جالىنداعان جاستىق پەن الاۋلاعان شىنايى سەزىمنىڭ ورداسىنداي بولعان ەلىمىزدىڭ باس ءبىلىم وشاعىنىڭ اۋماعىنداعى ەرەكشە سالتانات كۇن ساۋلەسى شاپاعىن شاشقان ساتتەن باستالدى. ستۋدەنت جاستاردىڭ ۇرانداعان جىگەرلى داۋىسى اينالاعا ايبار بەرگەن الاتاۋدىڭ ەتەگىن دۋمانداتىپ, توڭىرەكتى دۇبىرگە بولەدى.
– العا, قازاقستان! العا, قازاقستان! العا, قازاقستان!
جاستار داۋىسى مەن جىگەرلى مۋزىكا ءبىر ساتكە تىنىس العاندا بۇگىنگىنىڭ سامۇرىعى – سۇلۋ سۇڭقاردىڭ سيمۆولىنداي قالىقتاپ جەردەگى دۋماندى توبەدەن ءتۇسىرگەن درونداردىڭ پىرىلداعان داۋىسى ەستىلدى…
كوپ كەشىكپەي دۋماندى جۇرت الدىنا الماتى قالاسىنىڭ اكىمى باۋىرجان بايبەك شىعىپ ءسوز باستادى.
– قازاقتىڭ ەجەلگى ءتۇسىنىگىندەگى وت كيەسى, وت-انا بارشا جاقسىلىق پەن ىزگىلىكتىڭ باستاۋى بولسا كەرەك-ءتى. حالقىمىز ەرەكشە ءمان بەرگەن ەڭ قاستەرلى, ەڭ قاسيەتتى وتان, وتباسى دەگەن ۇعىم دا وسى «وت» تۇبىرىنەن شىققان. دۇنيە ءجۇزىندەگى اۋقىمدى دودا ەلباسىمىز – قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قولداۋىمەن قا-سيەتتى قازاق جەرىندە, الماتى قالاسىندا تۇڭعىش رەت ءوتىپ وتىرۋى الەم جۇرتشىلىعىنىڭ ەلگە قۇرمەتى, قازاقستان رەسپۋبليكاسىنىڭ جاسامپاز حالقى مەن ونىڭ ەلباسى نۇرسۇلتان نازارباەۆقا ارنالعان ەرەكشە سەنىمى, – دەپ اتاپ ءوتتى قالا اكىمى.
الماتىداعى ۋنيۆەرسيادا الاۋىن تۇتاتۋ قازاق ءبىلىمىنىڭ قاراشاڭىراعى ءال-فارابي اتىنداعى ۇلتتىق ۋنيۆەرسيتەتتە ءوتۋى دە تەكتەن-تەك ەمەس. بۇل ىرگەلى وقۋ ورنى ەلىمىزگە تانىمال قانشا سپورت ساڭلاقتارىن تاربيەلەپ شىقتى.
…بۇگىنگى عاجايىپ تەحنولوگيالىق جەتىستىكتەردى جۇزەگە اسىرۋمەن جالىن اتقان عالامات وت-وشاقتان الاۋ تۇتاتقان ۋنيۆەرسيتەتتىڭ ۇزدىك ستۋدەنتى ايسۇلۋ ەرنيازوۆا الماتىدا العاش جاعىلعان جارىس الاۋىن الىپ كەلىپ, قالا اكىمى باۋىرجان بايبەككە تابىستادى.
سالتانات باستالدى.
دۋماندى مۋزىكا مەن دۋىلداعان ستۋدەنت جاستاردىڭ قوشەمەتىمەن تيميريازەۆ كوشەسىنە بەت العان الاۋ ۇستاعان قالا اكىمى باۋىرجان بايبەكتى جارىس جولىنداعى 2-ءشى ەستافەتا نۇكتەسىندە وتكەن جىلعى ريو-دە-جانەيرو-2016 وليمپياداسىنىڭ سۋدا ءجۇزۋدەن چەمپيونى, ءال-فارابي اتىنداعى قاز ۇۋ ستۋدەنتى دميتري بالاندين توسىپ تۇرعان. ەل سەنىمىن اقتاعان دميتري ءبالانديندى قاۋمالاپ, جەلەپ-جەبەگەن جەلاياق توپ سول قاناتقا بۇرىلىپ, ماناس كوشەسىنە قاراي جول تارتتى. 3-ءشى ەستافەتا نۇكتەسىندە كۇللى ازيا قۇرلىعى جاستارىن سانىمەن, سىمباتىمەن عانا ەمەس, ۆولەيبول سپورتىنداعى اسقان شەبەر ويىندارىمەن تاڭ قالدىرىپ, تامساندىرعان اتاقتى سپورتشى قىزىمىز سابينا التىنبەكوۆا كۇتىپ تۇرعان بولاتىن.
سابينادان ەستافەتا الاۋىن قالالىق ءماسليحاتتىڭ دەپۋتاتى مۇرات ءادىلحانوۆ الىپ, بەلگىلى قاشىقتىقتى جۇگىرىپ وتكەن بويدا الاۋدى رەسپۋبليكالىق سپورت كوللەدجىنىڭ ديرەكتورى, پەداگوگيكا عىلىمدارىنىڭ دوكتورى امالبەك تشانوۆقا بەردى…
وسىلايشا, ماناس كوشەسىمەن ءتىپ-تىكە جول تارتقان الاۋ ەستافەتاسى اباي داڭعىلىنا بەت الدى.
اباي داڭعىلىنا ءتۇسىپ وت-الاۋدى قولدان قولعا وتكىزىپ العا جىلجىعان توپ ۋنيۆەرسيادانىڭ جارىس وتكىزەتىن باستى الاڭدارىنىڭ ءبىرى – بالۋان شولاق اتىنداعى سپورت كەشەنىنە جاقىنداي ءتۇستى. وسى ەكى ارادا تەك الماتىعا عانا ەمەس, كۇللى قازاقستانعا ەسىمدەرى تانىمال ءبىر توپ ازامات ەستافەتا الاۋىن كەزەكتەسىپ ۇستاپ ۇلگەرگەن. ولاردىڭ قاتارىندا ايگىلى كينواكتريسا قارلىعاش مۇحامەتجانوۆا, اقىن بولاتبەك ورازباەۆ, بلوگەر ايتبەك اۋلباەۆ, «بازيس-ا» كورپوراتسياسىنىڭ توراعاسى پاۆەل بەلوۆيچ, اكتەر اسىلحان تولەپوۆ ءجۇردى.
قالالىق ورتالىق سۋعا ءجۇزۋ باسسەينى مەن سەيفۋللين داڭعىلىنا دەيىن جەتى نۇكتەدە الاۋ ۇستايتىندار ساپىندا اتاقتى سپورتشى داۋلەت تۇرلىحانوۆ, «قايرات» فك باقىلاۋشىلار كەڭەسىنىڭ توراعاسى قايرات بورانباەۆ, قازاق سپورت جانە تۋريزم اكادەمياسىنىڭ پرەزيدەنتى قايرات زاكىريانوۆ, تانىمال جاس شاحماتشى جانسايا ءابدىمالىك, ەسترادا ءانشىسى ايقىن تولەپبەرگەن, وليمپيادا ويىندارىنىڭ كۇمىس جۇلدەگەرى يسلام بايرامۋكوۆ, اكتەر, كومەديالىق شوۋمەن نۇرتاس ادامباي جانە باسقالارىنىڭ ەسىمدەرى اتالدى.
تاڭعى ساعات 10.20-دا الاۋ تۇتاتقان ەستافەتاشىلار كورسەتىلگەن مەرزىم بويىنشا ساعات 14.00-دە گوگول, تولەبي, بايتۇرسىن ۇلى, ساتباەۆ كوشەلەرىن باسىپ ءوتىپ, دوستىق داڭعىلىمەن تومەن قۇلديلاپ, رەسپۋبليكا سارايى الدىنداعى اباي ەسكەرتكىشىنىڭ تۇبىنە تابان تىرەدى.
ساتباەۆ كوشەسىندەگى 84-ءشى نۇكتەدە وليمپيادا چەمپيونى جاقسىلىق ۇشكەمپىروۆتىڭ قولىنان ەستافەتا الاۋىن العان اتاقتى بايكەر دميتري پەترۋحين الاۋدى ءال-فارابي اتىنداعى ۇلتتىق ۋنيۆەرسيتەتتىڭ رەكتورى عالىم مۇتانوۆقا جەتكىزىپ بەردى.
…الماتىدا وتەتىن XXVIII دۇنيەجۇزىلىك ۋنيۆەرسياداعا قاتىسۋشى 57 ەلدىڭ مەملەكەتتىك تۋلارىن كوتەرگەن جاستار قالىڭ توپتىڭ اراسىنان ءجۇرىپ ءوتىپ, الاۋ تاسىمالاۋشىلارعا جول اشتى.
توپتىڭ الدىنا ءتۇسىپ, بۇل جۇگىرىپ كەلگەن حالىقارالىق ستۋدەنتتەر سپورتى فەدەراتسياسىنىڭ (FISU) پرەزيدەنتى ولەگ ماتىتسين ەدى.
الاۋدى قولىنا الىپ, تىك كوتەرە ۇستاپ ءدۇيىم جۇرت الدىنا شىققان بۇگىنگى الماتىداعى ءوتىپ جاتقان وتە ءۇلكەن سپورتتىق ويىننىڭ حالىقارالىق جەتەكشىسى بىلاي دەدى:
– سىزدەرگە وسى الاڭنان شىنايى سالەم جولدايمىن! ەڭ الدىمەن, ۋنيۆەرسيادانىڭ قازاق جەرىندە وتۋىنە ۇلكەن ەڭبەك سىڭىرگەن FISU كومانداسىنا ريزاشىلىعىمدى بىلدىرە وتىرىپ, قازاقستاننىڭ پرەزيدەنتى نۇرسۇلتان نازارباەۆقا, قالا اكىمى باۋىرجان بايبەككە راحمەت (قازاقشا – اۆت.) ايتقىم كەلەدى. العا!..
…ەستافەتا الاۋى ارنايى ءدۇرىلدەتە سوعىلعان قول شاپالاقتىڭ استىندا ارنايى كونتەينەرگە سالىنىپ, ارنايى جابدىقتالىپ بروندالعان كولىكپەن كەشكىسىن الاۋ جاعىلاتىن «الماتى ارەنا» سپورت سارايىنا جونەلتىلدى.
تالعات ءسۇيىنباي,
«ەگەمەن قازاقستان»
الماتى
