جەتىسۋ وبلىسىنىڭ تۇرعىندارىمەن كەزدەسۋدە سەنات توراعاسى اەس سالۋ ماسەلەسىنە قاتىستى جالپىۇلتتىق رەفەرەندۋم «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدىڭ جارقىن كورىنىسى ەكەنىنە نازار اۋداردى. سونداي-اق پالاتا سپيكەرى بۇل باستامانىڭ ستراتەگيالىق سيپاتى مەن ەل ەكونوميكاسىنا تيگىزەر اسەرىنە توقتالىپ, الداعى رەفەرەندۋمدا ءاربىر ازاماتتىڭ داۋسى ماڭىزدى ءرول اتقاراتىنىن اتاپ ءوتتى.
«پرەزيدەنتىمىز قاسىم-جومارت توقاەۆ 6 قازاندا اتوم ەلەكتر ستانساسىن سالۋ ماسەلەسىنە قاتىستى رەسپۋبليكالىق رەفەرەندۋم وتكىزىلەتىنىن جاريالادى. سوعان سايكەس ءبىز وزدەرىڭىزبەن اتالعان باستامانى, جالپى ەنەرگەتيكا سالاسىن دامىتۋ باعىتتارىن تالقىلاۋعا ارنايى كەلىپ تۇرمىز. وسى اپتادا وتەتىن جالپىۇلتتىق رەفەرەندۋم قازاقستاننىڭ ودان ءارى دامۋى جولىندا ستراتەگيالىق ماڭىزعا يە. سوندىقتان ءبارىمىز جۇدىرىقتاي جۇمىلىپ, ەلىمىزدىڭ جانە وسكەلەڭ ۇرپاقتىڭ بولاشاعىنا زور اسەرىن تيگىزەتىن ماڭىزدى شەشىمدى بىرگە قابىلداۋىمىز كەرەك. بۇل رەتتە وتانداستارىمىزدى رەفەرەندۋمعا بەلسەندى قاتىسىپ, ءوز تاڭداۋلارىن جاساۋعا شاقىرامىن», دەدى م.اشىمباەۆ.
سونىمەن قاتار شتاب مۇشەلەرى اقپاراتتىق جۇمىس اياسىندا كوپبالالى انالار, مۇمكىندىگى شەكتەۋلى جاندار جانە الەۋمەتتىك از قامتىلعان ساناتتاعى ازاماتتار جۇمىس ىستەيتىن «ايسۇلۋ» تىگىن فابريكاسىنىڭ ۇجىمىمەن, قالا قۇرىلىسىمەن اينالىساتىن «تەمىربەتون» كاسىپورنىنىڭ قىزمەتكەرلەرىمەن كەزدەستى. جيىن بارىسىندا وتاندىق وندىرۋشىلەردى قولداۋ ماسەلەلەرى, وسى باعىتتاعى زاڭنامالىق نورمالار جانە رەفەرەندۋمنىڭ ماڭىزى كەڭىنەن تالقىلاندى. ءىس-شارالار كەزىندە ەڭبەك ۇجىمدارى ءوز پىكىرىن ءبىلدىرىپ, اتوم ەلەكتر ستانساسىنىڭ پايداسى مەن ودان تۋىندايتىن تاۋەكەلدەرگە نازار اۋداردى.
ءوڭىر تۇرعىندارىمەن كەزدەسۋدە وندىرىسكە قاجەتتى جاڭا تاسىلدەردى زەردەلەۋدىڭ, يننوۆاتسيالىق تەحنولوگيالاردى ەنگىزۋدىڭ يگىلىگى ءسوز بولدى.
