فوتولار: primeminister.kz
ۇكىمەت باسشىسى جاڭا وندىرىستەردى اشۋعا باسا نازار اۋدارا وتىرىپ, مونوقالا ەكونوميكاسىن ءارتاراپتاندىرۋ جوسپارىمەن تانىستى. جاڭاوزەندە 150 مىڭنان استام ادام تۇرادى. بولجام بويىنشا, 2035 جىلعا قاراي حالىق سانى 200 مىڭ تۇرعىننان اسادى. كۇتىلەتىن ءوسىمدى ەسكەرە وتىرىپ, قالا تۇرعىندارىن جۇمىسپەن قامتۋدى, ونىڭ ىشىندە حالىقتىڭ بيزنەس-باستامالارىن قولداۋ جونىندەگى شارالاردى كۇشەيتۋ ارقىلى قامتاماسىز ەتۋدىڭ ماڭىزى اتاپ ءوتىلدى.
تۇرعىن ءۇي-كوممۋنالدىق ينفراقۇرىلىمدى دامىتۋعا باسا نازار اۋدارىلدى. ولجاس بەكتەنوۆكە جاڭاوزەن مەن وعان ىرگەلەس جاتقان اۋىلدىق ەلدى مەكەندەردىڭ ورتالىقتاندىرىلعان سۋمەن, تۇرمىسقا قاجەتتى گازبەن جانە ەلەكتر ەنەرگياسىمەن 100% قامتاماسىز ەتىلگەنى باياندادى. تۇرعىنداردى اۋىز سۋمەن قامتاماسىز ەتەتىن سۋ تازارتۋ قۇرىلىسىن جاڭعىرتۋ – مونوقالانىڭ تىرشىلىگىن قامتاماسىز ەتۋدەگى ماڭىزدى جوبا سانالادى. نىساننىڭ قۋاتىن ارتتىرۋ ءۇشىن 2025 جىلى 30 مىڭ م3 كولەمىندە سۋ قورلارىن جيناقتاۋ ءۇشىن رەزەرۆۋارلار سالۋ جوسپارلانىپ وتىر.
مونوقالانىڭ ونەركاسىبىن دامىتۋ جانە جاڭا وندىرىستەردى ىسكە قوسۋ ەلەكتر ەنەرگياسىنىڭ قوسىمشا كولەمىن تالاپ ەتەدى. «قازمۇنايگاز» ۇك اق مەن يتاليالىق ENI كومپانياسىنىڭ ءوسىپ كەلە جاتقان قاجەتتىلىكتەرىن جابۋ ءۇشىن جالپى قۋاتى 247 مۆت گيبريدتى ەلەكتر ستانساسىن سالۋ بويىنشا ينۆەستيتسيالىق جوبا باستالدى. جوبا جەك بىرلەسكەن گەنەراتسياسىن (كۇن جانە جەل ەنەرگەتيكاسى) پايدالانۋدى جانە گاز ەلەكتر ستانساسىن سالۋدى كوزدەيدى.
ولجاس بەكتەنوۆ تۇرعىندارعا قولجەتىمدى ءارى ساپالى ءبىلىم بەرۋ بويىنشا قابىلدانىپ جاتقان شارالارمەن تانىستى. ماسەلەن, جاڭاوزەندە «جايلى مەكتەپ» ۇلتتىق جوباسى شەڭبەرىندە جىل سوڭىنا دەيىن 1,2 مىڭ ورىندىق زاماناۋي مەكتەپتى پايدالانۋعا بەرۋ جوسپارلانىپ وتىر. كەلەسى جىلى تاعى ەكى جايلى مەكتەپتىڭ قۇرىلىسى كوزدەلگەن. سونىمەن قاتار بالالار مەن جاستاردى جان-جاقتى دامىتۋ ءۇشىن 350 ورىندىق Bolashaq Sarayi وقۋشىلار سارايىنىڭ قۇرىلىسى باستالدى. «وزەنمۇنايگاز» كومپانياسى ىسكە اسىراتىن جوبا بيزنەستىڭ الەۋمەتتىك جاۋاپكەرشىلىگىنىڭ جارقىن مىسالى سانالادى. وقۋشىلار سارايىن كەلەسى جىلى قالا تۇرعىندارىنىڭ پايدالانۋىنا بەرۋ جوسپارعا الىنعان.
ۇكىمەت باسشىسىنا قالاداعى جاڭا گاز وڭدەۋ زاۋىتىنىڭ قۇرىلىسى تۋرالى باياندالدى. جوبانى ىسكە قوسۋ حالىقتىڭ قوسىمشا گاز كولەمىنە دەگەن قاجەتتىلىگىن قامتاماسىز ەتىپ قانا قويماي, ەڭ باستىسى – ونەركاسىپتىڭ ودان ءارى دامۋىنا جانە قوسىلعان قۇنى جوعارى مۇناي-حيميا ونىمدەرىن جاساۋعا سەرپىن بەرەدى. كاسىپورىننىڭ وندىرىستىك قۋاتى 900 ملرد م3 ىلەسپە مۇناي جانە تابيعي گاز قوسپاسىن, سونداي-اق جىلىنا 5 مىڭ توننا گاز كوندەنساتىن قۇرايدى. قۇرىلىس جۇمىستارى 2023 جىلدىڭ قاراشا ايىندا باستالدى, ەكى ىسكە قوسۋ كەشەنىن تولىق اياقتاۋ 2027 جىلدىڭ باسىنا جوسپارلانعان.
پرەمەر-مينيستر گاز وڭدەۋ كاسىپورنىنىڭ قۇرىلىسى ءوڭىردىڭ ەكونوميكالىق جانە الەۋمەتتىك دامۋى ءۇشىن كەڭ اۋقىمدا مۋلتيپليكاتيۆتى اسەر بەرەتىنىن اتاپ ءوتتى.
«مەملەكەت باسشىسى حالىققا جولداۋىندا مونوقالالار ەكونوميكاسىن ءارتاراپتاندىرۋدى قامتاماسىز ەتۋ مىندەتىن قويدى. ادامداردىڭ الەۋمەتتىك ءال-اۋقاتى مەن ءومىر ءسۇرۋ ساپاسىن جاقسارتۋعا ەرەكشە نازار اۋدارۋ قاجەت. جاڭاوزەندى قازاقستاننىڭ ءىرى مونوقالالارىنىڭ ءبىرى رەتىندە جان-جاقتى دامىتۋعا قولداۋ كورسەتۋ وتە ماڭىزدى. بارلىق الەۋمەتتىك جانە ينفراقۇرىلىمدىق جوبالاردىڭ ساپالى ءارى ۋاقتىلى ورىندالۋىن قامتاماسىز ەتۋ قاجەت. ينۆەستيتسيالار تارتىپ, جۇمىس ورىندارىن اشۋ كەرەك. جاڭا گاز وڭدەۋ زاۋىتىنىڭ قۇرىلىسى دا ەرەكشە باقىلاۋدا تۇر. پرەزيدەنت بىزگە ءۇش گاز وڭدەۋ زاۋىتىن مەرزىمىندە سالۋدى تاپسىرعان بولاتىن. بۇلار – قاشاعان, قاراشىعاناق جانە جاڭاوزەن زاۋىتتارى. بارلىعىنىڭ ساپاسى جوعارى دەڭگەيدە بولۋى كەرەك. ءبىز ونى قاداعالايمىز», دەپ اتاپ ءوتتى ولجاس بەكتەنوۆ.
