فوتو: حالىقارالىق كۇرەس فەدەراتسياسى
قر تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتىنىڭ جازۋىنشا ءدۇبىرلى دودادا زۋلفيا ياحياروۆا (55 كگ), ديانا كايۋموۆا (59 كگ), يرينا كازيۋلينا (65 كگ) مەن ءجاميلا باقبەرگەنوۆا (72 كگ) كۇرەسەدى.
بۇل تىزىمنەن ءجاميلا باقبەرگەنوۆانى ەرەكشە اتاپ وتۋگە بولادى. ول – 72 كگ دەيىنگى سالماقتا الەم رەيتينگىنىڭ كوشباسشىسى. ەكى دۇركىن الەم چەمپيوناتىندا كۇمىس (2021 جانە 2022 جىلى), تاعى ءبىر مارتە قولا (2023 جىلى) جۇلدەگە يە بولعان. سونىمەن قاتار ازيانىڭ 3 دۇركىن جەڭىمپازى جانە بىرنەشە دۇركىن جۇلدەگەرى ەكەنىن ايتا كەتكەن ءجون.
ءجاميلا بىلتىر بەلگرادتاعى الەم چەمپيوناتىندا توپ جارىپ, وليمپيادا باعدارلاماسىنا كىرەتىن سالماققا اۋىسقىسى كەلگەنىن ايتقان. الايدا جارتىلاي فينالدا موڭعوليالىق پالۋانعا ەسە جىبەرىپ, كەيىننەن ۇزدىك ۇشتىكتى تۇيىندەگەن.
باپكەرلەر قوسىنى تاڭداعان قالعان 3 وتانداسىمىزدىڭ دا حالىقارالىق ارەناداعى تاجىريبەسى مول.
قازاقستان ايەلدەر قۇراماسىنىڭ باس باپكەرى قايرات ساعاديەۆ قازىر كوماندانى الماتى وبلىسىنداعى «اقبۇلاق» ورتالىعىنا جيناپ, جاتتىعۋدىڭ العاشقى كەزەڭىن وتكىزىپ جاتىر.
«قازىر دايىندىقتىڭ بەل ورتاسىنا كەلدىك. ايدىڭ اياعىندا جاتتىعۋ جۇمىسى از ۋاقىتقا توقتايدى. سوسىن, 2-كەزەڭدى استانا قالاسىندا ۇيىمداستىرامىز. وندا پالۋاندار تەحنيكا مەن تاكتيكا جاعىنان دايىندىققا دەن قويادى», دەدى قايرات ساعاديەۆ.
ەسكە سالا كەتەيىك, وسىعان دەيىن مۇنداي فورماتتاعى دۇنيەجۇزىلىك دودا (وليمپيادالىق ەمەس سالماقتاعى) تەك 2016 جىلى ماجارستان استاناسىندا وتكەن. ول كەزدە قازاق پالۋاندارىنان نۇرلان بەكجانوۆ (ەركىن كۇرەس, 70 كگ) كۇمىس, ايىم ءابدىلدينا (55 كگ) قولا مەدال جەڭىپ العان.
