فوتو:eldala.kz
«قازاقستان تەمىر جولى» ۇلتتىق كومپانياسىنىڭ مالىمەتىنشە, جىل باسىنان باستاپ استىقپەن 582 مارشرۋتتىق پويىز قۇرىلىپ, جونەلتىلگەن. اتاپ ايتقاندا, 551 ەكسپرەسس-پويىز استىق جۇكتەرىن قىتايعا, تۇركمەنستانعا, يرانعا, رەسەيگە, وزبەكستانعا جەتكىزگەن. ەل بويىنشا استىق جۇكتەرىن مارشرۋتتىق جونەلتىلىمدەرمەن تاسىمالداۋ ءۇشىن 31 قۇرام ۇيىمداستىرىلعانى بەلگىلى بولدى.
2024 جىلدىڭ سەگىز ايىنىڭ قورىتىندىسى بويىنشا استىقتىڭ تەمىرجول تاسىمالى 5,4 ملن توننادان اسىپ, ونىڭ ىشىندە 4,2 ملن توننا ەكسپورتتالعانى حابارلاندى.
سونداي-اق 2,3 ملن توننا استىق وڭدەۋ ونىمدەرى تاسىمالدانىپ, بۇل وتكەن جىلدىڭ سايكەس كەزەڭىمەن سالىستىرعاندا 17,4%-عا ارتىق. قايتا وڭدەۋ ونىمدەرىنىڭ ەكسپورتى 20%-عا 1,8 ملن تونناعا دەيىن, ال ىشكى تاسىمالدار 9%-عا 500 مىڭ تونناعا دەيىن وسكەن.
ايتا كەتەرلىگى, 2024 جىلدىڭ قىركۇيەگىندە اقتاۋ پورتى ارقىلى اۋىل شارۋاشىلىعى ونىمدەرىن تاسىمالداۋ ءۇش ەسەگە-90 مىڭ تونناعا دەيىن ۇلعايعان. ال قازان ايىندا 212 مىڭ توننا تاسىمالداۋ جوسپارلانعان.
