اتوم ونەركاسىبىن دامىتۋ قاۋىمداستىعى ۇيىمداستىرعان «كومىردىڭ ورنىنا اتوم» اتتى بىرەگەي اكتسيا مۇناي مەن كومىر سەكىلدى ەنەرگيا ءوندىرۋدىڭ باسقا ءداستۇرلى كوزدەرىمەن سالىستىرعاندا اتوم ەنەرگياسىنىڭ ارتىقشىلىقتارىن كورسەتۋگە باعىتتالعان.
قاۋىمداستىق وكىلدەرى سالماعى 4,5 گرامم ءبىر ۋران تابلەتكاسىن, 350 ليتر مۇنايى بار بوشكەلەردى جانە 400 كيلوگرامم تاس كومىرى سالىنعان ستەندتى ورناتتى.
«بۇل ادام ءومىرى مەن دەنساۋلىعىنا قاۋىپسىز, تومەن بايىتىلعان ۋرانى بار, سالماعى نەبارى 4,5 گرامم بولاتىن ۋران تابلەتكاسىنىڭ ناقپىشىنى. ءبىر قاراعاندا ەلەۋسىز بولىپ كورىنگەنىمەن, ونىڭ قۇرامىندا وراسان زور ەنەرگيالىق الەۋەت بار», دەيدى قاۋىمداستىقتىڭ مەنەدجەرى سوفيا كۋري.
ءبىر ۋران تابلەتكاسى بەرەتىندەي ەنەرگيانى ءوندىرۋ ءۇشىن 350 ليتر مۇناي نەمەسە 400 كيلوگرامم كومىر قاجەت بولادى.
سپيكەردىڭ ايتۋىنشا, ءىس-شارانىڭ باستى ماقساتى - يادرولىق وتىننىڭ جوعارى ەنەرگيا تىعىزدىعىن عانا ەمەس, سونىمەن بىرگە ونىڭ ەكولوگيالىق تازالىعىن كورسەتۋ.
«مامانداردىڭ باعالاۋىنشا, سالماعى 4,5 گرامم ءبىر ۋران تابلەتكاسىن قولدانعاندا اتموسفەراعا شامامەن 20 گرامم كومىرقىشقىل گازى (سو2) بولىنەدى. 350 ليتر مۇناي جاعىلعاندا اتموسفەراعا شامامەن 900 كيلوگرامم سو2 بولىنەدى. كومىردىڭ زيانى ودان دا كوپ – 400 كگ كومىر شامامەن 1000 كگ كومىرقىشقىل گازىن شىعارادى, ونىڭ شامادان تىس مولشەرى ءبىزدىڭ قورشاعان ورتانىڭ ناشارلاۋىنا اكەلەدى», دەپ اتاپ ءوتتى س.كۋري.
قاۋىمداستىق وكىلى اتوم ەنەرگەتيكاسى جاي عانا بالاما ەمەس, بولاشاقتىڭ تەحنولوگياسى ەكەنىنە توقتالدى. ول وتانداستارىمىزدى بولاشاق ۇرپاققا جەر شارىن تازا قالدىرۋ ءۇشىن ونىڭ مۇمكىندىكتەرىنە نازار اۋدارۋعا شاقىردى.
«بۇل اقپاراتتى الەۋمەتتىك جەلىلەردە بولىسىڭىزدەر. اتوم ەنەرگياسىنىڭ جوعارى تەحنولوگيالىق جانە ەكولوگيالىق تازالىعى تۋرالى مۇمكىندىگىنشە كوپ ادام ءبىلسىن. ءبىز بىرگە تازا جانە تۇراقتى ەنەرگەتيكالىق بولاشاققا قادام جاساي الامىز», دەپ قورىتىندىلادى سوفيا كۋري.
