شىرايلى شىمكەنت ساحناسىندا بەكزات ونەردىڭ بولەك بولمىسىن كورسەتكەن «استانا وپەرا» ارتىستەرىن جەرگىلىكتى تەاترسۇيەر قاۋىم ەرەكشە ىقىلاسپەن قارسى الدى. قۇرامىندا ساحنا شەبەرلەرى, قازاقستاننىڭ ەڭبەك سىڭىرگەن قايراتكەرلەرى جۇپار عابدۋللينا, جانات شىبىقباەۆ, مەيىر باينەش, بيبىگۇل جانۇزاق, باعدات ءابىلحانوۆ, راۋشان بەسكەمبيروۆا, حالىقارالىق بايقاۋلاردىڭ لاۋرەاتتارى گۇلدانا الدادوسوۆا, تالعات عالەەۆ, بولات ەسىمحانوۆ, تالعات اللابيرينوۆ بار ەلوردالىق ۇجىم حالىقتىڭ قوشەمەتىنە ءتانتى بولىپ, شابىتتانا ونەر كورسەتتى.
اسىرەسە ونەر كەشىن ەل كومپوزيتورلارى تۋىندىلارىنىڭ شەبەر ورىندالۋى كورىكتەندىرە ءتۇستى. ە.برۋسيلوۆسكيدىڭ «قىز جىبەك» وپەراسىنان شەگەنىڭ ارياسى مەن م.تولەباەۆتىڭ ء«بىرجان-سارا» وپەراسىنان ايتىس ساحناسى سىندى ۇمىتىلماس ساتتەر تىڭدارماندارعا ۇلكەن اسەر قالدىردى. بۇل شىعارمالار, ءبىر جاعىنان ۇلتتىق مۋزىكالىق مادەنيەتتى كورسەتسە, ولاردى ناقىشىنا كەلتىرە ورىنداۋ – ءتۇپ-تامىرىمىزعا ورالۋدى بىلدىرەدى.
ەل كومپوزيتورلارىنىڭ مۋزىكاسى ا.ۆيۆالدي, پ.چايكوۆسكي, ا.دۆورجاك, دج.پۋچچيني سىندى الەمدىك كلاسسيكتەردىڭ اريالارىمەن ۇندەسىپ وتىردى. شابىتقا تولى ونەر سالتاناتى قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىندەگى «استانا وپەرا» سيمفونيالىق وركەسترى مەن حورىنىڭ سۇيەمەلدەۋىمەن ءوتتى.
باعدارلاما سوڭىندا شىرقالعان ەسكەندىر حاسانعاليەۆتىڭ «اتامەكەن» ءانى ارتىستەر مەن كورەرمەندەردى وتانسۇيگىشتىك سەزىم اتموسفەراسىندا بىرىكتىردى. ءوز ەلى ءۇشىن ماقتانىش پەن بىرلىكتىڭ ءرامىزى رەتىندە كوپشىلىك بۇل كومپوزيتسيانى تىك تۇرىپ قوسىلا ورىندادى.
«بۇگىنگى كەش شىنىمەن دە تاڭعالارلىقتاي ءوتتى. وسىناۋ بىرەگەي مادەني تاجىريبەنى ەشقاشان ۇمىتپايمىن. ءبىز م.اۋەزوۆ اتىنداعى وڭتۇستىك قازاقستان ۋنيۆەرسيتەتىندەگى ارىپتەستەرىمىزبەن كەزدەسۋگە قازاقستانعا ەندى عانا كەلگەن ەدىك, ءسويتىپ ولار بىزگە وپەراعا بارۋعا ۇسىنىس ايتتى. مەن مۇنداي دارىندى ارتىستەردى ءبىر ساحنادا بۇرىن-سوڭدى كورمەدىم جانە كورەرمەندەردىڭ وسىنشالىقتى ىستىق ىقىلاسىنا كۋا بولعان ەمەسپىن. باعدارلامانى اياقتاعان ءنومىر ەرەكشە ەستە قالدى, وسىناۋ ۇزدىك نومىرگە زال دۋ قول شاپالاق جاۋدىردى. بۇل ولاردىڭ دارىنىنىڭ كۇشى مەن ونەردىڭ ادامداردى بىرىكتىرەتىنىنىڭ ناعىز دالەلى بولدى», دەدى اقش-تان كەلگەن پروفەسسور كريستوفەر دجونستون.
سونداي-اق گاسترولدىك باعدارلامادا جاس تىڭدارماندارعا دا ەرەكشە كوڭىل ءبولىندى. ولارعا ارناپ «مۋزىكا الەمى» تانىمدىق كونتسەرتى ازىرلەنىپ, ارتىستەر وقۋشىلاردى وپەرا داۋىستارىمەن, اسپاپتارمەن تانىستىردى. «استانا وپەرانىڭ» مۋزىكاتانۋشىسى ساۋلە ماۋلەتوۆانىڭ قىزىقتى اڭگىمەسىنەن كىشكەنتاي تەاترسۇيەر قاۋىم وپەرا مەن كلاسسيكالىق مۋزىكا الەمى تۋرالى كوبىرەك اقپارات الدى.
«استانا وپەرا» تەاترى قالامىزعا گاسترولمەن كەلەتىنىن افيشادان كورگەندە, بىردەن بالالارعا ارنالعان كونتسەرتكە دە, كەشكى كونتسەرتكە دە بيلەت الدىم. بۇل – كۇندە بولا بەرمەيتىن ماڭىزدى وقيعا. بالالارىم مۋزىكا مەكتەبىنە بارىپ جۇرسە دە, نەگىزگى بازانى بىلسە دە, بۇگىن مۋزىكا الەمىنە بويلاپ, ونىمەن جاڭاشا تانىسقانداي كورىندى. ويتكەنى سونىڭ بارلىعىن كوزبە-كوز تاماشالاۋ – مۇلدەم باسقا تاجىريبە. بالانىڭ ءبىلىم الۋى ءبىر بولەك تە, ونىڭ جاندى ونەردى تاماشالاۋى – ءبىر بولەك», دەيدى كورەرمەن ايگەرىم قوجانوۆا.
«استانا وپەرانىڭ» شىمكەنتتەگى شىعارماشىلىق ساپارى تابىسپەن ءوتىپ, ناعىز مادەني وقيعاعا اينالدى. ارتىستەر وزدەرىنىڭ كەلۋىن اسىعا كۇتەتىن شىمكەنتتىك كورەرمەندەردىڭ سۇيىسپەنشىلىگى مەن ريزاشىلىعىن ارقالاپ جولعا شىقتى. مۇنداي مۋزىكالىق كوش رەسپۋبليكانىڭ تۇكپىر-تۇكپىرىندەگى ەل تۇرعىندارىن اسقاق ونەرگە باۋلىپ, شەكاراسىن كەڭەيتەتىنى ءسوزسىز.
