36 جاستاعى بەلال مۇحامماد اقش-تىڭ چيكاگو قالاسىندا تۋىپ-وسكەنىمەن, ونىڭ شىققان تەگى – پالەستينالىق. كەزىندە بولاشاق چەمپيوننىڭ اتا-اناسى سۇراپىل سوعىستان قاشىپ, يوردان وزەنىنىڭ جاعالاۋىنان امەريكاعا كەلىپ باس ساۋعالادى. بالا كەزىنەن سپورتقا قۇمار بولعان بەلال بوكس, كۇرەسپەن اينالىسىپ, برازيليالىق دجيۋ-دجيتسۋدان قارا بەلبەۋ يەگەرى اتاندى. 24 جاسقا تولعان شاعىندا ارالاس جەكپە-جەككە مىقتاپ دەن قويدى. 2012 جىلدىڭ جازىندا تۇساۋكەسەر كەزدەسۋىن ينديانا شتاتىنداعى ۆالپارەيزو قالاسىندا جەرىلىكتى سپورتشى دجاستين بروكقا قارسى وتكىزىپ, ونى ءبىرىنشى راۋندتا-اق ۇرىپ جىقتى.
2016 جىل مۇحاممادقا ءساتسىز بولدى. العاشقى ءتورت جىل ارالىعىندا توعىز جەكپە-جەك وتكىزىپ, بارلىعىندا جەڭىسكە جەتكەن ول اتالعان ماۋسىمدا قاتارىنان ەكى رەت جەڭىلىستىڭ كەرمەك ءدامىن تاتتى. UFC-دەگى تۇساۋكەسەر باسەكەسىندە الان دجۋباننان ۇپاي سانىمەن ۇتىلسا, كوپ كەشىكپەي ۆيسەنتە لۋكەنىڭ قارقىندى شابۋىلىنا شىداي المادى. بىراق بۇل ساتسىزدىكتەر پالەستينالىق وعىلاننىڭ ساعىن سىندىرا العان جوق. ودان كەيىنگى ەكى جىلدا كەيىپكەرىمىز رەندي براۋن, دجوردان ماين, تيم مينس, شانس رەنكۋنترەگە سان سوقتىردى.
سوڭعى رەت بەلال 2019 جىلدىڭ 19 قاڭتارىندا جەڭىلدى. نيۋ-يوركتە ۇيىمداستىرىلعان جارىستا ول نيل دجەففكە ۇپاي سانىمەن ەسە جىبەردى. سودان بەرگى بەس جارىم جىلدان اسا ۋاقىت ارالىعىندا چيكاگو تۋماسىنىڭ تەگەۋرىنە ەشكىم توتەپ بەرە المادى. پالەستينالىق فايتەر كەرتيس ميللەندەر, تاكاشي ساتو, لايمان گۋد, ديەگو ليما, دەميان مايا, ستيۆەن تومپسون, ۆيسەنتە لۋكە, شون برەدي, گيلبەرت بەرنستەن باسىم ءتۇستى. 2021 جىلعى 13 ناۋرىزدا مۇحامماد لەون ەدۆارسپەن كۇش سىناستى. باسەكە قىزعان تۇستا لەون بەلالدىڭ كوزىن شۇقىپ الدى. سونىڭ سالدارىنان ول كەزدەسۋدى جالعاستىرا المادى. اقىرى بۇل جەكپە-جەك ەسەپكە الىنبادى.
بيىل 27 شىلدەدە بەلال لەون ەدۆارسپەن قايتا جولىقتى. ۇلىبريتانيادا تۇرىپ جاتقان يامايكانىڭ تۋماسى وسىدان ەكى جىل بۇرىن نيگەريالىق كامارۋ ۋسماندى «حەد-كيك» ادىسىمەن ۇرىپ جىعىپ, UFC چەمپيونى اتانعان ەدى. ودان كەيىن ول التىن بەلبەۋىن ەكى مارتە ءساتتى قورعادى. الدىمەن قايتا كامارۋدى قاپى قالدىرسا, ىلە-شالا كولبي كوۆينگتاننىڭ وسال تۇسىن تاپتى. انگليانىڭ مانچەستەر قالاسىندا وتكەن ايقاس مۇحاممادتىڭ پايداسىنا شەشىلدى. امەريكادان كەلگەن جىگىت بارلىق كومپونەنتتەردە جەرگىلىكتى فايتەردەن باسىم ءتۇستى. باسەكە اياقتالعاننان سوڭ تورەشىلەر ءبىراۋىزدان جەڭىستى سوعان بەردى. ءسويتىپ, بەلال مۇحامماد الەمدەگى ەڭ بەلدى پروموۋشەننىڭ جارتىلاي ورتا سالماقتاعى چەمپيونى اتاندى. ول وكتاگوندا بارلىعى 28 كەزدەسۋ وتكىزىپ, 24 رەت جەڭىس تويىن تويلادى. التى ايقاستى مەرزىمىنەن بۇرىن اياقتادى.
– UFC چەمپيونى بولعان راحات ەكەن. مەن قازىر الىپ تاۋدىڭ ەڭ بيىك شىڭىندا تۇرعاندايمىن. وزگە سپورتشىلار تومەندە تۇرىپ, ماعان قىزىعا دا, قىزعانا قارايتىنداي. ولاردىڭ دەنى مەنىڭ التىن بەلبەۋىمدى تارتىپ الۋدى ارماندايدى. ۇنەمى جەكپە-جەككە شاقىرىپ الەك. ال تاڭداۋ – مەندە. كىمدى قالاسام, سونىمەن جۇدىرىقتاسامىن. قازىر كوپشىلىك مەنىڭ كامارۋ ۋسمان نەمەسە شاۆقات راحمونوۆپەن كۇش سىناسقانىمدى قالايدى. كامارۋمەن ماعان قىزىق ەمەس. ونى بۇعان دەيىن ەكى رەت ۇتتىم. ونىڭ ۇستىنە ول قاتارىنان ءۇش مارتە جەڭىلدى. شىنى كەرەك, ۋسمان قارتايىپ قالدى. سوندىقتان دا مەن شاۆقاتتى تاڭدايمىن. بىرىنشىدەن – ول جاس, ەكىنشىدەن – ءالى دە جەڭىلىستىڭ كەرمەك ءدامىن تاتقان ەمەس. ەگەر قازاقتى ۇتسام, UFC-دەگى بەدەلىم ودان ءارى ارتا تۇسەتىنى انىق. سوندا مەنىڭ ناعىز چەمپيون ەكەنىمە ەشكىمنىڭ كۇمانى بولمايدى. سول سەبەپتى دە ءداپ قازىر راحمونوۆپەن ايقاسۋعا نيەتتىمىن, – دەيدى مۇحامماد بەلال.
ال شاۆقات راحمونوۆتىڭ ءجۇرىپ وتكەن جولى بارشا قازاق جانكۇيەرلەرىنىڭ كوز الدىندا. كەلەسى ايدا وردا بۇزار 30 جاسقا تولعالى وتىرعان قانداسىمىز سپورتتىڭ بۇل ءتۇرىن سەرىك ەتكەلى 10 جىل بولدى. سول ارالىقتا 18 رەت وكتاگونعا شىعىپ, بارلىق باسەكەدە ايقىن باسىمدىق تانىتتى. «نومادقا» قارسى شىققان جىگىتتەردىڭ بىردە-بىرەۋى ايقاستىڭ سوڭىنا دەيىن شىدامادى. راحمونوۆ 2020 جىلدان بەرى UFC-دە ونەر كورسەتەدى. سول ءتورت جىل ارالىعىندا قازاقتىڭ قايسار ۇلى برازيليالىق الەكس وليۆەرا («قىلعىندىرۋ») مەن ميشەل پرازەيرەس («قىلعىندىرۋ»), گايانالىق كارلستون حارريس (اياقپەن تەۋىپ قۇلاتتى), امەريكالىق نيل مەگني («قىلعىندىرۋ»), دجەف نيل («قىلعىندىرۋ»), ستيۆپەن تومپسون («قىلعىندىرۋ») سىندى ساڭلاقتاردىڭ تاس-تالقانىن شىعاردى. وسى دەرەكتەردىڭ ءوزى-اق شاۆقاتتىڭ چەمپيوندىق تاجگە تالاسۋعا لايىق ەكەنىن ايعاقتاپ تۇر.
