قانات ەستاي ۇلى ەڭ الدىمەن 10 مىڭ باسقا ارنالعان مال شارۋاشىلىعى كەشەنىن قۇرۋدى ويلاستىرىپ, بيزنەس-جوبا جاسادى. ەسەپتەي كەلگەندە جوبا قۇنى 1 417,3 ملن تەڭگە بولىپ شىقتى. مۇنداي قاراجات تاپتىرا قويا ما؟ ءوز قالتاسىنان 744 ملن تەڭگە تابىلدى. جەتپەي تۇرعانىنا «اگروبيزنەس» باعدارلاماسى ارقىلى بەرىلەتىن جەڭىلدەتىلگەن نەسيە كومەكتەستى. ءسويتىپ, جۇمىس باستالىپ كەتتى. بۇل 2021 جىل بولاتىن.
«جوبانىڭ العاشقى كەزەڭىندە كاسىپكەر قوي ۇستاۋعا قاجەتتى 3 باز, 2 000 قارا مالعا ارنالعان بورداقىلاۋ الاڭىن سالدى. سونىمەن قاتار, ساتىپ الۋ ارقىلى مال باسىن دا كوبەيتتى. وسىلايشا, بولاشاق ەت كومبيناتىنىڭ نەگىزى قالاندى», دەيدى جاڭاارقا اۋدانى كاسىپكەرلىك جانە ونەركاسىپ ءبولىمىنىڭ باس مامانى ارداق الپىسوۆ.
جۋىردا عانا كومبينات ىسكە قوسىلدى. اشىلۋ سالتاناتىنا وبلىس اكىمىنىڭ ورىنباسارى ج.ءنوپىروۆ قاتىستى.
«بۇل – ءبىزدىڭ وبلىستاعى ەڭ العاشقى ەت كومبيناتى. وسىنداي ىرگەلى جوبانى قولعا الىپ, ىسكە اسىرعان كاسىپكەرگە العىس ايتامىز. العاشقى كومبينات باسقا دا كاسىپكەرلەرگە تاماشا ۇلگى بولۋعا ءتيىستى. ويتكەنى وبلىستا مۇنداي مۇمكىندىك مول. تەك ىنتا مەن جىگەر بولسىن», دەدى.
كومبيناتتىڭ ءوز زەرتحاناسى, كونسەرۆ, سويۋ جانە ىشەك-قارىن ارشۋ تسەحتارى, مۇزداتقىش, توڭازىتقىش كامەرالارى, ءونىم ساقتاۋ قويمالارى, تەرى ساقتايتىن ورنى بار.
«جىلىنا 230 توننا ەت ونىمدەرىن ءوندىرۋدى ماقسات ەتىپ قويدىق. ءبىر اۋىسىمدا 3 مىڭ بانك كونسەرۆ شىعارامىز. ءبىز جىلقى, سيىر, قوي ەتتەرىن پايدالانامىز. مۇندا ەت كونسەرۆىلەرىمەن قوسا تۇشپارا, مانتى, كوتلەت سەكىلدى جارتىلاي فابريكاتتىق ونىمدەر دە شىعارىلادى. ونىمدەرىمىزدى ۇلىتاۋ وبلىسىنا قوسا, كورشىلەس قاراعاندى وبلىسىنا دا شىعارىپ, ساتامىز. وبلىس باسشىلىعى جەزقازعان قالاسىنان اشىلاتىن الەۋمەتتىك دۇكەندەردەن ارنايى ورىن بولگەلى وتىر», دەدى بىزبەن اڭگىمەسىندە «Uly dala Co» جشس ديرەكتورى جامبىل جۇندىباەۆ.
ءبىر سۇيسىنەرلىگى, مۇندا جۇمىسكەرلەرگە جاقسى جاعداي ابدەن ويلاستىرىلعان. 4 گەكتار جەردى الىپ جاتقان كومبينات اۋماعىندا ارنايى جاتاقحانا, اسحانا جانە قوناق بولمەلەرى بار. ازىرگە كومبيناتتا 20 ادام ەڭبەك ەتىپ جاتىر.
كاسىپكەر جۇمىس اۋقىمىن ۇلعايتۋ, ءونىم تۇرلەرىن كوبەيتۋ سەكىلدى شارۋالاردى بىرتىندەپ جۇزە اسىرۋدى كوزدەيدى. بۇل كومبيناتتىڭ اشىلۋى جاقىن اۋىلدارداعى مال يەلەرىنە دە وڭتايلى بولعالى تۇر. ويتكەنى كومبينات ءوندىرىستى ۇلعايتقان كەزدە ەتتى اۋىلداردان دا قابىلداي باستايدى.
ۇلىتاۋ وبلىسى,
جاڭاارقا اۋدانى
