مۇنداي سىناق ءتۇرى جىل سايىن ەلىمىزدىڭ ءار ايماعىندا وتكىزىلەدى. نەگىزگى ماقساتى – ەكسترەميزم جانە لاڭكەستىكتىڭ جولىن كەسۋ, قوعام مەن ازاماتتاردىڭ قاۋىپسىزدىگىن قامتاماسىز ەتۋ مىندەتىن ورىندايتىن «ب» ارنايى جاساعى مۇشەلەرىنىڭ دايىندىعىن شىڭداۋ. جالپى جاساقتار قۇرامىندا بارلىق تالاپقا ساي كەلەتىن ساردارلار مەن كەلىسىمشارت بويىنشا اسكەري قىزمەتشىلەر بار.
بيىلعى ءداستۇرلى دوداعا 300-گە جۋىق نيەت ءبىلدىرۋشىنىڭ اراسىنان ىرىكتەلگەن 80-نەن اسا ۇمىتكەر قورىتىندى سىناققا قاتىستى. ولار العاشقى كەزەڭدە تەوريالىق تەستىلەۋدەن ءوتىپ, دەنە شىنىقتىرۋ, بيىكتىكتەگى دايىندىق, ارنايى قۇرىلعىلارمەن تومەن ءتۇسۋ, بايلانىس جانە مەديتسينالىق دايىندىق بويىنشا سىناق تاپسىردى. وسى تاپسىرمالاردان تومەن كورسەتكىش كورسەتكەن قاتىسۋشىلار ەكىنشى كەزەڭگە وتە المادى. شەشۋشى كەزەڭگە نەبارى 44 ۇمىتكەر جىبەرىلدى.
شەشۋشى كەزەڭنىڭ ءبىرىنشى كۇنى سىناققا قاتىسۋشىلار تاڭعى ساعات 5.00-دە دابىل ارقىلى كوتەرىلىپ, ەڭ الدىمەن 5 شاقىرىمعا جۇگىرۋ بويىنشا سىناق تاپسىردى. ودان سوڭ ۇزاق تا كۇردەلى جورىققا اتتاندى. جولدا ولار قارسىلاستىڭ شابۋىلىن تويتارۋ, جارالانعان قارۋلاسىنىڭ جاراسىن تانىپ, قاۋىپسىز ايماققا سۇيرەپ ءوتۋ, ءورت شىققان ايماقتان تىنىس الۋعا ارنالعان باس كيىممەن جۇگىرۋ سەكىلدى تاپسىرمالاردى ورىندادى. جولاي ابدەن شارشاعان جاۋىنگەرلەر باۋىرىمەن جورعالاپ, جاتقان كۇيى تاسالانۋعا ارنالعان ور قازدى جانە ەتىگىمەن سۋ كەشتى. تاڭ اتپاستان اياققا تۇرعان ۇمىتكەرلەر جەلە جورتقان كۇيى كەشكە دەيىن دامىل تاپپادى.
سىناق كەزىندە جاۋىنگەرلەرگە فيزيكالىق جانە پسيحولوگيالىق سوققى جاسالدى. ولار سوعان قاراماستان كەزىككەن قيىندىقتاردى جەڭىپ, مارەگە جەتۋ ءۇشىن ەرىك-جىگەرىن اياعان جوق. وسىمەن ءبىر اپتادان بەرى ارنايى جاساق جاۋىنگەرلەرى ورىنداپ جاتقان تاپسىرمالار لەگى اياقتالىپ, سىناقتىڭ قورىتىندى كۇنى ولار 10 شاقىرىم جۇگىرىپ, وق ءدارى سالىنعان قوبديشالاردى سۇيرەۋدەن نورماتيۆ تاپسىردى. سەلكىلدەك كوپىر ۇستىنەن ءوتىپ, تەمىر باعاننان تومەنگە سىرعانادى.
قيعاش قويىلعان اعاشتاردىڭ بىرىنەن ەڭكەيىپ, ءبىرىن اتتاپ, شىنجىر بايلانعان دوڭگەلەكتەر قابىرعاسىنا ورمەلەپ شىقتى. اسپالى تەمىرلەردى دە ارتتا قالدىردى. سۋ باسسەينىنە سەكىرىپ, بيىك تاس قابىرعانى بىرلەسە ەڭسەردى.
وسى ۋاقىت ارالىعىندا جان-جاقتارىن ءورت تورلاپ, الدارىنان پۋلەمەت ساقىلداپ تۇردى. ال وزگە دە كەدەرگىلەردىڭ ماڭىنا تاياعان كەزدە جارىلىس بولىپ جاتتى. ولار بۇرقىراي اتىلعان پۋلەمەت وعىنىنىڭ استىنان جورعالاپ بارىپ, قاۋىپسىز نۇكتەدە اسىنىپ جۇرگەن قارۋىمەن وق اتتى. ۇمىتكەرلەرگە ءبىر وق جانە ءبىر عانا مۇمكىندىك بەرىلدى. قۇم ءتيىپ, سۋ شاشىلعان قارۋ اتپاي قالسا, جاۋىنگەر سىناقتى وسى جەردە اياقتار ەدى. بابى مەن باعى قاتار شاۋىپ, اۋىر سىننان سۇرىنبەي وتكەندەر اقتىق سىن – قويان-قولتىق توبەلەسكە شىقتى. ءۇش راۋندتان تۇراتىن جەكپە-جەكتىڭ سوڭعى بولىمىندە رينگتەگى جىگىتتەر تىڭ تۇرعان كۇرەڭ بەرەت يەگەرلەرىمەن كۇش سىناستى. ابىروي بولعاندا, بۇعان دەيىن ساپتا بولعان 15 ۇمىتكەردىڭ ءبارى دە 9 مينۋت بويى سوققىلارعا توتەپ بەردى. ءالى كەتىپ, كۇشى سارقىلعانداردىڭ ءوزى تەمىردەي توزىمدىلىك تانىتتى.
سىناقتان سۇرىنبەي وتكەندەرگە سالتاناتتى جاعدايدا قاستەرلى كۇرەڭ بەرەت تابىستالدى. ءىس-شاراعا جامبىل وبلىسىنىڭ اكىمى ەربول قاراشوكەەۆ ارنايى كەلدى. قۇرمەتتى قوناقتاردىڭ اراسىندا ۇلتتىق ۇلان اسكەرىمەن تىعىز بايلانىستاعى وزگە دە اسكەري كۇش قۇرىلىمدارىنىڭ باسشىلارى بولدى.
– «كۇرەڭ بەرەت» باس كيىمىن كيۋ ءارى «بۇركىت» كەۋدە بەلگىسىن تاعۋ قۇقىعىنا يە بولۋ جانقيارلىق ەرلىك پەن باتىلدىقتى تالاپ ەتەدى. دەسە دە مۇنداي سىناققا قۇرىشتاي شىنىققان جاۋىنگەرلەر عانا باراتىنى انىق. كۇرەڭ بەرەتتى كيۋ مارتەبەسىنە ارنالعان بىلىكتىلىك سىناعىنان ءوتۋ – جاۋىنگەرلىك رۋحتىڭ بەلگىسى. بۇل ءىس-شارا جاستاردى وتانعا دەگەن ادالدىق پەن رياسىز ماحابباتقا تاربيەلەۋگە باعىتتالعان, – دەدى وبلىس اكىمى.
ودان كەيىن ۇلتتىق ۇلان باس قولباسشىسىنىڭ ورىنباسارى, گەنەرال-مايور باۋىرجان ءابجانوۆ سىناقتان سۇرىنبەي وتكەن سايىپقىراندارعا «كۇرەڭ بەرەت» باس كيىمىن تابىستادى.
– بۇل سىناقتار قۇقىقتىق ءتارتىپ اسكەرىنىڭ ءداستۇرلى ساباقتاستىعىن جالعاي وتىرىپ, «بۇركىت» ارنايى جاساق جاۋىنگەرلەرىنىڭ كاسىبي بىلىكتىلىگىن ارتتىرۋ, شەبەرلىكتەرىن شىڭداۋ ماقساتىندا ۇيىمداستىرىلدى. «بۇركىت» ارنايى جاساعىنىڭ جاۋىنگەرلەرى وزدەرىنە جۇكتەلگەن تاپسىرمالاردى ءساتتى ورىنداپ كەلەدى. سونداي-اق مەملەكەتتىڭ جانە ازاماتتاردىڭ كونستيتۋتسيالىق قۇقىعىن قورعاۋدا ءوز مىندەتتەرىن ابىرويمەن اتقارىپ ءجۇر. بيىل جەلتوقسان ايىندا ارنايى جاساقتىڭ قۇرىلعانىنا 25 جىل تولادى. وسى ۋاقىت ارالىعىندا ءىىم جانە ۇلتتىق ۇلان باسشىلىعى ارنايى جاساق جاۋىنگەرلەرىنىڭ دايىندىعىنا قولداۋ كورسەتىپ, نازاردا ۇستاپ كەلدى. قازىرگى ۋاقىتتا ارنايى جاساق بولىمشەلەرىن قامتاماسىز ەتۋ دەڭگەيى ارتپاسا, كەمىگەن ەمەس. سوندىقتان دا مۇندا قىزمەت اتقارعىسى كەلەتىن اسكەريلەرگە قويىلاتىن تالاپ قاتاڭ. بۇل سوزىمىزگە «كۇرەڭ بەرەت» باۋىرلاستىعىنا قوسىلعان جاۋىنگەرلەردىڭ دەڭگەيى دالەل بولا الادى. بۇگىن كۇرەڭ بەرەت كيگەن اسكەري قىزمەتشىلەردىڭ قاتارى 15 ادامعا تولىعىپ وتىر, – دەدى ب.ءابجانوۆ.
سىننان ءساتتى وتكەن جاۋىنگەرلەردىڭ توككەن تەرى, ەتكەن ەڭبەگى اقتالدى. ولار بۇل كۇندى ەشقاشان ۇمىتپاق ەمەس.
– «كۇرەڭ بەرەت» الۋ – مەنىڭ ارمانىم ەدى. وسى سىناققا تىڭعىلىقتى دايىندالدىم. ماعان سەنىم ارتقان ادامدارعا ايتار العىسىم شەكسىز. 65 شاقىرىمدى ەڭسەردىك. بۇل تىڭعىلىقتى دايىندىقتىڭ عانا ەمەس, نامىس پەن جىگەردىڭ دە ارقاسىندا دەپ ويلايمىن. جاسىم 41-گە تاياپ قالدى. بۇگىنگە دەيىن وسى قۇرمەتكە يە بولۋدى ماقسات ەتىپ ەدىم. بىلتىر ءدال وسى سىناقتىڭ جارتىسىنا كەلگەندە دەنساۋلىعىم سىر بەرىپ, قالىپ قويدىم. شۇكىر, جاقىندارىمنىڭ ارقاسىندا ەڭسەمدى تىكتەپ, بۇگىنگى دەڭگەيگە جەتتىك. بۇل مەن ءۇشىن وليمپيادا التىنىمەن پاراپار, – دەدى «جاك» ەسىمدى جاۋىنگەر.
ايتا كەتەيىك, اسكەري قىزمەتشىلەر اراسىنداعى قايسارلىق پەن وجەتتىكتى, شىدامدىلىق پەن توزىمدىلىكتى سىڭعا سالار ايتۋلى ءىس-شارانى تاماشالاۋعا تۇركيا, رەسەي, وزبەكستان, قىرعىز رەسپۋبليكالارىنىڭ ارنايى جاساق وكىلدەرى دە كەلىپ, وزدەرىنىڭ جوعارى باعاسىن بەردى.
