اشىق دەرەككوز
- جۇرەك اۋرۋلارىنىڭ جاسارۋ تەندەنتسياسى 80-جىلداردىڭ سوڭىنان باستاپ بايقالدى. ينفاركت شىنىمەن دە جاسارىپ كەتتى. ونىڭ نەگىزگى سەبەبى - ءبىزدىڭ ءومىر سالتىمىز. قازىر ءبىزدىڭ جاستار فاستفۋدپەن, كونسەرۆىلەنگەن ونىمدەرمەن, تىسكەباسارلارمەن تاماقتانادى. از قوزعالادى, كوبىنە كومپيۋتەر الدىندا وتىرىپ جۇمىس ىستەيدى. تۇندە ۇيالى تەلەفونعا قاراپ جاتادى دا, كۇندىز ۇيىقتايدى. كۇن ءتارتىبىن ساقتامايدى, - دەيدى مامان Massaget.kz تىلشىسىنە.
كارديولوگ ماقاشەۆا زۋلفيا ورتالىققا ميوكاردا ينفاركتىسىمەن 28-35 جاستاعى ناۋقاستار دا تۇسەتىنىن جاسىرمادى.
- تەمەكى تارتۋ, الكوگول ءىشۋ سەكىلدى زياندى ادەتتەر دە جۇرەك-قان تامىرلار اۋرۋلارىنىڭ پايدا بولۋ قاۋپىن ارتتىرادى. كوپ قوزعالماۋ, دۇرىس تاماقتانباۋ ارتىق سالماققا اكەلەدى. ال ارتىق سالماق - قاۋىپ فاكتورلارىنىڭ ءبىرى. سونداي-اق كۇيزەلىستىك جاعدايلاردىڭ تىكەلەي اسەرى بار. قازىر ءومىر قاربالاس. جاستار از ۋاقىتتىڭ ىشىندە بارىنە جەتكىسى كەلەدى. بۇل ولاردىڭ كۇيزەلىستىك جاعدايدا جۇرۋىنە ىقپال ەتەدى. بىزگە ميوكاردا ينفاركتىسىمەن 28-35 جاستاعى ناۋقاستار تۇسەدى, - دەيدى دارىگەر.
قازىر ەرەسەكتەر دە, جاسوسپىرىمدەر دە ەنەرگەتيكالىق سۋسىندار ىشەدى. دارىگەر ەنەرگەتيكالىق سۋسىنداردىڭ جۇرەككە قاۋپىن ءتۇسىندىرىپ بەردى.
- قازىر جاستار ەنەرگەتيكالىق سۋسىنداردى كوپ ىشەدى. ءتىپتى كۇنىنە 10 قۇتى ەنەرگەتيكالىق سۋسىن ىشەتىن جاستار بار. ولار مۇنداي سۋسىندار جۇمىس ىستەۋگە كومەكتەسەتىنىن ايتادى. سەبەبى تۇندە ۇيىقتامايدى, كۇندىز جۇمىسى بار.
ەنەرگەتيكالىق سۋسىنداردىڭ ىشىندە ارتەريالىق قىسىمنىڭ كوتەرىلۋىنە, جۇرەك ىرعاعىنىڭ بۇزىلۋىنا اكەلەتىن كوفەين جانە تاۋرين سەكىلدى ىنتالاندىرعىشتار بار. ولار جۇرەك سوعىسىن جيىلەتەدى. بىزدە جۇرەك سوعىسى مينۋتىنا 200-250-گە دەيىنگى پاروكسيزممەن تۇسەتىن جاس ناۋقاستار بار. بۇل نەسىمەن قاۋىپتى؟ ناۋقاس اريتميالىق شوكقا ءتۇسۋى نەمەسە ول جۇرەكتىڭ توقتاپ قالۋىنا اكەلۋى مۇمكىن, - دەيدى زۋلفيا ماقاشەۆا.
دارىگەردىڭ ايتۋىنشا, ەنەرگەتيكالىق سۋسىنداردى كوپ ىشكەننەن كەيىن ناۋقاستىڭ جۇرەگى توقتاپ قالعانى جانە جاستاردىڭ قايتىس بولعانى جايلى مالىمەتتەر بار. سونداي-اق كارديولوگ ەنەرگەتيكالىق سۋسىندار جۇرەك بۇلشىقەتىنىڭ زاقىمدالۋىنا, ياعني جۇرەكتىڭ ۇياعايۋىنا اكەلەتىنىن ەسكەرتتى. بۇل كارديوميوپاتياعا, سودان سوڭ سوزىلمالى جۇرەك جەتكىلىكسىزدىگىنىڭ پايدا بولۋىنا ىقپال ەتەدى.
