سۋرەتتەردى تۇسىرگەن – ەسەنجول يسابەك
ءاسانالى ءاشىم ۇلى – قازاق كينوسىن الەمدىك دەڭگەيگە كوتەرگەن اكتەرلەردىڭ ءبىرى. تەاتر سالاسىندا دا مايتالماننىڭ ەڭبەگى جارقىراپ كورىندى. مۋزەي-كابينەتتىڭ اشىلۋ سالتاناتىندا اكتەردىڭ ءوزى اتاپ وتكەندەي, «ونەردىڭ جانى – قۇشتارلىق, جاۋى – ىشتارلىق».
«ونەر ولكەسىندە اتىڭ ەستىلە باستاسا دۇشپانىڭ كوبەيەتىنى بار. ادام سىنمەن وسەدى, ايتىس-تارتىستا شىڭدالادى. شاربولاتتاي ابدەن جەتىلىپ شىعىپ, ونەردىڭ كوگىندە قالىقتاتاتىن شابىت شىركىننىڭ تاۋسىلماعانى ابزال. بۇگىن ەرەكشە تولقىپ وتىرمىن. بۇقار جىراۋ مۋزەيى ماعان ايرىقشا سىي جاسادى. جاستىق شاعىمداعى, كينو مەن تەاترداعى ۇمىت بولعان كەيبىر ەستەلىكتەر ويعا قايتا ورالىپ وتىر. سيرەك فوتوسۋرەتتەردى كوردىم. مۋزەيدىڭ بۇل كابينەتى مەنىڭ جەكە تۇلعاما ەمەس, قازاق كينوسىنا جاساپ وتىرعان تارتۋى دەپ ۇعىندىم. كەرەكۋدىڭ توپىراعى قۇيقالى, جۇمات شانيندەي ۇلتتىق تەاتر ونەرىنىڭ نەگىزىن سالۋشى تۇلعانى, شاكەن ايمانوۆتاي قازاق كينوسىنىڭ اتاسىن دۇنيەگە اكەلدى. قانشاما تەاتر جانە كينو اكتەرلەرى, ونەر ادامدارى ءوسىپ شىقتى. سول اتالارىمىزدىڭ قاسيەتتى رۋحى بۇگىنگى ۇرپاقتى جەلەپ-جەبەپ, ەلدىڭ ازاماتتارى ونەردى كوتەرىپ جاتقانى مەنى ايرىقشا قۋانتادى. مۋزەي دەگەن وتكەندى جۇرتپەن تابىستىرۋ, رۋحانياتتى ناسيحاتتاۋ بولسا, بۇگىنگى ونەگەلى ءىس وسى ۇدەدەن تولىقتاي شىعىپ وتىر», دەپ العىسىن جەتكىزدى ءاسانالى ءاشىم ۇلى.
اكتەردىڭ قاتىسۋىمەن كوپتەگەن كينوكارتينا پاۆلودار وبلىسىنىڭ باياناۋىل اۋدانىندا تۇسىرىلگەن. ولاردىڭ اراسىندا «قوزى كورپەش – بايان سۇلۋ» سياقتى قازاق كينوسىنىڭ شەدەۆرىن اتاپ وتۋگە بولادى. جەر بەدەرى كوركەم فيلم تۇسىرۋگە جايلى ولكەگە كەزىندە شاكەن ايمانوۆ, سونداي-اق وزگە دە رەجيسسەرلەر ءتۇسىرىلىم توپتارىن ءجيى اكەلگەن.
ءبىر ءسات اكتەر بالالىق شاعى جايىنداعى ەستەلىكتەرىمەن ءبولىستى.
«مەن جوقشىلىقتى جەتكىنشەك شاعىمنان كورىپ ءوستىم. اكەم 25 جاسىندا مايدانعا اتتانىپ, سودان ورالمادى. ەڭبەكتىڭ قادىرىن, ناننىڭ قاسيەتىن ەرتە تۇسىندىك. انامىزعا كومەك بولسىن دەپ ۇجىمشار قىرمانىنداعى تىرلىككە 4 جاسىمنان ارالاستىم. قىرمانشى شال مەنى استىق باستىراتىن وگىزدىڭ ۇستىنە مىنگىزىپ قوياتىن. 1944 جىلى مەكتەپ تابالدىرىعىن اتتادىم. ءالى كۇنگە ەسىمدە, جوقشىلىق سالدارىنان ابدەن قار تۇسكەنشە مەكتەپكە جالاڭ اياق بارىپ-قايتاتىنبىز», دەپ تەبىرەندى قازاق كينوسىنىڭ اڭىزى.
بۇقار جىراۋ اتىنداعى ادەبيەت جانە ونەر مۋزەيىنىڭ باسشىسى ەربول قايىروۆ كابينەتتى اشۋداعى ماقسات – جۇرتشىلىقتى ەسىمى ەلگە سىيلى ءاسانالى ءاشىم ۇلىنىڭ ونەر جولىمەن تانىستىرىپ, جاستارعا ۇلگى ەتۋ ەكەنىن اتاپ ءوتتى.
«مۇندا اكتەردىڭ 15-كە جۋىق جەكە زاتى, ءتۇرلى تۇسىرىلىمدەردەگى جانە وتباسىلىق سۋرەتتەرى قويىلعان. جادىگەرلەردىڭ كوپشىلىگىن جىل باسىندا الماتى قالاسىنا ارنايى بارىپ, ءاسانالى اعانىڭ وزىنەن الىپ كەلگەن ەدىم. زاتتاردىڭ ىشىندە اكتەردىڭ ەڭبەكتەرى, شاپانى, كوزىلدىرىگى, پورتفەلى بار. مۋزەي-كابينەت 2-3 جىل كولەمىندە اشىق تۇرادى. كەيىن مۇنداعى جادىگەرلەر ارنايى ەكسپوزيتسياعا اينالادى. الداعى ۋاقىتتا مۋزەي قورىن ەلىمىزگە تانىمال وزگە دە ونەر جانە مادەنيەت قايراتكەرلەرىنە قاتىستى جادىگەرلەرمەن تولىقتىراتىن جوسپارىمىز بار», دەيدى مۋزەي باسشىسى.
پاۆلودار وبلىسى
