ول قارقارالى قالاسىنداعى №1 قازاق ورتا مەكتەبىن 1966 جىلى, قاراعاندى پوليتەحنيكالىق ينستيتۋتىن 1972 جىلى ويداعىداي اياقتاپ, ەڭبەك جولىن قارقارالى اۆتوكولىك مەكەمەسىندە تەحنيكالىق قىزمەت كورسەتۋ ينجەنەرى بولىپ باستاعان. كەيىن وسى مەكەمەنىڭ ديرەكتورى بولىپ, 10 جىل تابىستى ەڭبەك ەتتى. ول كەزدە قارقارالى اۆتوكولىك مەكەمەسى (اۆتوبازاسى) اۋدانداعى ەڭ ءىرى مەكەمەلەردىڭ ءبىرى سانالاتىن. اتالعان مەكەمەدەگى تەحنيكا اۋدانداعى جۇك تاسىمالىمەن تىكەلەي اينالىساتىن. مەكەمەدەگى كولىكتەر ناۋقاندىق جۇمىسقا بەلسەنە قاتىسىپ, جول جوندەۋگە قاجەتتى ماتەريالداردى, تاعى باسقا جۇكتەردى دەر كەزىندە تاسىمالداپ, الدىڭعى قاتاردان كورىنىپ جۇرەتىن.
ساكەڭ مەكەمەنىڭ الەۋمەتتىك سالاسىن دا نازاردان تىس قالدىرعان ەمەس. اۆتوكولىك جۇرگىزۋشىلەرىنە ارناپ, تۇرعىن ءۇي سالۋدى قولعا الىپ, جۇمىسكەرلەرىن قاجەتتى جاعدايمەن قامتاماسىز ەتتى. سول كەزدە تۇتاس ءبىر كوشەدەگى ۇيلەر «اۆتوبازا ۇيلەرى» دەپ اتالاتىن. ودان بولەك, جۇرگىزۋشىلەر اراسىنان بىرنەشە بريگادا قۇراپ, سول كەزەڭدەگى ۇردىسپەن ءتۇرلى ەڭبەك ۇجىمىن ۇيىمداستىرىپ, جۇمىستىڭ كورىگىن قىزدىرا تۇسكەن. مايدان سىزدىقوۆ, بايسا قوجاسوۆ, ورىنباي اگيمانوۆ, شاكەن ۋساباەۆ سىندى ازاماتتاردىڭ بريگادالارى الدىڭعى قاتاردان كورىندى. ولاردىڭ الدى لەنين وردەنىمەن, كوپشىلىگى ەڭبەك قىزىل تۋ, «قۇرمەت بەلگىسى» وردەندەرىمەن, ءتۇرلى مەدالمەن ماراپاتتالدى.
وسى ورايدا مىنا ءبىر جايدى اتاپ ايتپاسقا بولمايدى. سوۆەت اعا مەكەمەگە بەرىلگەن وردەن-مەدالداردى ەشقاشان وزىنە قاراي بۇرعان ەمەس. جوعارى ناگراداعا يە بولماسا دا, ۇرپاقتارى «جان اكە!» دەپ ەمىرەنەدى, ارىپتەستەرى, ەڭبەك ازاماتتارى «اقيىق ازاماتىمىز!» دەپ قادىرلەيدى. قاتارلاستارعا قالقا, اعايىنعا ارقا, تۋىستار مەن دوس-جارانعا ادال تىرەك بولا ءبىلدى.
تاعى ءبىر ايتا كەتەرلىگى, سوۆەت ارالاساتىن ازاماتتارىن لاۋازىمىنا قاراپ تاڭدامايتىن. حاتشىمەن دە, قوسشىمەن دە, ەڭبەك ازاماتتارىمەن دە ءبىر دەڭگەيدە سويلەسە بىلەتىن. ساكەننىڭ ءۇيى اۆتوبازاعا جاقىن بولعاندىقتان, مەكەمەدەگى جۇرگىزۋشى دوستارى ساكەڭمەن بىرگە كەلىپ, ۇيىنەن اۋقاتتانىپ جۇرەتىنىنە كۋامىز.
وزىق ويلى, جۇمىستى ۇتىمدى ۇيىمداستىراتىن ىسكەر ازاماتتاردىڭ جوعارى تۇرعان ورىنداردىڭ ۇنەمى نازارىندا بولاتىنى بەلگىلى. ءسويتىپ, 1987 جىلى سوۆەت قابىلدا ۇلى قارقارالى اۋداندىق اتقارۋ كوميتەتى توراعاسىنىڭ ورىنباسارى لاۋازىمىنا جوعارىلاتىلدى. ال 1991 جىلى اكىمشىلىك جۇيە جاڭادان قۇرىلعان كەزەڭدە اۋدان اكىمىنىڭ ورىنباسارى بولىپ تاعايىندالدى. اۋداننىڭ جول, قۇرىلىس, ەلەكتر جۇيەسى, جىلۋ, سۋمەن قامتاماسىز ەتۋ سالاسىنا جەتەكشىلىك ەتتى. كۇرمەۋى كوپ, كۇردەلى ماسەلەلەردى شەشۋدە تاباندىلىق, ىسكەرلىك, بەلسەندىلىك تانىتتى. 1995-2010 جىلدارى «قاراعاندىەنەرگو» بىرلەستىگىنىڭ قارقارالى اۋداندىق جوعارعى كەرنەۋلى ەلەكتر جۇيەلەرى مەكەمەسىنىڭ باسشىسى بولىپ قىزمەت ەتىپ, وسى مەكەمەدەن زەينەتكەرلىككە شىقتى.
سوۆەت قاي سالادا ەڭبەك ەتسە دە اۋدان ەكونوميكاسىنىڭ جاڭاشا دامۋىنا, الەۋمەتتىك ماسەلەلەردىڭ وڭتايلى شەشىلۋىنە ءبىر كىسىدەي ەڭبەك ءسىڭىردى. جۇمىس بابىندا تالاپ قويۋدى قاجەت ەتەتىن باسشىلىق قىزمەتتەردە جۇرگەندە دە كىسىلىك كەلبەتىنە قىلاۋ تۇسىرمەدى, ۇلكەنگە ىزەتتى, كىشىگە ءىلتيپاتتى بولا ءبىلدى.
وتباسىنىڭ تىرەگى – وتاعاسى, ال وشاعىنىڭ جىلۋى – وتاناسى. سوۆەت اعا بالالارىنىڭ ارداقتى اناسى, نەمەرەلەرىنىڭ قامقور اجەسى, اياۋلى جان وركەن جەڭگەمىزبەن 50 جىلدان استام ۋاقىت باياندى عۇمىر كەشتى. وركەن ۇزاق جىلدار بويى ۇستازدىق قىزمەتتى ابىرويمەن اتقاردى. ەرلى-زايىپتىلار بەرەكەلى شاڭىراق استىندا ۇلگىلى ازاماتتاردى ءوسىرىپ تاربيەلەدى. ولاردىڭ ارقايسىسى ءبىر-ءبىر ماماندىق يەسى اتانىپ, جەكە وتاۋ قۇرىپ, اتا-انالارىنا نەمەرە سۇيگىزىپ, باقىتقا بولەدى. اتاپ ايتساق, ۇلكەن ۇلى قۋان – دارىگەر, قاراعاندى ءوڭىرىنىڭ قولى شيپالى ۋرولوگى. جاقسىلىق پەن جاندوس – جوعارى ءبىلىمدى ينجەنەر-قۇرىلىسشى, استانانىڭ وركەندەپ, گۇلدەنۋىنە ۇلەس قوسىپ جۇرگەن ءوز ءىسىنىڭ ماماندارى. يناباتتى كەلىندەردىڭ ءجونى ءبىر بولەك.
تىلەك سادۋاقاسوۆ,
قازاقستاننىڭ ەڭبەك سىڭىرگەن قايراتكەرى
