فوتو: استانا اكىمدىگى
«مۇمكىندىگى شەكتەۋلى جاندارمەن جانە قوعامدىق ۇيىمداردىڭ وكىلدەرىمەن, سول سياقتى ەرەكشە بالالاردى تاربيەلەپ وتىرعان اتا-انالارمەن تۇراقتى تۇردە كەزدەسىپ تۇرامىن. بىرلەسە وتىرىپ, ەرەكشە قاجەتتىلىكتەرى بار ادامداردىڭ ءومىر ءسۇرۋ جاعدايىن جاقسارتامىز.
كەزدەسۋدە ينۆاتاكسي, حالىقتىڭ قاۋقارى از توپتارى ءۇشىن قولجەتىمدى ورتا, تروتۋارلار مەن ايالدامالاردىڭ ىڭعايلىلىعى جانە ت.ب. ماسەلەلەردى تالقىلادىق. جاڭا قوعامدىق كەڭىستىكتەر مەن اۋلالاردى, جاياۋ جۇرگىنشىلەر تروتۋارلارى مەن جولداردى اباتتاندىرۋ بارىسىندا بارلىق ساناتتاعى ادامداردىڭ مۇددەلەرىن ەسكەرەمىز», دەپ جازدى قالا اكىمى جەلىدەگى پاراقشاسىندا.
جەڭىس قاسىمبەك قالاداعى ينۆاتاكسي قىزمەتىنە قاتىستى اقپارات ۇسىندى. ول ەلوردادا جىل سايىن ينۆاتاكسي سانى ارتىپ جاتقانىن تىلگە تيەك ەتتى.
«ماسەلەن, بۇرىن 50 كولىك بولسا, العاشقى كەزەڭدە 113 كولىككە دەيىن ارتتىردىق. قازىر ينۆاتاكسي سانى – 147. بىراق بۇل دا قالانىڭ قاجەتتىلىگىن تولىق قامتي المايدى. سول سەبەپتى ولاردىڭ سانىن ارتتىرۋدى ارى قاراي دا جالعاستىرامىز», دەلىنگەن جازبادا.
سونىمەن قاتار اكىم مەكتەپتەر مەن بالاباقشالاردا ينكليۋزيانى قولداۋ كابينەتتەرىن اشۋ, وسى ساناتتاعى ادامدارمەن جۇمىس ىستەۋ ءۇشىن مامانداردى وقىتۋ جۇمىستارى جالعاسىن تاباتىنىن ايتتى.
كەزدەسۋ بارىسىندا كوتەرىلگەن ماسەلەلەردى شەشۋ جۇمىسى قولعا الىندى», - دەپ جازدى ەلوردا اكىمى.
