فوتو: قر مادەنيەت جانە اقپارات مينيسترلىگى
ايتا كەتەرلىگى, قوس مەرەيتوي قارا شاڭىراقتىڭ 90 جىلدىعى مەن احمەت جۇبانوۆ-لاتيف ءحاميديدىڭ «اباي» وپەرالىق سپەكتاكلىنىڭ 80 جىلدىعى تۇسپا-تۇس كەلگەن ماۋسىم ەستەن كەتپەس مەرەكە سىيلاعان.
جاقسىنىڭ جاقسىلىعى اتالىپ, قۋانىشتان كوڭىل تاسىعان ماۋسىماشاردا تەاتر ۇجىمى اقساقالدارىنا قىزىل كىلەم توسەپ, قوشەمەتپەن قارسى العان. ماراپاتتالعان ارداگەرلەر ون جىلدان استام ۋاقىت بويى قارا شاڭىراقتا ۇزدىكسىز ەڭبەك ەتكەن ماماندار. ولاردىڭ قاتارىندا تەك ساحنا ارتىستەرى عانا ەمەس, كوستيۋم تسەحى, گريم مامانى, جارىق قويۋشى سياقتى تەاتردىڭ بارلىق ءبولىمىنىڭ بۇرىنعى قىزمەتكەرلەرى بار.
قۇرمەتتى قوناقتار قاتارىندا ۇلتىمىزدىڭ ماڭدايىنا بىتكەن جارىق جۇلدىزدارى كسرو حالىق ءارتىسى جانە مەملەكەتتىك سىيلىق يەگەرى بيبىگۇل تولەگەنوۆا, قازاق كسر حالىق ءارتىسى جانە قازاق كسر مەملەكەتتىك سىيلىعىنىڭ يەگەرى راۋشان بايسەيىتوۆا, قازاقستان جانە تاتارستان حالىق ءارتىسى نۇرجامال ۇسەنباەۆا جانە باسقا وپەرا مەن بالەت مايتالماندارى, قازاقستانداعى ديپلوماتيالىق ەلشىلىكتەردىڭ قادىرلى وكىلدەرى بولعان.
«اباي اتىنداعى تەاتر «عاسىر الدىنداعى جاڭا بەلەسكە» اياق باستى. انە-مىنە دەگەنشە, الداعى 10 جىلدا قارا شاڭىراعىمىز ءجۇز جاسايدى. وسىمەن 90 جىلعا نۇكتە قويىلاتىن تاريحي كۇندە ارداگەرلەردىڭ باسىن قوسىپ, ەڭبەگىنە راقمەت ايتىپ لايىقتى قۇرمەت كورسەتۋ, بۇگىنگى وسكەلەڭ ۇرپاقتىڭ, ونەر ۇجىمىنىڭ بىردەن-ءبىر پارىزى دەپ ەسەپتەيمىن. نەگە دەسەڭىز, ادام ەڭبەگى ءبىرىنشى كەزەكتە ۇيىم تاراپىنان, ودان ارى قاراي قوعام, مەملەكەت تاراپىنان باعالانىپ تۇرعانى ماڭىزدى. بۇل اسىرەسە ونەر ادامىنا شابىتتانۋ ءۇشىن اسا قاجەت, سوندىقتان اباي اتىنداعى تەاتردا جاڭا ءۇردىس – ءوز قىزمەتكەرلەرىنىڭ ەڭبەگىن جىلدا اتاپ وتەتىن ادەمى ءداستۇر جول تارتتى», دەدى اباي اتىنداعى قازۇوبت ديرەكتورى اينۇر كوپباساروۆا.
تەاتر ارداگەرلەرىن ماراپاتتاۋ سالتاناتىندا اسىلدىڭ تۇياعى راۋشان حاتياتقىزى اناسىنىڭ اسا باعالى پورترەتى مەن كەزىندە كۇلاش بايسەيىتوۆانىڭ سپەكتاكلدەردە كيگەن بىرنەشە باس كيىمىن ونەر ورداسىنىڭ مۇراجايىنا تارتۋ ەتكەن. قازاق كسر ەڭبەك سىڭىرگەن ونەر قايراتكەرى نيكولاي تسيۆچينسكي سالعان سۋرەت بۇرىن-سوڭدى ەش جەردە جاريالانباعان جانە ونىڭ ەرەكشە تاريحى بار.
ماۋسىماشاردا قوناقتارعا شاعىن مۋزىكالىق تارتۋ جاسالىپ, مەرەكەلى كەش احمەت جۇبانوۆ-لاتيف ءحاميديدىڭ «اباي» وپەراسىن تاماشالاۋمەن اياقتالعان.
وسىلايشا, اباي اتىنداعى قازاق ۇلتتىق وپەرا جانە بالەت تەاترى ءوزىنىڭ «عاسىر الدىنداعى جاڭا بەلەسىن» – 91-ءشى ماۋسىمىن باستادى. داستۇرگە ساي جاڭا ماۋسىمنىڭ ەكىنشى كۇنىندە پ. چايكوۆسكيدىڭ «اققۋ كولى» بالەتتىك سپەكتاكلى كورەرمەنگە جول تارتقان.
