سۋرەت: ru.freepik.com
ەلىمىزدىڭ ەكونوميكالىق دامۋىنىڭ باستى ماقساتى – ازاماتتاردىڭ تابىس دەڭگەيىن ارتتىرۋ. كوزدەگەن مەجەگە جەتۋ ءۇشىن ەكونوميكانى ءارتاراپتاندىرۋ, شاعىن جانە ورتا بيزنەستى دامىتۋ, ينۆەستيتسيالىق احۋالدى جاقسارتۋ ماڭىزدى. وسى باعىتتاردا جاستاردىڭ بەلسەندىلىگى شەشۋشى ءرول اتقارۋعا ءتيىس. جاستاردىڭ كاسىپكەرلىككە دەگەن قىزىعۋشىلىعىن ارتتىرۋ ءۇشىن ارنايى باعدارلامالار ۇيىمداستىرۋ قاجەت. ماسەلەن, ستارتاپ-بايقاۋلار, كاسىپكەرلىككە ۇيرەتۋ كۋرستارى جانە تالىمگەرلىك باعدارلامالار ارقىلى جاستاردى بيزنەستە جاڭا يدەيالاردى جۇزەگە اسىرۋعا ىنتالاندىرۋعا بولادى. وسىلايشا جاس كاسىپكەرلەر ەلدىڭ ەكونوميكالىق وسىمىنە ۇلەسىن قوسىپ, جاڭا جۇمىس ورىندارىن اشىپ, قوعامداعى الەۋمەتتىك تەڭسىزدىكتى تومەندەتۋگە ىقپال ەتەدى.
سونىمەن قاتار تسيفرلاندىرۋ مەن يننوۆاتسيالاردى ەكونوميكانىڭ بارلىق سالاسىنا ەنگىزۋ دە ماڭىزدى. وسى ورايدا IT سالاسىندا ءبىلىم الىپ جاتقان جاستارعا تاجىريبە الماسۋ, ستارتاپتار قۇرۋ, يننوۆاتسيالىق جوبالاردى ىسكە اسىرۋ مۇمكىندىكتەرىن ۇسىنۋ كەرەك. تسيفرلىق ەكونوميكادا جەتىستىككە جەتۋ ءۇشىن جاستاردىڭ جاڭا تەحنولوگيالاردى مەڭگەرۋى ولاردى وندىرىستە, قىزمەت كورسەتۋ سالاسىندا, كۇندەلىكتى ومىردە قولدانۋى جۇمىستى جەڭىلدەتەتىنى انىق.
مەملەكەت باسشىسى عىلىمدى دامىتۋعا ەرەكشە نازار اۋدارىپ, ەلىمىزدە يننوۆاتسيالىق ەكوجۇيە قۇرۋ قاجەتتىگىن ايتتى. مىسالى, ستۋدەنتتەر مەن جاس عالىمدار اراسىندا عىلىمي جوبالار بايقاۋلارىن ۇيىمداستىرۋ, تاجىريبە الماسۋ باعدارلامالارىن دامىتۋ, شەتەلدىك جەتەكشى عالىمدارمەن ىنتىماقتاستىقتى نىعايتۋ سياقتى شارالار ارقىلى جاستاردىڭ عىلىمعا دەگەن قىزىعۋشىلىعىن ارتتىرۋعا بولادى. سونداي-اق عىلىم مەن ءوندىرىس اراسىنداعى بايلانىستى كۇشەيتۋ قاجەت.
عىلىمي جاڭالىقتاردى وندىرىسكە ەنگىزۋگە ىقپال ەتۋ ماڭىزدى. بۇل ءۇشىن ۋنيۆەرسيتەتتەردە ستارتاپتار قۇرۋعا, عىلىمي-تەحنولوگيالىق پاركتەر اشۋعا جانە وندىرىستىك كاسىپورىندارمەن تىعىز بايلانىس ورناتۋعا جاعداي جاساعان ابزال. وسى ارقىلى جاس عالىمدار وزدەرىنىڭ عىلىمي جاڭالىقتارىن ناقتى ونىمگە اينالدىرىپ, ەكونوميكانىڭ دامۋىنا ۇلەس قوسا الادى.
جوعارى ءبىلىم سالاسى – ەلىمىزدىڭ زياتكەرلىك الەۋەتىن ارتتىرۋدىڭ نەگىزگى كوزى. پرەزيدەنت جوعارى وقۋ ورىندارىن ينتەرناتسيونالداندىرۋ, ولاردىڭ ساپاسىن ارتتىرۋ جانە ناقتى ەكونوميكامەن بايلانىستى كۇشەيتۋ قاجەتتىگىن اتاپ ءوتتى. ستۋدەنتتەر مەن جاس مامانداردى جۇمىسقا ورنالاستىرۋ, ولاردى ناقتى ءوندىرىس ورىندارىنا تاعىلىمداماعا جىبەرۋ, ءبىلىمىن پراكتيكادا قولدانۋعا مۇمكىندىك بەرۋ باعىتىندا بەلسەندىلىك تانىتۋ قاجەت.
جوعارى ءبىلىمنىڭ ساپاسىن ارتتىرۋدا وقۋ باعدارلامالارىن زاماناۋي تالاپتارعا سايكەستەندىرۋ, حالىقارالىق ستاندارتتارعا ساي ءبىلىم بەرۋ, شەتەلدىك جوعارى وقۋ ورىندارىمەن ىنتىماقتاستىقتى كۇشەيتۋ كەرەك. ستۋدەنتتەر اراسىندا شەتەلدىك تاجىريبە الماسۋ باعدارلامالارىن ناسيحاتتاۋ, شەتەلدىك پروفەسسورلار مەن مامانداردى وتاندىق جوعارى وقۋ ورىندارىنا شاقىرۋ ارقىلى ءبىلىم ساپاسىن ارتتىرۋ قاجەت. بۇل ەلىمىزدىڭ ەكونوميكالىق جانە الەۋمەتتىك دامۋىنىڭ ماڭىزدى فاكتورىنا اينالاتىنى, ءسوزسىز.
قورىتىندىلاي كەلە, ەلىمىزدىڭ بولاشاعى ءۇشىن تۇراقتى دامۋ مەن وركەندەۋگە باعىتتالعان جۇيەلى قادامدار جاساۋ, اسىرەسە, بىرلەسە اتقارىلعان جۇمىس پەن العا قويعان ماقساتتارعا ادالدىق جارقىن بولاشاقتىڭ كەپىلى بولماق.
اكەجان كەڭەسوۆ,
الماتى قالالىق «جاستار رۋحى» جاستار قاناتىنىڭ توراعاسى
