قازىر وڭىردە 650 ۋچاسكەلىك كوميسسيا جۇمىس ىستەپ جاتىر, ولاردىڭ قۇرامىندا 4 440 ادام بار. قاراعاندى وبلىسىندا بارلىعى 761 604 سايلاۋشى تىركەلگەن, ونىڭ 4 605-ءى – مۇگەدەكتىگى بار ادامدار. جەرگىلىكتى بيلىك سايلاۋ كۇنى ولارعا بارلىق جاعداي جاسالاتىنىن ايتتى. سونداي-اق تۇرعىنداردى الەۋمەتتىك جەلىلەر, مەسسەندجەرلەر ارقىلى اقپاراتتاندىرىپ جاتىر, ارنايى ونلاين-سەرۆيستەر ىسكە قوسىلعان. 15 call-ورتالىق اشىلىپ, 109 قىزمەتى جۇمىس ىستەيدى.
ورك توراعاسى وبلىس ورتالىعىنداعى №792 جانە №794 ۋچاسكەلەرىندە بولىپ, دايىندىق جۇمىستارىمەن تانىستى. ودان سوڭ ن.ءابدىروۆ اۋماقتىق رەفەرەندۋم كوميسسيالارى توراعالارى, قۇقىق قورعاۋ, وزگە دە مەملەكەتتىك ورگاندار باسشىلارىمەن كەڭەس وتكىزدى. وندا الداعى ناۋقاننىڭ نەگىزگى ەرەكشەلىكتەرى, رەفەرەندۋم وتكىزۋگە دايىندىق, سونداي-اق ەلەكتورالدىق ۇدەرىسىنىڭ بارلىق كەزەڭىندە اشىقتىقتى قامتاماسىز ەتۋ, زاڭدىلىقتى ساقتاۋ ماسەلەلەرى تالقىلاندى.
قاراعاندى وبلىسى اكىمىنىڭ ورىنباسارى الىبەك الدەنەي وڭىردە رەفەرەندۋمعا قاتىسۋعا قۇقىعى بار ازاماتتاردىڭ ءتىزىمى ناقتىلانىپ جاتقانىن جەتكىزدى. وبلىس پروكۋرورىنىڭ ورىنباسارى تالعات مۇقاشەۆ ەلەكتورالدىق كەزەڭىندە زاڭدىلىقتى ساقتاۋ تۋرالى بايانداما جاساسا, وبلىستىق پوليتسيا دەپارتامەنتىنىڭ باستىعى نەگمەت يسماعۇلوۆ ناۋقان كەزەڭىندە, داۋىس بەرۋ كۇنى قۇقىقتىق ءتارتىپتى ساقتاۋ جونىندە ەسەپ بەردى.
سونداي-اق اتقارىلعان جۇمىستار لەگىن جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسپەكوۆا مەن قاراعاندى وبلىسىنىڭ ارك توراعاسى قايرات نۇركەنوۆ تىزبەكتەپ شىقتى.
قاراعاندىدان ورالعان سوڭ, ورك توراعاسى ەلوردانىڭ ورك توراعاسىمەن, استانا جانە قالا اۋداندارىنىڭ ارك مۇشەلەرىمەن, مەملەكەتتىك جانە قۇقىق قورعاۋ ورگاندارىنىڭ وكىلدەرىمەن كەڭەس وتكىزىپ, الداعى پلەبيستسيتكە دايىندىق بويىنشا جۇرگىزىلىپ جاتقان جۇمىستاردىڭ ەسەپتەرىن تىڭدادى.
ن.ءابدىروۆ كەڭەس قاتىسۋشىلارىنا رەسپۋبليكالىق رەفەرەندۋم وتكىزۋگە دايىندىقتىڭ زاڭنامالىق جاڭاشىلدىقتارى مەن ەرەكشەلىكتەرىن ءتۇسىندىردى. ول رەفەرەندۋم مەن سايلاۋ زاڭناماسىنىڭ نورمالارىن قاتاڭ ساقتاپ, كوميسسيالاردىڭ بارلىق مۇشەسىن ۇزدىكسىز ءارى ساپالى وقىتۋ قاجەت ەكەنىن ايتتى.
قالا اكىمىنىڭ ورىنباسارى ەسەت بايكەن رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرى, رەفەرەندۋمدى ۇيىمداستىرۋ, اقپاراتتىق, ماتەريالدىق-تەحنيكالىق قامتاماسىز ەتۋدە جۇرگىزىلىپ جاتقان جۇمىستار تۋرالى باياندادى. استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب مۇگەدەكتىگى بار ادامداردىڭ سايلاۋ قۇقىقتارىن ىسكە اسىرۋ تۋرالى حاباردار ەتتى.
سونداي-اق قالالىق پروكۋراتۋرا مەن پوليتسيا دەپارتامەنتى باسشىلارىنىڭ ورىنباسارلارى ەسەپ بەردى. استانا قالاسىنىڭ اۋماقتىق رەفەرەندۋم كوميسسياسىنىڭ توراعاسى بەيسەمباي جۇمابەكوۆ رەفەرەندۋم كوميسسيالارىنىڭ قىزمەتى جانە داۋىس بەرۋ كۇنىنە دايىندىق ءوز كەزەگىمەن ءجۇرىپ جاتقانىن جەتكىزدى.
ەكى وڭىردە دە ورك باسشىسى داۋىس بەرۋ كۇنى جەرگىلىكتى اتقارۋشى ورگانداردىڭ ەلەكتر قۋاتىمەن ءارى ينتەرنەتپەن ۇزدىكسىز قامتاماسىز ەتۋگە, ال ىشكى ىستەر ورگاندارىنىڭ ۋچاسكەلەردە جانە ىرگەلەس اۋماقتاردا قوعامدىق ءتارتىپتى ساقتاۋ ماڭىزدى ەكەنىن ايتتى. سونىمەن قاتار ن.ءابدىروۆ اۋماقتىق رەفەرەندۋم كوميسسيالارىنا تۇرعىنداردى تولىق اقپاراتتاندىرۋدى تاپسىردى جانە داۋىس بەرەتىن ۋچاسكەلىك كوميسسيا مۇشەلەرى ۇيلەردى ارالاپ, جەكە شاقىرۋ قاعازدارىن ۇلەستىرۋ قاجەت ەكەنىن اتاپ ءوتتى. بۇل – ماڭىزدى ءىستىڭ ءبىرى.
بۇعان قوسا بارعان وڭىرلەردە ن.ءابدىروۆ اۋماقتىق رەفەرەندۋم كوميسسيالارىنىڭ مۇشەلەرىمەن جەكە كەڭەستەر وتكىزدى. وعان دەيىن ورك توراعاسى ەلوردانىڭ ءار اۋدانىنداعى ۋچاسكەلەرگە بارىپ, داۋىس بەرۋگە دايىندىق بارىسىمەن تانىسقان ەدى. ۋچاسكەلەردى جاراقتاندىرۋ جانە داۋىس بەرۋشىلەرگە قولايلى جاعداي جاساپ, مۇگەدەكتىگى بار ادامداردىڭ سايلاۋ قۇقى تاپتالماۋىن شەگەلەپ تاپسىردى.
