سۋرەتتەردى تۇسىرگەن – ەرلان ومار, «ەQ»
«قازمەديا» ورتالىعىندا وتكەن ماراپاتتاۋ ءراسىمى الدىندا بايقاۋعا قاتىسۋشىلار ارنايى جايىلعان قىزىل كىلەم ۇستىمەن ءجۇرىپ ءوتتى. ءىس-شاراعا مادەنيەت جانە اقپارات ءمينيسترى ايدا بالاەۆا قاتىسىپ, كىرىسپە سوزىندە «ۇركەر» ۇلتتىق سىيلىعى ءۇشىن باعىن سىناپ كورۋگە نيەت بىلدىرگەن بارلىق ارىپتەسىنە العىسىن جەتكىزدى. سونداي-اق بۇل سىن ءوز كەزەگىندە وتاندىق مەديا سالاسىنىڭ دامۋىنا ەلەۋلى سەپتىگىن تيگىزەتىنىن ايتتى.
باق وكىلدەرىنىڭ جۇمىستارىن بەلگىلى سالا ماماندارى, جۋرناليستەر, حالىقارالىق مەديا-ساراپشىلاردان قۇرالعان تاۋەلسىز قازىلار القاسى باعالاپ, ۇزدىكتەردى انىقتاعان ەدى. سونىمەن بايقاۋ قورىتىندىسى بويىنشا «جىلدىڭ ۇزدىك رەپورتاجى» اتالىمىندا Nur.kz سايتىنىڭ وكىلى يۋليا ابراموۆا ۇزدىك دەپ تانىلدى. «الەۋمەتتىك تاقىرىپتاعى ۇزدىك ماتەريال» اتالىمى بويىنشا Time.kz سايتىنىڭ ءتىلشىسى كسەنيا ەۆدوكيمەنكوعا تەڭ كەلەر ەشكىم بولمادى.
«جىلدىڭ ۇزدىك سۇحباتى» اتالىمىندا Inbusiness.kz پورتالىنىڭ ءتىلشىسى نۇرلان ورازعاليەۆ (Inbusiness.kz) جەڭىمپاز اتاندى. ال «جىلدىڭ ۇزدىك جۋرناليستىك زەرتتەۋى» اتالىمى بويىنشا نۇرلات بايكەنجە («استانا اقشامى» گازەتى) وزا شاۋىپ, باس بايگەنى ەنشىلەدى.
سونىمەن قاتار «جىلدىڭ ۇزدىك اناليتيكالىق ماتەريالى» اتالىمىندا – تيمۋر نيتاليەۆ (Ulysmedia.kz); «راديوستانساداعى ۇزدىك جوبا» اتالىمىندا – قىمبات دوسجان (قازاق راديوسى); «جىلدىڭ ۇزدىك فوتوسۋرەتى» اتالىمىندا – سالي سابيروۆ (Olympic.kz); «حالىقارالىق باق-تا قازاقستان تۋرالى جاريالانعان ۇزدىك ماتەريال (باسپا, راديو, ينتەرنەت-جۋرناليستيكا سالاسىندا)» اتالىمىندا تورعىن اشەنوۆا («ومبى قازاقتارى» گازەتى) جەڭىسكە جەتتى.
ۇزدىك ۇجىمدار سايىسىندا دا باعى جانعان بۇقارالىق اقپارات قۇرالدارى بەلگىلى بولدى. اتاپ ايتقاندا, Abai.kz «جىلدىڭ ۇزدىك جاڭالىقتار پورتالى» اتانسا, «ۇزدىك وڭىرلىك باق» سىنىندا «ناش كوستاناي» گازەتى ەشكىمگە دەس بەرمەدى.
سونداي-اق «ۇزدىك پودكاست» اتالىمىندا – NeQuryltay; «ۇزدىك YouTube كانالى» اتالىمىندا Sayahat Time (balbal.kz) وزا شاپتى.
نەگىزگى اتالىمداردان بولەك, «ۆرەميا» گازەتى ۇجىمىنا مادەنيەت جانە اقپارات ءمينيسترى ايدا بالاەۆا ارنايى سىيلىقتى تابىستادى. بۇعان قوسا بالالار جازۋشىسى بەردىبەك سوقپاقباەۆتىڭ 100 جىلدىق مەرەيتويىنا وراي تاعايىندالعان ماراپات «زاڭ» گازەتىنە بۇيىردى.
ايتا كەتسەك, جۇزدەن جۇيرىك شىققان ءار قاتىسۋشىعا «ۇركەر-2024» ەستەلىك مۇسىنشەسى مەن 1 ملن تەڭگە كولەمىندە اقشالاي سىياقى تابىستالدى.
«ۇزدىك سۇحبات» اتالىمىندا جەڭىمپاز بولعان جۋرناليست نۇرلان ورازعاليەۆ بۇل ماراپات ونىڭ شىعارماشىلىق جولىنداعى ەلەۋلى وقيعا ەكەنىن ايتادى.
«قولىنا قالام ۇستاعان ءاربىر جۋرناليست ءۇشىن ەڭبەگىنىڭ ەلەنگەنى – جاقسى. حالىقتىڭ ىقىلاسى مەن مەملەكەتتىڭ باعالاۋى بىزگە شابىت بەرەدى, جاڭا بەلەستەردى باعىندىرۋعا ىنتالاندىرادى. جۋرناليستيكا سالاسىندا ەڭبەك ەتىپ كەلە جاتقانىما 20 جىلدان اسىپتى. قوعامدا قوردالانعان كوپ پروبلەمانى كوتەردىك, حالىقتىڭ قۋانىشى مەن قايعىسىن بىرگە بولىستىك. مىنە, سول ەڭبەك اقتالىپ, «ۇركەر» بايقاۋىنىڭ بيىلعى جەڭىمپازى اتانىپ جاتىرمىن. وتە قۋانىشتىمىن», دەپ ءوز ويىمەن ءبولىستى.
