بىتىمگەر ايەلدەردىڭ سانى ارتادى

بۇۇ قاۋىپسىزدىك كەڭەسىنىڭ 1 325 قارارى 2000 جىلى قابىلدانعان. وندا ايەلدەر جانجالداردى بولدىرماۋعا, ونى رەتتەۋگە, بەيبىتشىلىك پەن قاۋىپسىزدىكتى قام­تاماسىز ەتۋگە ەرلەرمەن تەڭ قۇقىلى ەكەنى ايتىلعان.

قازىر قولدانىستاعى بۇۇ قك قارار­لارىن ىسكە اسىرۋ جونىندەگى ۇلتتىق ءىس-قيمىل جوسپارى ايەلدەرگە قاتىستى زورلىق-زومبىلىقتى جويۋ ماسەلەلەرىنە باسىمدىق بەرەدى. وندا, اسىرەسە قاۋىپ­سىزدىك كۇشتەرى مەن بىتىمگەرشىلىك ميسسيا­لارداعى ايەلدەردىڭ سانىن ارتتىرۋ­دىڭ ناقتى قادامدارى جازىلعان. سونداي-اق بەلگىلى ءبىر ايماقتاعى راديكاليزم مەن تەرروريستىك ۇيىمدارعا قاتىسۋدى جويۋ ءىس-شارالارىنا قاتىسۋى دا ايتىلعان.

ال جاڭارتىلعان جوسپاردا بۇل ماسە­لەلەر تەرەڭدەتىلىپ, ايەلدەردىڭ ءرولىن ودان ءارى ارتتىرا تۇسەدى.

– ۇلتتىق ءىس-قيمىل جوسپارى بولاشاقتا كليماتتىڭ وزگەرۋى, سۋ تاپشىلىعى داعدا­رىسى جانە ەكولوگيالىق اپاتتار ارا­سىنداعى بايلانىستى قامتيدى. ايەلدەر مەن قوعامدىق ۇيىمداردىڭ بىتىمگەرشىلىك كۇش-جىگەرىنە ۇلەس قوسۋداعى ءرولىن ارتتىرۋ جانە ولاردىڭ قاتىسۋى مەن كوش­باسشىلىعىن قولداۋ ءۇشىن قاراجات ءبولۋ قاراستىرىلعان. جالپى, ۇلتتىق ءىس-قيمىل جوسپارىن جۇزەگە اسىرۋعا قاجەتتى قارجى رەسۋرستارى ەسەپتەلىپ, ءار سالاعا بولىنەدى. جەرگىلىكتى دامۋ جوسپارلارى مەن توتەنشە جاعدايلارعا دايىندىق جوسپارلارى لوكاليزاتسيالانادى. ۇلتتىق جوسپار جاستار, بەيبىتشىلىك جانە قاۋىپسىزدىك ماسەلەسىن كۇن تارتىبىنە قويۋمەن تولىقتىرىلماق. سونداي-اق كيبەرقاۋىپسىزدىك, جانجالداردى الدىن الۋ جانە بەيبىتشىلىك ورناتۋعا جاڭا تاجىريبەلەردى پايدالانۋ ماسەلەلەرىن ەنگىزۋ قاراستىرىلعان, – دەدى بريفينگتە ەۋروپا جانە ورتالىق ازياداعى بۇۇ ايەلدەر ايماقتىق كەڭسەسى, ايەلدەر بەيبىتشىلىگىن قورعاۋ ساياساتى جونىندەگى كەڭەسشىسى نارگيس ازيزوۆا.

قازاقستاندا ستاتيستيكا بويىنشا ايەلدەردىڭ سانى ەرلەرمەن سالىس­تىرعاندا كوپ بولعانىمەن سالالىق ۆەدومستۆولاردا, كوشباسشىلىق قىزمەتتە جۇمىس ىستەيتىن ايەلدەر ۇلەسى از. ماسەلەن, قورعانىس مينيسترلىگىنىڭ اقپاراتىنا سايكەس, ەلدە 6 802 ايەل اسكەري قىزمەتتە ەڭبەك ەتەدى. ولاردىڭ اراسىندا 863 وفيتسەر, 31 پولكوۆنيك, 112 پودپولكوۆنيك, 235 مايور, 173 اعا لەيتەنانت, 150 لەيتەنانت بار. ال ىشكى ىستەر ورگاندارىندا 11 مىڭ ايەل قىزمەت ەتىپ, سالاداعى قىزمەتكەرلەردىڭ 15 پايىزىن قۇراپ وتىر.

سونداي-اق بۇۇ-نىڭ بىتىمگەرشىلىك ميسسيالارىندا 8 ايەل اسكەري قىزمەتتە ءجۇر. ولار باتىس ساحارا مەن گولان جوتالارىندا قىزمەت اتقارادى.