فوتو: ن.بايبۋلين
سەناتتىڭ ءباسپاسوز قىزمەتىنىڭ ءمالىم ەتۋىنشە, ماۋلەن اشىمباەۆ ءوز سوزىندە ءياساۋيدىڭ ەسىمى بىرەگەي تاريحي تۇلعا رەتىندە بۇكىل الەمگە بەلگىلى ەكەنىن اتاپ, حالىقارالىق كونفەرەنتسيا وتكىزۋ ەرەكشە مانگە يە ەكەنىن ايتتى. سونداي-اق سەنات توراعاسى عۇلامانىڭ ادامزاتتى ىزگىلىك پەن مەيىرىمدىلىككە شاقىراتىن ەڭبەكتەرىن جان-جاقتى زەردەلەۋگە مەملەكەت باسشىسى ۇنەمى باسا ءمان بەرىپ كەلە جاتقانىنا توقتالدى.
«پرەزيدەنتىمىز ۇلتتىق قۇرىلتايدىڭ وتىرىسىندا يسلام ءدىنىنىڭ ۇلى دالا تورىندە جانە تۇركى الەمىندە تارالىپ, تامىر جايۋىنا وراسان زور ۇلەس قوسقان قوجا احمەت ءياساۋيدىڭ مۇرالارىن تەرەڭ زەردەلەپ, دارىپتەۋگە ايرىقشا نازار اۋدارۋدى تاپسىردى», دەپ, سەنات سپيكەرى كونفەرەنتسياعا قاتىسۋشىلارعا ءىلتيپات ءبىلدىردى.
ماۋلەن اشىمباەۆ سونىمەن قاتار, ياساۋي قازاق حالقىنىڭ عانا ەمەس, باۋىرلاس ەلدەردىڭ بىرلىگىن بەكەمدەۋ ىسىندە ماڭىزدى ءرول اتقاراتىن تۇتاس تۇركى الەمىنە ورتاق تۇلعا ەكەنىن ايتتى. سونداي-اق ول ويشىلدىڭ ەڭبەگى – رۋحاني ديالوگ پەن مادەنيەتارالىق جانە دىنارالىق كەلىسىمنىڭ التىن كوپىرى بولاتىنىنا سەنىم ءبىلدىردى.
«قوجا احمەت ياساۋي تۇركى جەرىندە يسلام وركەنيەتىنىڭ دامۋىنا زور ىقپالىن تيگىزدى. ءياساۋيدىڭ «ديۋاني حيكمەت» اتتى ەڭبەگى – بارشامىز ءۇشىن قۇندى جادىگەر. ول وسيەتتەرىمەن ادامزاتتى ىزگىلىككە, باۋىرمالدىققا, ادال ەڭبەككە شاقىرادى. ءياساۋيدىڭ حيكمەتتەرى بەيبىتشىلىك پەن سابىرلىققا تابان تىرەيدى. ول ءوزىنىڭ شىعارمالارىندا ادامگەرشىلىك پەن يماندىلىقتى ۇلىقتاپ, حالىقتى تاتۋلىققا ۇندەيدى. وسى رەتتە مۇنىڭ ءبارى استانادا وتكىزىلىپ كەلە جاتقان الەمدىك جانە ءداستۇرلى دىندەر كوشباسشىلارى سەزىنىڭ يدەيالارىمەن ۇندەس ەكەنىن ايتا كەتكەن ابزال», دەدى ماۋلەن اشىمباەۆ.
اۋقىمدى ءىس-شاراعا دەپۋتاتتارمەن بىرگە مادەنيەت جانە اقپارات مينيسترلىگىنىڭ وكىلدەرى, شەتەلدىك جانە وتاندىق تۇركىتانۋشى عالىمدار, شىعىستانۋشىلار, ساراپشىلار, زيالى قاۋىم وكىلدەرى, قوعام قايراتكەرلەرى قاتىستى.
