شاعىن اۋدانداعى جاڭا ەمدەۋ مەكەمەسى كۇنىنە 100-دەن استام ادامعا دارىگەرلىك كومەك كورسەتەدى. مۇنىڭ سىرتىندا ءتۇرلى ناۋقاستارعا جەڭىل-جەلپى وپەراتسيا دا جاساي بەرەدى. مۇندا وپەراتسيا زاماناۋي ۋلترادىبىستى, لازەرلى قۇرىلعىلارمەن جۇرگىزىلەدى. كوپسالالى كلينيكانىڭ جاتىپ ەمدەلەتىن ناۋقاستارعا ارنالعان 35 توسەكتىك ورنى بار. سونداي-اق دياگنوستيكالىق بولىمشەسى دە جۇمىس ىستەپ تۇر.
«وپەراتسيا جاسايتىن ەكى ارنايى بولمەمىز بار. جىل اياعىنا دەيىن 2 مىڭعا جۋىق وپەراتسيا جاسايمىز دەپ جوسپارلاپ وتىرمىز. مەديتسينالىق ساقتاندىرۋ قورىمەن كەلىسىمشارت اياسىندا تۇرعىنداردى تەگىن قابىلدايتىن بولامىز. كەرەكتى قۇرىلعىلاردىڭ ءبارى, ءتيىستى ليتسەنزيالار بار. دارىگەر ماماندار دا جەتكىلىكتى. ءوزىم حيرۋرگپىن. مەن وپەراتسيا جاساۋمەن قوسا, قالقانشا بەزىن ەمدەيمىن. ءبىز مەملەكەت-جەكەمەنشىك ارىپتەستىگى اياسىندا جۇمىس ىستەيمىز. قازىر كلينيكالاردىڭ كوبى كوممەرتسيالىق نەگىزدە اقىلى قىزمەت كورسەتەدى. ال ءبىز مىندەتتى مەديتسينالىق ساقتاندىرۋ قورىمەن تىعىز بايلانىس ورناتىپ, ناۋقاستارعا تەگىن قىزمەت كورسەتۋگە دايىنبىز», دەيدى مەديتسينالىق ورتالىقتىڭ باس دارىگەرى ۆيكتور گاۆريلوۆ.
مەديتسينالىق ورتالىقتىڭ اشىلۋ سالتاناتىنا ايماق باسشىسى قۇمار اقساقالوۆ پەن قالا اكىمى مارات جۇندىباەۆ قاتىستى.
«اۋەجاي» شاعىن اۋدانىندا اشىلعان جاڭا مەديتسينالىق ورتالىق ەڭ الدىمەن, وسى ماڭايدا تۇرىپ جاتقان تۇرعىندارعا ىڭعايلى بولماق. ءبىز «يۋبيلەينىي», «بەرەكە» شاعىن اۋداندارىنداعى ەمحانالاردى قوسا العاندا, جاڭا نىساندار سالۋدى جالعاستىرامىز. الداعى ۋاقىتتا مۇنداي مەديتسينالىق مەكەمەلەر سانى كوبەيەدى. مۇنداي ورتالىقتاردىڭ ءجيى اشىلىپ جاتقانى – جاقسى ءۇردىس. بۇل – حالىق دەنساۋلىعىن نىعايتۋدىڭ بىردەن-ءبىر كەپىلى. قازىر اۋىل مەديتسيناسىن وركەندەتۋگە دە ەرەكشە كوڭىل ءبولىنىپ وتىر. بيىلدىڭ وزىندە وبلىس كولەمىندە 25 دەنساۋلىق ساقتاۋ مەكەمەسىنىڭ قۇرىلىسى اياقتالادى», دەدى وبلىس اكىمى.
تۇرعىندارعا قولايلى جاعداي جاساۋ ماقساتىندا جاڭا مەديتسينالىق ورتالىقتىڭ جانىنان №2 قالالىق ەمحانانىڭ فيليالىن اشۋ جوسپارلانىپ وتىر.
مەديتسينالىق مەكەمە كوپقاباتتى تۇرعىن ءۇيدىڭ استىڭعى قاباتىنا ورنالاسقان. سالتاناتتى راسىمدە قالا اكىمى وسى ماڭايداعى ۇيلەردى تۇرعىزعان «KBS» قۇرىلىس كومپانياسىنىڭ الداعى ۋاقىتتا ءدال وسى شاعىن اۋداننىڭ اۋماعىنان ۇلكەن ەمحانا سالۋدى جوسپارلاپ وتىرعانىن ايتتى.
«ارينە, مەديتسينالىق كومەك ۇنەمى كەرەك. ول جاقىن ءارى جايلى بولسا تىپتەن ءتيىمدى. وسى ماڭايدا №2 مەكتەپ تە سالىنىپ جاتىر. بالاباقشا, ساۋدا ورىندارى دا بوي كوتەرەدى. تۇرعىنداردىڭ قاتارى جىل وتكەن سايىن ءوسىپ جاتىر. سوندىقتان الەۋمەتتىك نىسانداردىڭ بارلىعى دا حالىققا قاجەت. اشىلعان ورتالىق تەك ەمدەۋ جۇرگىزىپ قانا قويمايدى, قان ساراپتاماسىن الاتىن جەكە زەرتحانا دا بولادى», دەدى قالا اكىمى مارات جۇندىباەۆ.
قوستاناي وبلىسى
