فوتو: بوتاكوز باقبەرگەن
ءداستۇرلى ءىس-شارانىڭ ءبىرىنشىسى سەسسياسى «وڭىرلىك باق دامۋىندا سينەرگيانىڭ كورىنىسى» تاقىرىبىنا ارنالدى. رەسپۋبليكالىق باسىلىمداردىڭ باسشىلارى مەن مادەنيەت جانە اقپارات مينيسترلىگىنىڭ وكىلدەرى گازەت-جۋرنالداردىڭ, ينتەرنەت باسىلىمداردىڭ جۇمىسىندا بىرنەشە جىل بويى شەشىمىن تاپپاي جۇرگەن ماسەلەلەردى قوزعادى.
سەسسيانى اشقان مودەراتور - «24KZ» تەلەارناسىنىڭ ديرەكتورى جاسىن بىركەنوۆ مىنبەردە ءسوز سويلەپ, تاجىريبەسىن بولىسكەن قوناقتاردى تانىستىردى.
«قازاق گازەتتەرى» جشس باس ديرەكتورى ديحان قامزابەك ۇلى سەرىكتەستىك قۇرىلعالى بەرى ەلىمىزدىڭ باس گازەتتەرى - «Egemen Qazaqstan» جانە «كازاحستانسكايا پراۆدا» بىرىگىپ, ءوزارا سينەرگيانى قالىپتاستىرعانىن اتاپ ءوتتى. ول سونداي-اق سەرىكتەستىك قۇرامىنا جالپى 6 گازەت پەن 5 جۋرنال كىرەتىنىن ەسكە سالدى.
«بۇگىندە مەرزىمدى باسىلىمدار جۇمىسىندا شەشىلمەي جاتقان كوپتەگەن ماسەلە بار. ءبىز دە ءىرى سەرىكتەستىك رەتىندە بۇل ماسەلەلەردى كۇندە بايقاپ وتىرامىز. ماسەلەن, اۆتورلىق قۇقىقتى ساقتاۋ ماسەلەسى بۇگىندە وتە وتكىر قوزعالىپ وتىر. بۇل فوتوجۋرناليستەر مەن تىلشىلەردىڭ جۇمىسىندا قيىندىق تۋعىزادى. سوتتاسۋعا دەيىن دە جەتكەن وقيعالاردى باستان كەشىردىك. بۇل جۋرناليستەر مەن ماسس-مەديا وكىلدەرىنىڭ مارتەبەسىن كوتەرۋ مەن قۇقىعىن قورعاۋ بويىنشا جۇمىستار ءبىرشاما توقتاپ قالعانىن بىلدىرەدى. تاعى ءبىر ماسەلە - قارجىلاندىرۋ مەن جارناما. بۇگىندە «گازەت-جۋرنالداردى كىم وقيدى؟ قازىرگى زاماندا گازەت وقۋ وزەكتى ەمەس» دەگەن وعاش پىكىرلەر قالىپتاسىپ جاتىر. دەسە دە, گازەت وقيتىن ادامدار بار, ءار كەز بولادى دا. گازەت سالاسىنا تەك قولداۋ قاجەت. بۇگىندە جارناما بەرۋشىلەر ەداۋىر ازايعان, گازەت بەتتەرىندە تەك نەكرولوگتاردى عانا كورۋگە بولادى. ءيا, بۇل شىندىق.
كەلەسى ماسەلە - گازەت بەدەلى. ماسەلەن, 80-90 جىلدارى ەلدىڭ باس باسىلىمدارىنىڭ بەتتەرىنە قانداي دا ءبىر شەنەۋنىككە قاتىستى سىني ماتەريال شىقسا, وعان دەرەۋ سوگىس جاريالانىپ, لاۋازىمىنان دا ايىرىلىپ قالۋى مۇمكىن ەدى. ال اناليتيكالىق ماقالالاردىڭ دەڭگەيى قازىرگى ماتەريالدارمەن سالىستىرعاندا جوعارى بولاتىن ەدى. بۇدان تاعى ءبىر ماسەلە تۋىندايدى - جۋرناليستەردىڭ ساۋاتى, جاس مامانداردى وقىتۋ ساپاسى», دەدى ديحان قامزابەك ۇلى.
سونداي-اق سەسسيا بارىسىندا ءوز ويىن ورتاعا سالعان «Syr-media» جشس باس ديرەكتورى مارات ارالباەۆ قازىرگى تسيفرلىق داۋىردە ءداستۇرلى باسپانىڭ ورنى مەن مارتەبەسى تۋرالى ءسوز قوزعادى.
«قازىرگى تسيفرلىق داۋىردە وقىرماندار ءوز نازارىن جەدەل اقپاراتقا سالادى. بۇل سايتتار مەن الەۋمەتتىك جەلىلەردىڭ بەدەلىن ءبىرشاما كوتەرگەنى انىق. الايدا ءداستۇرلى باق جويىلىپ كەتكەن جوق. سۇرانىس بار. گازەت-جۋرنالداردىڭ ءۇش نەگىزگى قارجىلاندىرۋ كوزى بار: مەملەكەتتىك تاپسىرىس, جارناما, وقىرمانداردىڭ جازىلۋى. ايتا كەتەيىن, ءبىز 2016 جىلدان بەرى گازەتتەردى ءوزىمىز شىعارامىز, جازامىز, باسامىز. باسقا گەزەتتەردىڭ تارالۋىنا دا ۇلەس قوسامىز. بۇل دا ءوزارا سينەرگيانىڭ كورىنىسى. الايدا, بىزگە جانە باسقا دا وڭىرلىك, رەسپۋبليكالىق باسىلىمدارعا «قازپوشتانىڭ» قولداۋى قاجەت. سوڭعى ۋاقىتتا كوپتەگەن باسىلىم باسشىلارىنىڭ «قازپوشتا» جۇمىسىنا شاعىمدارى كوبەيىپ كەتكەن. بۇل ماسەلەلەر الداعى ۋاقىتتا شەشىمىن تابادى دەگەن ۇمىتتەمىن», دەدى سپيكەر.
ال قر مادەنيەت جانە اقپارات مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ جاقىندا مەملەكەت باسشىسى «ماسس-مەديا تۋرالى» زاڭدى ماقۇلداپ, قول قويعانى, ول كۇشىنە ەنگەنىن ەسكە سالىپ, Astana Media Week الاڭىندا كوتەرىلگەن بارلىق ماسەلە اتالعان زاڭمەن رەتتەلەتىنىن ايتتى.
سونداي-اق ەلدىڭ تۇپكىر-تۇپكىرىنەن جينالعان وڭىرلىك باق وكىلدەرى دە تاقىرىپقا بايلانىستى پىكىر ءبىلدىرىپ, ۇسىنىستارىن ورتاعا سالدى.
