سۋرەت: ru.freepik.com
ادەبي ساۋالدامامىزدىڭ كەزەكتى قوناعى – جازۋشى ءمادي ايىمبەتوۆ. ءداستۇرلى سۇراق: نە جازىپ ءجۇرسىز؟
– شىعارماشىلىق جۇمىس دەگەن ۇنەمى جازۋ ۇستەلىنە وتىرىپ, قولعا قالام الىپ جازا بەرەتىن شارۋا ەمەس. جازۋشى جاڭا شىعارماعا كىرىسەر الدىندا ويىندا جۇرگەن دۇنيەلەردى تەرەڭدەتىپ, ىشتەي دايىندىق جاسايدى. شىعارماشىلىق جۇمىسپەن اينالىسقانىما ەلۋ جىلدان استام ۋاقىت ءوتىپتى. تالاي دۇنيە جازىلدى. سوڭعى جارىق كورگەن شىعارمام – «بوپاي حانىم» تاريحي رومانى. مۇنى دا قايتا-قايتا قاراۋعا تۋرا كەلدى. باسپادان قايتا باسىلىپ شىققان سايىن قىرناپ-جونىپ وتىردىم. بۇل رومان ورىس جانە اعىلشىن تىلدەرىنە اۋدارىلدى. سول نۇسقالارىنىڭ اۋدارىلۋ ۇدەرىسىندەگى كەيبىر تۇزەتۋ جۇمىسىنا دا ءوزىم ارالاسۋىما تۋرا كەلدى. بۇل ەندى ءوز شىعارمالارىمنىڭ ساپالى شىعۋىنا دەگەن وزىندىك از-كەم ىقتياتتىلىعىم شىعار.
بۇرىن جازىلعان دۇنيەلەرگە ۋاقىت وتە قايتا ورالىپ وتىراتىن ادەتىم بار. بۇنىڭ ءبارى – شىعارماشىلىق ۇدەرىس. سوڭعى جازىلعان اتالعان رومانىم وقىرماننىڭ قولىنا ءتيدى. باعاسىن دا وزدەرى بەرە جاتار.
قازىر كەزەكتى تاقىرىپتارعا جەتەلەيتىن وي ۇستىندە ءجۇرمىن. بايقاسام, كوپتەگەن اڭگىمە مەن ەسسە جازىلىپتى. ەندى سونىڭ ءبارىن ءبىر-ءبىر كىتاپقا توپتاستىرماق جوسپارىم بار. سودان سوڭ ومىردەن كورگەن-تۇيگەنىمدى عۇمىرنامالىق كىتاپ بولا ما, رومان بولا ما, ەسسەلەر توپتاماسى بولا ما – ء«ومىر-قازىنا» دەگەن شارتتى اتاۋمەن ءبىر دۇنيە جازۋدى ماقسات ەتىپ ءجۇرمىن. وتكەن جىلدار ىشىندە تالاي وقيعانى باستان كەشىردىك, شىعارماشىلىق ءھام قوعامدىق, مەملەكەتتىك جۇمىستا دا ءتۇرلى جاعدايدى باستان وتكەردىك, ەلىمىز تاريحىنداعى وزگەرىستەرگە كۋا بولدىق.
بۇرىنعى جىلدارى بىرقاتار جازۋشى شىعارماشىلىق دەمالىسقا شىعىپ, تەك جازۋمەن اينالىستى. ۋنيۆەرسيتەتتەن سوڭعى العاشقى جىلداردان سوڭ بىرىڭعاي مەملەكەتتىك قىزمەتتە بولعان سوڭ مەندە ونداي مۇمكىندىك بولا قويعان جوق. جۇمىستان تىس ۋاقىتتا عانا جازۋعا وتىرا الدىم.
قاراپ وتىرسام, ادەبيەتتىڭ اينالاسىندا ءبىرتالاي اقىن-جازۋشى, ارىپتەس اعالارمەن ديدارلاسىپپىن. سول تۇلعالاردىڭ ءومىرى تۋرالى وي-تولعامدارىم سانا تۇكپىرىندە سايراپ تۇر. جالپى, ومىردە ءوزىم باستان كەشكەن جايتتاردى جيناقتاپ تۇجىرسام دەگەن دە ويىم بار, بالكىم, بۇل وقىرماندارىم ءۇشىن دە پايدالى بولار ما ەكەن دەپ ويلايمىن.
ءوزىمنىڭ شىعارماشىلىق تاعدىرىم تۋرالى وسىلايشا ءبىر تولعام جاساعىم كەلىپ ءجۇر. ادەتتە جاڭا كىتاپقا كىرىسەر الدىندا شىعارماشىلىق تۇرعىداعى دايىندىعىم وسىلاي باستالادى ءوزى. ءبارىن ءجىتى ويلانىپ, جۇرەكتەن وتكىزىپ بارىپ جازۋعا وتىرامىن. ويشا ءار دەتالىن تۇيىندەپ, نەدەن باستالادى, شارىقتاۋ شەگى قالاي, نەمەن قورىتامىن دەگەن سىندى ويىمداعى تولعانىستارىم پىسكەندە عانا جازۋعا كىرىسەمىن. سوندا جازۋعا كوپ ۋاقىتىم كەتپەيدى. شامامەن, 7-8 ايدا ويدا جۇرگەن تاقىرىبىم قاعازعا تۇسەدى. قولعا قالام ۇستاعان العاشقى ساتتەن بەرگى جازۋداعى ءتاسىلىم وسى.
كوپ جىلدان بەرى الەۋمەتتىك جەلىدە «تىرشىلىك مينياتيۋرالارى» دەگەن ايدارمەن تابيعات قۇبىلىستارىن, ءومىر وتكەلدەرىنەن تۋعان ويلاردى سالىپ وتىرامىن. شەتەلگە شىققان ءىسساپارلاردان العان اسەرىمدى دە سوندا ءتۇرتىپ جۇرەمىن. جالپى, قالام ۇستاعان جانعا جاڭا دۇنيەنىڭ ءبارى تاڭسىق قوي. كورگەن دۇنيەلەردى جازباس بۇرىن زەرتتەپ, وي تولعاپ, تۇيىندەپ ايتۋ كەرەك. 2020 جىلى وسى «تىرشىلىك مينياتيۋرالارىنىڭ» ءبىرىنشى كىتابى شىقتى. ەندى تاعى ەكى كىتاپقا جۇك بولارلىق قور جينالىپ تۇر. بۇل كىتاپ تا الداعى ۋاقىتتىڭ ەنشىسىندەگى شارۋا.
– شىعارماشىلىق سىرىڭىزبەن بولىسكەنىڭىزگە راحمەت.
دايىنداعان –
مارجان ءابىش,
«Egemen Qazaqstan»
