءبىرى شيكىزاتتى سورعىش ارقىلى ستانوكقا جەتكىزسە, ەكىنشىسى بالقىتادى, سۋىتادى, ءۇشىنشىسى قۇبىر شەتىنە ءتۇرلى ءتۇستى سىزىقتاردى ورنەكتەيدى, ءارى قاراي زاۋىت اتاۋىن, وندىرىلگەن ۋاقىتىن, باسقا دا قوسىمشا اقپاراتتاردى لازەر ارقىلى قۇبىر بەتىنە تاڭبالايدى», دەيدى زاۋىت جۇمىسشىسى ۆياچەسلاۆ كوزىرەۆ.
جوبا يەلەرى الداعى ۋاقىتتا ءوندىرىس قۋاتىن ۇلعايتۋدى كوزدەپ وتىر. مۇنداي جاعدايدا ولار ديامەترى 160 ميلليمەترلىك پوليەتيلەن قۇبىر شىعارۋمەن شەكتەلىپ قالمايدى. وندىرىسكە تىڭ, جاڭاشا كوزقاراس قاجەت. وسى رەتتە كاسىپورىندا ءوندىرىس قۋاتىن جوعارىدا ايتىلعان كولەمدە كوتەرۋ باعىتىندا ناقتى ءىس-شارالار بەلگىلەنگەن. سونىڭ ءبىرى – ديامەترى الدىڭعى ونىمنەن ەكى ەسە ۇلكەن پوليەتيلەن قۇبىرلار شىعارۋ. مۇنىڭ سىرتىندا اينەك پەن تالشىقتىڭ قوسپاسىنان جاسالعان قۇبىر جوباسىن دا ويلاستىرىپ وتىر.
جەتىسۋدا شاعىن جانە ورتا بيزنەستە ءونىم مەن قىزمەت كورسەتۋ كولەمى وتكەن جىلدىڭ سايكەس مەرزىمىمەن سالىستىرعاندا ەداۋىر وسكەن. سالانى قارجىلىق قولداۋ شەڭبەرىندە 7,4 ملرد تەڭگە بولىنگەن. بۇل سەكتوردا 60 مىڭ سۋبەكتى بار, وندا 108 مىڭنان اسا ادام جۇمىس ىستەيدى. بۇگىندە 12,2 ملرد تەڭگەگە 201 جوبا ماقۇلدانعان.
جەتىسۋ وبلىسى
